Leitir í Árneshreppi hefjast um næstu helgi.

Hinar hefðbundnu leitir hefjast hér í Árneshreppi helgina 8 og 9 september,og eru það tveir leitardagar.
Er þá byrjað á norðursvæðinu föstdaginn 8 september,er þá leitað svæðið norðan Ófeigsfjarðar og komið í Ófeigsfjörð um kvöldið,fé er haft í girðingu þar yfir nóttina.
Síðari daginn laugardaginn 9 september er leitað frá Ófeigsfirði og fjalllendið austan Húsár að Reykjarfjarðartagli um Sýrdal og Seljaneshlíð út með Glifsu,um Seljárdal og Eyrardal,að Hvalhamri yfir Eyrarháls og réttað í Melarétt.

Laugardaginn 16 september er leitað Reykjarfjarðarsvæðið.Er þá
leitað frá Skarðagili fram að Reykjarfjarðartagli.
Og austan meigin er leitað frá Búrfelli út Kjósarfoldir og með Háafelli til sjávar að Kleyfará.
Réttað er í Kjósarrétt í botni Reykjarfjarðar.

Bændur hafa nú undanfarna daga verið að smala heimalönd sín og verða að vera búnir að því fyrir hinar skipulögðu leitir(skylduleitir).
Einnig verða bændur að vera búnir að smala frá Kaldbaksvík til Veiðileysufjarðar fyrir leitirnar 16 september.
Í heimasmölunum vantar alltaf fólk en í hinum skipulögðu leitum kemur yfirleitt mikið af sjálfboðaliðum jafnvel útlendingar.