Kristján Andri gefur hljóðkerfi.
Mikill fengur barst sveitarfélaginu Árneshreppi og ekki síst Finnbogastaðaskóla í dag þegar Kristján Andri Guðjónsson útgerðarmaður á Ísafirði, kom færandi hendi með nýtt hljóðkerfi sem sett verður upp í félagsheimilinu í Trékyllisvík. Mikil þörf var á slíku kerfi en það mun nýtast við ýmis tækifæri s.s. þegar nemendur halda skemmtanir í félagsheimilinu, við veisluhöld, fundi eða aðra viðburði. Oddný Þórðardóttir oddviti og Elísa Ösp Valgeirsdóttir skólastjóri þökkuðu Kristjáni Andra fyrir þessa höfðinglegu gjöf og óskuðu honum og fjölskyldu hans gleðilegra jóla og farsældar á nýju ári. Kristján Andri hefur gert mikið út frá Norðurfirði undanfarin ár og er farin að þekkja mannlífið hér vel og veit hvað vantar í skóla sveitarfélagsins og félagsheimili þess.
