Eftir nokkra rigningardaga nú í júlímánuði er vatn farið að síast neðri jarðveginn og í gegnum malarefni sem hreinsar vatnið áður enn það fer í safntunnur sem fer síðan í birgðatank. Í Litlu-Ávík var alveg vatnslaust frá 5 júní og fram til 8 júlí eða í rúman mánuð,eftir það hefur verið hægt að nota svolítið neysluvatn en ekki er það nóg til þvotta enn. Á Gjögri hefur einnig verið vatnslaust eða mjög lítið vatn í sumarhúsum þar. Það er alveg furðulegt að sjá hvað jörðin hefur verið orðin þurr eftir rigningu nú um helgina sjást ekki pollar nema á vegum og það kemur ekkert í lækjarfarvegi ennþá,jörðin drekkur allt í sig. Eldri menn muna ekki eftir svona þurrkum svo lengi,mýrar sem rétt er hægt að ganga í stígvélum á sumrin eru svo þurrar að gúmmískór blotna ekki á sólunum.  Á veðurstöðinni í Litlu-Ávík er úrkoman orðin í júlí um 30 mm. Einhverri úrkomu er spáð áfram og þegar kemur fram í ágúst ætti úrkoman að aukast samkvæmt venju.