Um kl. 10:50 varð útsláttur á 33kV Hólmavíkurlínu 2 sem liggur frá Geiradal að Hólmavík.  Verið er að leita að bilun og setja inn varaafl.Segir á vef Orkubús Vestfjarða.
Rafmagnslaust var í Árneshreppi frá því um kl 10:05 og framundir 11:25,þegar rafmagn kom á aftur gegnum varaafl.

Um verslunarmannahelgina komandi verður stórdansleikur í Félagsheimilinu Árnesi í Trékyllisvík.

Það er hin stórvinsæla hljómsveit Blek og byttur sem eru sérfræðingar í landsbyggðarskröllum sem leika fyrir dansi bæði gömlu og nýju dansana laugardagskvöldið 31 júlí.

Dansleikurinn hefst kl 23:00 og stendur dansleikurinn til kl 03:00 eftir miðnætti.

Miðaverðið er aðeins 2.500 kr.

Hljómsveitina skipa sex tónlistarmenn sem eru úr öllum geira tónlistar og vel þekktir sem slíkir.

Einn hljómsveitarmanna er engin annar en Þorkell Jóelsson tónlistarmaður,en hann er eiginmaður hinnar frábæru Sigrúnar(Diddú) Hjálmtýsdóttar söngkonu.

Nú er komin tími til að taka fram dansskóna og mæta á dansleik í Trékyllisvík!..
Þorkell og Sigrún voru svo vinsamleg að láta vefnum í té mynd af hljómsveitarmönnum.

Í fréttatilkynningu frá sóknarpresti í Hólmavíkurprestakalli,séra Sigríði Óladóttur mun hin árlega guðsþjónusta verða um verslunarmannahelgina  í Árneskirkju í Trékyllisvík næstkomandi sunnudag, þann 1. ágúst, og hefst messan kl.14.00.
Kirkjan í Árnesi var vígð í september 1991. Hún stendur gegnt gömlu kirkjunni, hinum megin við þjóðveginn, og er teiknuð af Guðlaugi Gauta Jónssyni arkitekt. Form kirkjunnar er fengið frá fjallinu Reykjaneshyrnu. 
Altari kirkjunnar stendur á tveimur blágrýtissúlum sem teknar voru úr fjöru í sveitinni.

Nú er búið að vera þurrt að mestu frá 9 júlí og varla komið dropi úr lofti síðan.

Er nú farið að bera á neysluvatnsleysi víða,sérstaklega þar sem eru litlar safnþrær,og á það sérstaklega við þar sem er búið yfir sumarið,svo sem á Eyri í Ingólfsfirði og bænum Ingólfsfirði í botni Ingólfsfjarðar og sumstaðar á Gjögri.
Víða eru ár rétt við bæi þar sem hægt er að sækja vatn í.
Einnig er að verða vatnslítið í Litlu-Ávík og víðar.

Þar sem vatnslaust er er ekki hægt að þvo þvott í þvottavélum heldur verður að hita vatn og þvo í bala og taka gamla góða þvottabrettið fram.

Þessi mikla rigning sem var í byrjun júlí er talin bjarga miklu að ekki varð vatnsleysi fyrr.

Einnig var mjög þurrt í júní.

Opnun myndlistarsýningar í Galleríi Gránu, Síldarminjasafninu á Siglufirði.

Sýningin  Lýðveldið á planinu  verður opnuð  fimmtudaginn 29. júlí, kl. 17  í Galleríi Gránu, Síldarminjasafninu á Siglufirði. Boðið verður upp á léttar veitingar í tilefni dagsins.

Sýningin er hluti af eins konar sýningargjörningi hóps átta listamanna. Umfjöllunarefnið er sótt í ólíka kima hins íslenska lýðveldis, menningu, náttúru og ólíkt rými sýningarstaða sem gjarnan tengjast atvinnusögu þjóðarinnar.

