Ökumenn eru beðnir um að fara varlega þar sem fjárrekstur er.

Nú fer tími sauðfjársmölunar í hönd. Rétt er að minna, bæði smala og ökumenn, á að gæta varúðar og sýna gagnkvæma tillitssemi svo allt fari vel. Þannig er mikilvægt að þeir smalar sem nota ökutæki á vegi hagi akstri í samræmi við umferðarlög þannig að umferð gangi greiðlega fyrir sig. Sömuleiðis er mikilvægt að ökumenn sem leið eiga framhjá sauðfé í rekstri dragi tímanlega úr ökuhraða og sýni fé og smölum tillitssemi.

Lögreglunni hafa borist, í gegnum tíðina, kvartanir frá smölum um að ökumenn aki oft á tíðum hratt framhjá, þrátt fyrir að safn sé komið að vegi og smalar í kring, jafnvel noti bílflautu til að reka fé frá. Þá hafa borist kvartanir um að smalar hagi akstri sínum á vegum með aðfinnsluverðum hætti, s.s. aki á öfugum vegarhelmingi eða stöðvi ökutæki á miðjum vegi sem dæmi má nefna.

Gangkvæm tillitssemi er farsælust í umferðinni sem og öðrum samskiptum samborgaranna.