Björn (Bylli) og Siggi í Litlu-Ávík að taka áburðasekki af bílnum um kvöldmatarleitið í kvöld.

Nú undir kvöld kom fyrsti bíll með áburð til bænda í Árneshrepp. Í fyrstu ferð kom allur áburður til Sigursteins Sveinbjörnssonar bónda í Litlu-Ávík og til Björns Torfasonar bónda á Melum að hluta til. Björn (Bylli) Sverrisson er að flytja áburðinn þetta vorið fyrir Kaupfélag Steingrímsfjarðar á Hólmavík,hann reiknar með fjórum ferðum í viðbót næstu daga. Þetta er nokkuð snemma sem áburður er fluttur norður enda vegur norður orðinn þurr og góður yfirferðar fyrir alla bíla stóra sem smáa. Í fyrra aftur á móti var áburður seint fluttur norður vegna slæmrar færðar og jafnvel aurbleytu á vegum. Fyrsta ferð með áburð var ekki farin fyrr enn í lok maí í fyrra.