Furðuleikar á Ströndum.
Fréttatilkynning frá Sauðfjársetrinu:
Sauðfjársetur á Ströndum heldur sína árlegu Furðuleika sunnudaginn 29. júní og hefjast þeir kl. 13:00. Leikarnir fara fram á Sævangsvelli við Steingrímsfjörð og eru lokapunkturinn á bæjarhátíðinni Hamingjudögum á Hólmavík, en þetta er í ellefta skipti sem Furðuleikarnir fara fram. Á Furðuleikum er keppt í ýmsum skringilegum íþróttagreinum sem eiga það sameiginlegt að vera afbragðs skemmtun og hafa ekki hafa hlotið viðurkenningu Alþjóða Ólympíunefndarinnar. Meðal þess sem fólk getur prófað á Furðuleikum er t.d. öskurkeppni, kvennahlaupi (þar sem karlarnir hlaupa um þrautabraut með konur sínar á bakinu), ruslatínsla, girðingastaurakast, farsímakast og fleira. Þá má einnig nefna sýningargreinina trjónufótbolta sem hefur notið gífurlegra vinsælda undanfarin ár.
Í kaffistofu Sauðfjársetursins verður geysilega veglegt hlaðborð á boðstólum að vanda. Sögusýningin Sauðfé í sögu þjóðar sem er fastasýning Sauðfjársetursins verður opin að vanda, einnig eru sýning á listasviðinu sem ber yfirskriftina Álagablettir, í kaffistofunni er sýningin Allt á kafi - snjóaveturinn 1995 og í sérsýningarherbergi safnsins er sýningin Hagleiksmaðurinn Þorsteinn Magnússon. Aðgangur að öllum sýningum er ókeypis í tilefni dagsins og sama gildir um furðuleikana sjálfa.
Alls engar kröfur eru gerðar til keppenda um færni, þol eða fyrri reynslu í íþróttum og yfirleitt er lítið um verðlaun önnur en heiðurinn af því að sigra í keppnisgreinum og ánægjan af því að taka þátt. Þó er að venju farsími í verðlaun í farsímakastinu og er það glæsilegur snjallsími, Samsung Galaxy Ace3, sem Síminn gefur. Skráning í keppnisgreinar fer fram á staðnum.
