Síðasta flug á Gjögur í bili.
Í gær var síðasta áætlunarflug Ernis á Gjögur, því flugbrautinni verður lokað klukkan sex að morgni næsta mánudag 22. júní. Áætlun lokunarinnar á Gjögurflugvelli er fram til 16 ágúst næstkomandi. Auðvitað getur þessi áætlun breyst en það verður að koma í ljós síðar, þegar framkvæmdir eru vel á veg komnar. Ekki gat nú flugfélagið Ernir flogið þessa síðustu áætlun á réttum tíma í gær. Áætlunin var í fyrstu í gær klukkan 12:30 úr Reykjavík, á einni af 19 sæta vélum þeirra, sem er rétt áætlun, en um tvöleytið var því breytt í litlu einshreyfils vélina og þá úr Reykjavík um 15:45, en því seinkaði stöðugt og loks kom sú litla einna hreyfla um 17:40. Við erum að vona hér íbúar í Árneshreppi að við þurfum ekki að vera í þriðja til fjórða sæti eftir að flugbrautin er orðin malbikuð og fín til lendingar fyrir hvaða 20 til 50 manna vélar sem eru í notkun. Enn þessi seinkun í dag var útskýrð af Ernum út af góðu veðri og það þurfti að nota allar vélar í útsýnisflug auk annars áætlunarflugs. Ernir hafa líka áætlunarflug á Gjögur og það bara einu sinni í viku á sumrin, og hefðu nú átt að sinna þessu síðasta flugi vel og á réttum tíma.