Hópurinn hefur gert víðreist og sýnt í óhefðbundnu sýningarhúsnæði svo sem í hlöðu við Mývatn, í yfirgefnum verbúðum í Ingólfsfirði á Ströndum, í húsnæði gömlu ullarverksmiðjunnar að Álafossi og nú síðast í Gamla kaupfélaginu á Þingeyri í maímánuði síðastliðnum.

Upphaf samstarfs listamannanna má rekja til sýningarinnar ,,Lýðveldið Ísland" sem haldin var í Þrúðvangi, Álafosskvosinni árið 2004 og tileinkuð var 60 ára afmæli íslenska lýðveldisins.

 

Listamennirnir sem sýna eru:

Anna Jóa, Bryndís Jónsdóttir, Guðbjörg Lind Jónsdóttir, Hildur Margrétardóttir,

Hlíf Ásgrímsdóttir, Kristín Geirsdóttir, Kristín Jónsdóttir frá Munkaþverá, Ólöf Oddgeirsdóttir

 

Sýningin stendur frá 29. júlí til 31. ágúst 2010. Opið alla daga kl. 10-18 og kl. 13-17 frá 21. ágúst.

Mikið hefur verið um að vera í húsi Ferðafélags Íslands Valgeirsstöðum í Norðurfirði í sumar.
"Að sögn Helgu Garðarsdóttur skálavarðar hafa stórir sem stærri hópar komið,farið í gönguferðir í nágrenninu eða farið með bátnum Sædísi norður á Strandir,en haft bækistöð í sæluhúsinu í Norðurfirði.
Einnig var stórt ættarmót á síðustu helgi og þessa helgi er stór hópur á ferð.
Ennfremur segir Helga skálavörður að oftast sé fullt á tjaldstæðinu."
Í sumar voru settir upp rafmagnstenglar á tjaldstæðið fyrir fellihýsi og hjólhýsi sem þykir vinsælt til að kynda húsin hlaða rafgeyma og síma og tölvur.
Sæluhús FÍ í Norðurfirði nefnist Valgeirsstaðir og er gamalt íbúðarhús í góðu standi. Það stendur við botn Norðurfjarðar, rétt ofan við fallega sandfjöru.

Í húsinu er veiturafmagn og það er hitað upp með rafmagni. Húsið er tvær hæðir. Á efri hæð eru fjögur svefnherbergi sem rúma frá einum og upp í fjóra gesti. Á neðri hæð eru fjögur herbergi sem taka frá þremur upp í sex gesti. Samtals tekur húsið 20 manns. Þar er einnig borðstofa og velbúið eldhús. Í eldhúsinu er heitt og kalt vatn, rafmagnseldavél með ofni, örbylgjuofn og allur borðbúnaður. Í húsinu er sturta og tvö salerni. Í 10 mínútna göngufæri frá húsinu er verslun og sundlaug er á Krossnesi, ekki ýkja langt í burtu.

Fjölmargar spennandi gönguleiðir um stórbrotið land eru í nágrenninu. Má þar nefna göngu á Töflu, Kálfatinda, Munaðarnesfjall og Krossnesfjall. Einnig eru hægt að fara í lengri gönguferðir, s.s. yfir í Ingólfsfjörð og kringum Strút. Ekki má gleyma töfraheimi fjörunnar. Þar er að sjá tröllasmíð eins og Tröllahlaða og Bergið. Einnig er þar Gvendarsæti sem Guðmundur góði biskup sat í er hann vígði Urðirnar í Norðurfirði.

Nú á dögunum þegar Björn bóndi Torfason á Melum var að rúlla hey á Krossnesi fór ein heyrúllan á stað og hafnaði í fjörunni.

Mjög brött tún eru á Krossnesi þarna inn með Norðurfirðinum og verða þeyr sem eru að rúlla að fara mjög varlega,og þegar rúllan er losuð af verður að snúa á hlið við brekkuna eða uppámóti sem og var gert.

