Verið að flytja áburð.
Fyrsta ferð með áburð kom á föstudaginn var, þegar (Bylli) Björn Sverrisson kom með eina ferð á dráttarbíl með tengivagni í Árnes og til Mela. Nú í dag var svo komið með áburð á Kjörvog og til Litlu-Ávíkur og á Steinstún og þetta því restin af áburði í Árneshrepp. Bændur panta áburðinn yfirleitt í gegnum Kaupfélag Steingrímsfjarðar á Hólmavík, og er innifalið í verðinu að hann sé fluttur heim til bænda. Vegurinn er nokkuð góður og engar þungatakmarkanir á vegi númer 643. veginum norður í Árneshrepp. Þetta er svona í fyrrafallinu sem hægt er að flytja áburðinn norður til bænda frá Hólmavík, en áburðurinn kom þangað með skipi 23. apríl. Oft er ekki hægt að koma áburðinum norður fyrr en svona um miðjan maí út af þungtakmörkunum og bleytu á veginum norður. Þetta minnir alltaf á að vorið og sumarið eru í næsta leiti.
