Fleiri fréttir

Jón G. Guðjónsson | miðvikudagurinn 3. ágúst 2011

Mikil úrkoma eftir nóttina.

Lækir sáust í morgun sem sjást yfirleitt ekki fyrr en í september.
Lækir sáust í morgun sem sjást yfirleitt ekki fyrr en í september.
Það rigndi mikið hér á Ströndum í nótt.Það er engu líkara að veðurguðirnir hafi opnað fyrir flóðgættirnar nú í byrjun ágúst eftir þurran júlí.

Úrkoman á veðurstöðinni í Litlu-Ávík eftir nóttina,eða frá kl.18:00 í gær til 09:00 í morgun mældist 39,0 mm og var það mesta úrkoman á landinu eftir nóttina.Næst mest úrkoma mældist í Bolungarvík  11,7 mm.

Fyrsti dagur ágúst var þurr enn síðan hefur verið rigning eða súld.

Jón G. Guðjónsson | mánudagurinn 1. ágúst 2011

Yfirlit yfir veðrið í Júlí 2011.

Þokuhattur á Reykjaneshyrnu.
Þokuhattur á Reykjaneshyrnu.
Veðrið í Júlí 2011.

Yfirlit yfir veðrið frá veðurstöðinni í Litlu-Ávík.

Mánuðurinn var fremur svalur fram til tíundu.Norðlægar vindáttir með þokulofti oftast og súld með köflum,hitinn komst þó yfir tíu stig þegar þokunni létti hluta úr dögum.

Þann 11 snérist vindur í SV með þurru og hlýju veðri,síðan breytilegar vindáttir.Þann 15 snérist vindur aftur til Norðlægrar vindáttar og með þokusúld með köflum og kólnaði þá verulega í 3 daga sem vorkuldi í maí væri,og var norðlæg átt fram til 19.Frá 20 voru hafáttir eða breytilegar með þurru og hlýju veðri fram til 26,en úrkoma var 24-25 og 26.Þá snérist til suðlægra vindátta í 3 daga.Mánuðurinn endaði með Norðvestan og þokulofti.

Mánuðurinn var mjög þurr í heild,þótt oft hafi verið rakt í þokuloftinu og lítill þurrkur.

Fjöll talin auð þann 18 eða mánuði seinna en í fyrra.

Bændur byrjuðu ekki almennt slátt fyrr enn eftir 20, sem er vel hálfum mánuði seinna en í venjulegu árferði.

 

Yfirlit dagar eða vikur:

1-10:Norðan og NV eða hafáttir,kul,gola eða stinningsgola,súld eða rigning með köflum,oftast þokuloft,þurrt  1,7,9 og 10.Hiti 4 til 13 stig.

11-12.Suðvestan gola eða stinningsgola,þurrt í veðri,hiti 7 til 16 stig.

13-14:Breytilegar vindáttir andvari,kul eða gola,þurrt í veðri,hiti 9 til 16 stig.

15-19:Norðan eða NV andvari en oftast gola,súld með köflum,þokuloft,þurrt þ.18,hiti 4 til 10 stig.

20-26:Hafáttir eða breytilegar vindáttir logn,andvari,kul eða gola,rigning eða súld 24,25 og26 annars þurrt,hiti frá 3 stigum til 18 stig.

27-29:Suðvestan eða suðlægar vindáttir,gola síðan kaldi,skúrir eða rigning,þurrt þ.28.Hiti 9 til 16 stig.

30-31:Austan og síðan NV,kul eða gola,stinningsgola,súldarvottur þ.31,þurrt þ.30.Hiti 8 til 16 stig.

 

Úrkoman mældist 14,7 mm.  (í júlí 2010: 63,1 mm).

Þurrir dagar voru 15.

Mestur hiti mældist þann 23. 17,8 stig.

Minnstur hiti mældist þann 1. 3,0 stig.
Meðalhiti var: +9,1 stig.

Meðalhiti við jörð var + 6,3 stig. (í júlí 2010: +6,29 stig).

Sjóveður:Gott sjóveður allan mánuðinn.

Tekið saman af Jóni G Guðjónssyni veðurathugunarmanni í Litlu-Ávík.

