Trékyllisvík.Mynd J.K. Það fjölgaði um einn í Árneshreppi.

Hagstofa Íslands birti í morgun 22. desember, mannfjöldatölur 1.desember 2009. Íbúar á Vestfjörðum voru á þessum degi 7.363 og hafði þá fækkað um 11 frá 1. desember 2008, sem er um 0,15 % fækkun. Hlutfallsleg fækkun yfir landið í heild nemur um 0,7 %. Athygli vekur að erlendum ríkisborgurum fjölgar lítillega á Vestfjörðum á meðan þeim fækkar á landsvísu og á sama tíma fækkar lítillega íbúum með íslenskt ríkisfang á Vestfjörðum en fjölgar á landsvísu. Heilt yfir þá virðist sem hægt hafi mikið til á þeirri neikvæðu íbúaþróun á Vestfjörðum sem staðið hefur nær látlaust frá miðjum níuunda áratugnum.

Breytingar íbúafjölda eftir sveitarfélögum er ekki jöfn.Í Reykhólahreppi heldur fjölgun áfram frá fyrra ári og nemur nú 4,7 %, í Vesturbyggð fjölgar um 4,1 % sem er viðsnúningur á þróun mannfjölda frá fyrri árum, einnig fjölgar í Strandabyggð eftir fækkun undanfarinnar ára og fjölgun heldur áfram í Kaldrananeshreppi,og í Árneshreppi fjölgaði um einn.Hlutfallsleg fækkun er mest í Súðavíkurhreppi eða 4,7 % og í Ísafjarðarbæ,Tálknafirði og Bæjarhreppi er fækkun sem nemur um 2 % í hverju sveitarfélagi.Talið í íbúum fækkar mest í Ísafjarðarbæ eða um 63 íbúa og hefur fækkun þar aukist frá fyrra ári.Greining á íbúaþróun í Ísafjarðarbæ miðað við 1. desember s.l. liggur ekki fyrir, en miðað við búferlaflutninga þann 1. september, þá hafði fækkað um 78 íbúa, þar af 50 íbúar á Ísafirði,því má draga þá ályktun að hægt hafi á fækkun íbúa.Túlka má þessa þróun á ýmsa vegu en fljótt á litið má telja að íbúaþróun í Ísafjarðarbæ og þá sérstaklega á Ísafirði sé í takt við neikvæða þróun í stærri byggðakjörnum landsins.Leita má skýringa í að samsetning atvinnulífs á Ísafirði er í mörgu frábrugðin öðrum byggðakjörnum á Vestfjörðum, með meiri þjónustu, verslun og stjórnsýslu, þar sem störfum hefur fækkað hvað mest á landsvísu.Ítarlegri gögn um íbúaþróun á Vestfjörðum má finna hér.
Og einnig á vef Hagstofu Íslands hér.