Veðurstofan varar við stormi um landið norðan- og vestanvert á morgun. Gert er ráð fyrir vaxandi norðaustanátt með snjókomu á Vestfjörðum í nótt og víða stormur (norðan 20-25 m/s) þar í fyrramálið. Einnig er búist við stormi (18-23 m/s) með snjókomu við Breiðafjörð og á Norðurlandi vestra um og eftir hádegi. Vegfarendum er bent á að færð og skyggni getur versnað hratt og ekkert ferðaveður verður á norðvestanverðu landinu á morgun. Eins getur orðið varhugavert að vera á ferð við fjöll vestantil á landinu. Heldur fer að draga úr vindi þegar líður á laugardaginn, fyrst vestast á landinu. Veðrið er enn að þróast og er fólk beðið að fylgjast vel með veðurspám.