Jón G. Guðjónsson | sunnudagurinn 17. júlí 2011

Vorkuldi.

Í Litlu-Ávík mældist lágmarkshitinn eftir nóttina 4,4 stig.
Í Litlu-Ávík mældist lágmarkshitinn eftir nóttina 4,4 stig.
Enn er kalt hér á Norður Ströndum algjör vorkuldi þótt júlí sé.

Hitinn á Veðurstöðinni í Litlu-Ávík hefur aðeins farið uppí síðustu tvo daga átta til níu stig hluta úr degi og niður í 4 stig á nóttinni í þokubrælunni.Nú klukkan níu í morgun var aðeins 5,1 stigs hiti í Litlu-Ávík.

Samkvæmt Gagnabrunni Veðurstofu Íslands var kaldast á láglendi á landinu í nótt á Blönduósi 1,1 stig  og á Hornbjargsvita fór hitinn niðrí 3,4 stig.Í Litlu-Ávík mældist lágmarkshitinn eftir nóttina 4,4 stig.

Jón G. Guðjónsson | laugardagurinn 16. júlí 2011

Kaldast á Gjögurflugvelli.

Mælaskýlið í Litlu-Ávík.Kaldast var á Gjögurflugvelli 4,3 stig.
Mælaskýlið í Litlu-Ávík.Kaldast var á Gjögurflugvelli 4,3 stig.
Í gær 15 júlí kólnaði heldur betur í veðri hér á Ströndum og víðar á Norðurlandi.

Í gær var komin norðan og eða norðvestan með súld með köflum og þokulofti.

Í morgun var svipað veður og er spáð eitthvað svipuðu veðri,heldur kólnandi ef eitthvað er.

Kaldast eftir síðastliðna nótt á láglendi var á Gjögurflugvelli 4,3 stig og á Hornbjargsvita 4,5 stig og í Litlu-Ávík 4,8 stig,samkvæmt Gagnabrunni Veðurstofu Íslands.

Jón G. Guðjónsson | mánudagurinn 11. júlí 2011

Stefnir í 16 til 17 stiga hita í dag.

Séð til Norðurfjarðar í morgun.Drangajökull í bakgrunni.
Séð til Norðurfjarðar í morgun.Drangajökull í bakgrunni.
Loks er komið sumarveður hér á Ströndum Norður.Hitinn í gær komst yfir þrettán stig seinnipartinn þegar þokuloftinu linnti.

Strax í morgun klukkan níu var hitinn komin í 13,4 stig á veðurstöðinni í Litlu-Ávík,í suðvestan gjólu,reyndar fór hiti niðrí 5,4 stig í nótt,enda léttskýjað.

Það sem af er júlí hefur verið fremur svalt og þokuloft og súld með köflum,þó hefur hiti komist yfir tíu stigin fjórum sinnum fyrr í mánuðinum þegar þokuloftinu hefur slotað um tíma yfir daginn.

Tún eru lítið sprottin enn ættu að lagast ef hitinn verður hærri en hefur verið yfirleitt í mánuðinum.

Ferðafólk hefur verið í lágmarki það sem af er júlí mánuði,enn þó voru tvö ættarmót haldin hér í Árneshreppi um liðna helgi,og var þá nokkur fjöldi ferðamanna.

Nú ætti ferðafólki að fjölga í hreppnum aftur ef hiti verður góður áfram í suðlægum vindáttum,annars er spáð kólnandi veðri aftur í vikulok.

Jón G. Guðjónsson | föstudagurinn 1. júlí 2011

Yfirlit yfir veðrið í Júní 2011.

Það snjóaði síðast niðurundir byggð þann 15 júní.
Það snjóaði síðast niðurundir byggð þann 15 júní.
Veðrið í Júní 2011.

Yfirlit yfir veðrið frá veðurstöðinni í Litlu-Ávík.

