Bæjarins besta.
Halldór Halldórsson, bæjarstjóri Ísafjarðarbæjar, segir að ekki verði lengur unað við núverandi raforkukerfi á Vestfjörðum. Hefur hann sent sérfræðingi í iðnaðarráðuneytinu fyrirspurn um það hvort 61. grein EES samningsins gæti nýst til að þoka áfram málefnum Hvalárvirkjunar í Ófeigsfirði á Ströndum. Greinin varðar aðstoð til að greiða fyrir þróun ákveðinna greina efnahagslífsins eða ákveðinna efnahagsvæða enda hafi hún ekki svo óhagstæð áhrif á viðskiptaskilyrði að stríði gegn sameiginlegum hagsmunum.

„Afhendingaröryggið er ekki upp á marga fiska og er tap samfélagsins metið á einar 500 milljónir kr. árlega vegna orkutaps og vinnutaps og tjóns á tækjum sem af því leiðir. Þetta er í algjörum ólestri og verður ekki leyst nema með einhvers konar hringtengingu rafmagns," segir í bréfi Halldórs um samskipti hans við sérfræðing ráðuneytis sem lagt var fyrir bæjarráð á dögunum. „Það sem virðist raunhæfasta lausnin til að bæta hér úr er virkjun Hvalár á Ströndum og lögn yfir Ísafjarðardjúp til Ísafjarðar. Það er a.m.k. mun ódýrari lausn en hringtenging sé miðað við skýrslu Landsnets. Þar er talað um 5-9 milljarða kr. lausnir."
Þetta kom fram á BB.ÍS í gær.
Nánar hér á bb.is