Í liðinni viku voru þrír ökumenn stöðvaðir fyrir of hraðann akstur innan bæjar á Ísafirði, þar sem hámarkshraði  er 35 km/klst. Einn ökumaður var stöðvaður grunaður um akstur undir áhrifum fíkniefna og annar stöðvaður vegna gruns um ölvun við akstur. Fimmtudaginn 28. nóv., kom upp eldur í flutningabifreið sem ekið var  um Þröskulda, þjóðveg 61, Djúpveg.  Slökkvilið frá Hólmavík var kallað á vettvang ásamt lögreglu. Bifreiðin var alelda þegar slökkviliðið kom á vettvang og nokkuð greiðlega gekk að ráða niðurlögum eldsins. Bifreiðin gjörónýt og færð af vettvangi með krana. Eldsupptök eru ókunn.

Enn og aftur vill lögregla kom á framfæri ábendingum til foreldra og forráðamanna barna og unglinga um notkun endurskinsmerkja og mikilvægi þeirra og sama á við um hjólandi vegfarendur.  Svartasta skammdegið fer í hönd, því eru þessir öryggisþættir svo mikilvægir. Þá er einnig rétt að benda ökumönnum/umráðamönnum ökutækja á að yfirfara ljósabúnað ökutækja sinna og mikilvægi þess að þessi búnaður sé ávallt í lagi, ekki síst á þessum árstíma.