Fyrstu daga mánaðar var vindur vestlægur,síðan Norðan og NA út mánuðinn,nema síðasta dag mánaðar,með úrkomu,slyddu snjóéljum rigningu og súld og þokulofti.Hiti komst í 10 til 11 stig dagana 3 og 4,annars mjög svalt.Snjó og slydduél voru dagana 8 og 15 og snjóaði þá niður undir byggð.Slydda var um tíma þann 10.Mánuðurinn endaði síðan á síðasta degi mánaðarins með austlægri vindátt og léttskýjuðu veðri með ágætis hita loks.Tún hafa síðustu daga mánaðar tekið við sér á ný og aðeins farin að spretta.Einnig er úthagi farin að lagast.Eins og sjá má á meðalhita við jörð var mánuðurinn mjög kaldur.

Það mætti halda að verið væri að lýsa september veðri enn ekki júní veðri.

Dagar eða vikur:

1:Norðvestan og N gola,súldarvottur og þokuloft,hiti 5 til 7 stig.

2-4:Suðvestan stinningsgola,kaldi en allhvass þ.4. skúrir þ.3,annars þurrt,hiti 4 til 11 stig.

5-6:Norðvestan eða N gola,kaldi síðan stinningsgola,rigning, þurrt þ. 6.Hiti 3 til 7 stig.

7-29:Norðan og NA ,gola,stinningsgola,kaldi eða stinningskaldi,snjó eða slydduél,slydda,súld eða rigning,oft þokuloft,hiti frá 0,2 stigum uppí 8 stig,enn oftast á milli 4 til 6 stig.

30:Austlæg vindátt, andvari eða kul og léttskýjuðu veðri hiti 3 til 11 stig.

Úrkoman mældist 57,3 mm. (í Júní 2010: 13,3 mm.)

Þurrir dagar voru 6.

Mestur hiti mældist þann 30. 11,1 stig,og þann 4. 11,0 stig

Minnstur hiti mældist þann 7. 0,2 stig.
Meðalhiti var: +4,9 stig.

Meðalhiti við jörð var +3,37 stig. (í júní 2010: +5,76 stig.)

Sjóveður:Var nokkuð rysjótt enn margir góðir eða sæmilegir dagar.

Tekið saman af Jóni G Guðjónssyni veðurathugunarmanni í Litlu-Ávík.

Jón G. Guðjónsson | miðvikudagurinn 15. júní 2011

Snjóaði í fjöll í nótt.

Snjór náði niðurundir láglendi í morgun.
Snjór náði niðurundir láglendi í morgun.
Í morgun á veðurstöðinni í Litlu-Ávík bæði kl sex og klukkan níu voru gefin upp snjóél,og náði snjór niður í ca 100 metra hæð yfir sjávarmál í fjallinu Örkinni.

Hitinn var á stöðinni kl 06:00 2,2 stig og kl 09:00 2,4 stig og hafði hitinn farið niðrí 1,8 stig um nóttina.

Oft hefur snjóað niðrí byggð um 17 júní hér í Árneshreppi þótt það sé ekki árviss viðburður.

Jón G. Guðjónsson | fimmtudagurinn 9. júní 2011

Kuldaboli-Snjór og Slydda.

Snjór náði að morgni 9 júní niður að Gíslabala sem er við fjallsrætur Arkarinnar.
Snjór náði að morgni 9 júní niður að Gíslabala sem er við fjallsrætur Arkarinnar.
Það hefur verið kalt í veðri sem af er júní hiti frá 0 stigum og rétt komist í 10 stig við bestu skilyrði þegar léttskýjað hefur verið og sólin hefur fengið að njóta sín.

Á veðurstöðinni í Litlu-Ávík þegar veðurathugunarmaður fór út fyrir fyrir sex í morgun að lesa af mælum var 2,4 stiga hiti og snjóél að ganga yfir,og snjór náði niður að Gíslabala sem var smá hjáleiga í Litla-Ávíkurlandi sem stendur við fjallsrætur Arkarinnar.Síðan hefur verið slydda með köflum,en virðist vera að snúa sér í éljagang aftur.

Minnstur hiti sem af er júní á veðurstöðinni í Litlu-Ávík mældist að morgni 7.júní  O,2 stig.

Annars er veðurspáin þessi frá Veðurstofu Íslands fyrir Strandir og Norðurland vestra þessi:

Vaxandi norðanátt, 10-15 og dálítil rigning eða slydda síðdegis, en snjókoma eða slydda í kvöld. Lægir í fyrramálið, en aftur vaxandi norðaustanátt síðdegis og rigning með köflum. Hiti 1 til 5 stig en 4 til 10 stig á morgun.

