Áramótaveðrið fór nú ekki alveg eftir veðurspá,veður hékk hér úrkomulaust fram eftir degi í gær,en mjög var orðið úrkomusamt að sjá um hádegið og lágskýjað mjög. Um nónleitið byrjaði að slydda með köflum í hægri suðlægri vindátt í um eins til tveggja stiga hita og litlu úrkomumagni. En um miðnætti er komin ANA um 10 til 11 m/s í jafnavind,með snjókomu með hita um 0 stig. En rétt um það leyti sem Áramótaskaupið endaði í Ríkissjónvarpinu sást með köflum að Melum og að Krossnesi sem er í um 4,5 km fjarðlægð í beinni sjónlínu frá Litlu-Ávík,ekki sást til Norðurfjarðar frá því um nónleitið,en það er 6 til 7 km sjónlína eftir því hvort það sést í kaupfélagshúsin eða inn í botn fjarðarins. Bræðurnir í Litlu-Ávík skutu samt upp í þessu dimmviðri og auknum vindi. Enn þar sem þéttbýlla er í sveitinni eins og í Trékyllisvík hefur sést sæmilega á milli bæja,enda sáust bjarmar þaðan um miðnættið og stundum norðanað. Veðurstofan spáði í gær fyrir gamlársdag éljum eða snjókomu eftir miðnætti,en þarna má litlu muna,en samt skrýtið vegna þess að veðurathugunarmaður í Litlu-Ávík gefur upp litla slyddu og skýjahæð bara um 300 m.,bæði kl: 18:00 og 21:00. Og hinum megin við Húnaflóa á veðurstöðvum eru gefin upp él slydda eða snjókoma,sem er sama spásvæði. Það má bæta við að klukkan eitt í nótt var komin mikil snjókoma. Og í nótt hefur gert bullandi ísingu,því allt er ísað og sílað núna í morgun.