Sjó skefur mikið í svona aflandsvindi.

Það er búin að vera suðvestlæg vindátt nú síðustu daga oft hvöss hér í Litlu-Ávík, enn aldrei eins og í gærkvöldi frá því um ellefu leitið (23:00) og fram yfir miðnættið nú fram til að verða tvö í nótt. Vindur var suðsuðvestan 44 hnútar til 48 og kviður upp í 74 hnúta, það er vindur í jafnavind frá stormstyrk og í kviðum uppí 38 m/s eða langt yfir gömlu 12 vindstigin. Veðurathugunarmaður hafði samband við vakthafandi veðurfræðing sem gerði nú ekki mikið úr þessu í fyrstu, en bætti síðan við í athugasemd veðurfræðings, að stormur gæti orðið á Ströndum um tíma. Veðurathugunarmanni fannst það nú alveg lágmark. En svo núna þegar þetta er skrifað stendur vindmælir yfirleitt í 34 til 40 hnútum og kviður í um 61 hnút. Það er svona kannski að verða svefnsamt.