„Ég get ekki neitað því að mér hafi verið farið að kólna, en það er allt í lagi, maður fór bara í meiri föt," sagði Ágústa Sveinbjörnsdóttir í viðtali við RÚV í gær sem býr í kaupfélagshúsinu í Norðurfirði. „Það gleymdust bara áramótin, það voru engin áramót." Rafmagn er nánast allstaðar komið á aftur eftir mikil vandræði um helgina. í fyrrakvöld komst það á í Árneshreppi á Ströndum - þá voru þrír og hálfur sólarhringur frá því að rafmagnslaust varð þar um slóðir. Ágústa segir að fólk hafi gengið um til að halda á sér hita og notað prímus til að hella upp á kaffi - þau voru hins vegar kát í fyrrakvöld, þegar rafmagnið komst á aftur. Þetta kom fram á RÚV í gær.