Jón G. Guðjónsson | fimmtudagurinn 2. júní 2011

Yfirlit yfir veðrið í Maí 2011.

Séð til Norðurfjarðar að morgni 22-05-2011.
Séð til Norðurfjarðar að morgni 22-05-2011.

Veðrið í Maí 2011.

Yfirlit yfir veðrið frá veðurstöðinni í Litlu-Ávík.Mánuðurinn byrjaði með hafáttum og oftast hægum vindi enn fremur svölu veðri fram til 16. Þann 17 gekk hann í Norðaustanátt og síðan Norðan,og hret gerði frá 20 sem stóð fram til 24. Síðan hafáttir með frekar svölu veðri.Ræktuð tún farin að takavið sér,(grænka) um 5. maí og úthagi farin að koma til eftir 10. þrátt fyrir svalt veður. Þetta gekk allt til baka aftur í hretinu nema að ræktuð tún tóku strax við sér aftur þegar hlýnaði aðeins aftur eftir hretið. Mánuðurinn var kaldur og úrkomusamur í heild. Lambfé sett út á tún um viku seinna enn venjulega vegna kuldans og gróðurleysis.

Dagar eða vikur:

1-7:Norðan eða NV andvari kul eða gola,rigning eða súld,þurrt í veðri  5-6. og 7,þokuloft,hiti 1 til 7 stig.

8-9:Norðaustan gola,stinningsgola eða kaldi,súld mikil rigning um tíma þ. 9. hiti 4 til 7 stig.

10-16:Norðan eða NV kul,gola eða stinningsgola,súld,rigning eða skúrir,hiti 1 til 8 stig.

17-24:Norðaustan stinningsgola eða kaldi í fyrstu síðan stinningskaldi enn allhvass 19 og 20-21og 23. rigning,slydda,él.Hiti frá +6 stigum niðri -2 stig.

25-31:Norðan og NA gola,stinningsgola,kaldi eða stinningskaldi,rigning,súld,skúrir eða él,hiti frá -0 stigum upp í +7 stig.

Úrkoman mældist 85,3 mm. (maí 2010:46,3 mm.)

Þurrir dagar voru 6.

Mestur hiti mældist þann 15: +8,5 stig.

Mest frost mældist þann 17: -1,8 stig og þann 21: -1,6 stig.

Alhvít jörð var í 2 daga.

Flekkótt jörð var í 3 daga.

Auð jörð var því í 26 daga.

Mesta snjódýpt mældist þann 22. 3 cm.
Meðalhiti var: +3,5 stig.

Meðalhiti við jörð var +1,44 stig. (maí 2010:+1,46.)

Sjóveður:Gott eða sæmilegt fram í miðjan mánuð síðan mjög rysjótt.

Tekið saman af Jóni G Guðjónssyni veðurathugunarmanni í Litlu-Ávík.

Jón G. Guðjónsson | mánudagurinn 9. maí 2011

Mikil úrkoma eftir nóttina.

Úrkomumælir í Litlu-Ávík.
Úrkomumælir í Litlu-Ávík.
Mikið hefur rignt í nótt og í morgun og enn rignir mikið.

Úrkoman mældist 34,0 mm á veðurstöðinni í Litlu-Ávík frá kl.18:00 í gær og til kl.09:00 í morgun.

Mun þetta vera næstmesta úrkoma sem mælst hefur þar eftir 15 tíma,síðan mælingar hófust þar 1995.

Og var þetta næstmesta úrkoma sem mældist á landinu í nótt en mest var hún í Vík í Mýrdal 36,9 mm.

Jörð er á floti og margir nýir lækir myndast.

Það mun draga úr úrkomu í dag eftir veðurspá Veðurstofu Íslands.

Atburðir

« 2020 »
« September »
S M Þ M F F L
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30      

Úr myndasafni

  • Maddý og Bjarnheiður.
  • Mundi og Björn fara að setja lista í loft:19-02-2009.
  • Kallahús(Regínuhús Gjögri-05-07-2004.
Vefumsjón