Að sögn Björns fór rúllan ekki strax á stað eftir að hún var komin af rúlluvélinni,svo allt í einu tekur Björn eftir því að rúllan fer að velta á stað og ætlaði að reina að keyra fyrir hana en náði ekki.

Rúllan var komin á mikla ferð sleit niður girðingu yfir skurð sem er fyrir ofan veginn og yfir veginn og hentist síðan fram af bökkunum og hafnaði í fjörunni rétt ofan við sjávarmál.

Lán þykir að engin bíll var á veginum hné neinn á gangi þar.

Nú hafa nokkrir bændur lokið heyskap eins og á Kjörvogi og í Litlu-Ávík,á þeim bæjum verður engin seinni sláttur,aðrir eru að heyja eða stopp þar til seinni sláttur hefst og slegin há.

Miklu minni heyföng eru í ár enn í fyrra en þá heyjaðist með besta móti.

Í Litlu-Ávík heyjaðist 52.rúllum minna en í fyrra.Á Kjörvogi var sennilega lélegasta sprettan enn þar eru um hundrað rúllum minna enn í fyrra.

Sigursteinn Sveinbjörnsson bóndi í Litlu-Ávík létu þau á Kjörvogi heyja 44 rúllur á hjáleigunni á Reykjanesi,enn óvenju miklar fyrningar voru í Litlu-Ávík eftir frá í fyrra.

Bændur telja þó ekkert heyleysi verða í hreppnum því flestir eiga talsverðar fyrningar frá því í fyrra og margir slá aftur seinni slátt það er há.

Vestfjarðaferð Fornbílaklúbbs Íslands.

Vikuna 23 til 30 júlí standa félagar úr fornbílaklúbbi íslands fyrir stórferð um Vestfirði.

Félagar úr klúbbnum munu keyra saman frá félagsheimili sínu við Rafstöðvarveg í Reykjavík kl.14.00 föstudaginn 23.júlí. 

Stefnan verður tekin á Hólmavík þar sem gist verður fyrstu nóttina. 

Á Laugardeginum munu bílarnir  verða á ferð um strandir og koma við í Djúpuvík og enda um kvöldið í Reykjanesi við Ísafjarðardjúpi.

Sunnudagurinn 25.júlí verður tekin í að aka norður Djúpið og endað í Bolungavík með viðkomu á Súðavík og Ísafirði. 

Mánudagurinn 26.júlí fer í að aka suður að Þingeyri þar sem gist verður næstu nótt, með viðkomu á Suðureyri og Flateyri.

Næsta dag verður ekið suður til Patreksfjarðar með viðkomu á Bíldudal og Tálknafirði. 28.júlí verða félagarnir svo á ferð frá Patró að Flókalundi. 

Síðasta daginn verður ekin Barðaströndin að Bjarkalundi og Reykhólum.

 

Frekari upplýsingar er að finna á fornbill.is

Ákveðið hefur verið að ráða Ingibjörgu Valgeirsdóttir sveitarstjóra Strandabyggðar næsta kjörtímabil. Ingibjörg starfar nú sem framkvæmdastjóri í eigin fyrirtæki Assa - þekking & þjálfun. Ingibjörg hefur lokið MBA námi við Háskólann í Reykjavík og er með BA próf í uppeldis- og menntunarfræðum. Hún hefur m.a. unnið við starfsmanna- og stjórnendaþjálfun og séð um framkvæmdastjórn í verkefnum á borð við hvatningarátakið Til fyrirmyndar og Stefnumót á Ströndum. Ingibjörg hefur mikla reynslu af vinnu með ungu fólki í vanda og var um tíma forstöðumaður unglingasmiðjunnar Stígs.

Ingibjörg kemur til starfa í september, en þangað til sjá oddvitar Strandabyggðar um framkvæmdastjórn í sveitarfélaginu.
Ingibjörg Valgeirsdóttir er frá Árnesi 2 í Trékyllisvík hér í Árneshreppi. 
Þetta kemur fram á vef Strandabyggðar.