Á vefsíðu forsætisráðuneytisins er sagt frá því að haldnir verði átta „þjóðfundir" í öllum landshlutum á tímabilinu 30. janúar til 20. mars. Fundirnir eru hluti af sóknaráætlun 20/20 þar sem ætlað er að ná fram samstöðu um lykilákvarðanir og framtíðarsýn fyrir atvinnulíf og samfélag sem skili okkur til móts við bjartari og betri tíma eins hratt og örugglega eins og kostur er.  Þar munu koma saman fulltrúar landshlutanna, sérfræðingar og fulltrúar hagsmunaaðila ásamt jafnmörgum einstaklingum úr röðum heimamanna sem valdir verða með úrtaki úr þjóðskrá líkt og gert var fyrir Þjóðfundinn í Laugardalshöll yfir landið í heild. Búist er við 100 til 200 manns á hvern fund í landshlutunum.
Sjá nánar á vef Forsætisráðuneytisins.

Þriðjudaginn 19.janúar 2010 fór flugvél Landhelgisgæslunnar í eftirlits - og ískönnunarflug fyrir norðurlandi.
Kl.20:30 var komið að ísbreiðu út af Húnaflóa. Um var að ræða þéttar ísspangir og gisinn ís á milli.
Skip og bátar eru beðnir að fara með aðgát á svæðinu fyrir Horn og á Húnaflóasvæðinu.
Nú spáir Veðurstofan áframhaldandi Suðlægum eða Austlægum vindáttum fram yfir helgi í það minnsta,þannig að hafísinn ætti að færast enn frekar fjær landi.
Ískort er hér með þar sem Ingibjörg Jónsdóttir hjá JHÍ hefur sett inn ísinn eftir flug gæslunnar í gær.Annars skýrir kortið sig sjálft.
Hafísvef Jarðvísindastofnunar Háskóla Íslands má sjá hér.

Nú er fyrri hluti kosningar um Strandamann ársins 2009 á strandir.is að baki. Fjölmargar tilnefningar bárust, en í seinni umferð er kosið á milli þeirra þriggja sem flestar tilnefningar fengu. Þeir sem koma til greina sem Strandamenn ársins 2009 eru Áhöfnin á Grímsey ST-2 á Drangsnesi, Ingibjörg Valgeirsdóttir frá Árnesi í Trékyllisvík, og Sigurður Atlason á Hólmavík.  Umfjöllun um þá þrjá aðila sem eftir standa má sjá hér fyrir neðan, ásamt örstuttum sýnishornum af ummælum fólksins sem sendi inn tilnefningar.Nánar á www.strandir.is
Hægt er að kjósa með því að smella hér.

Landhelgisgæslan fór í ískönnunarflug á flugvél sinni TF-SIF mánudaginn 18. janúar. Sáust tvær ísspangir. Virðast þær hafa farið minnkandi og fjarlægst. Hafísinn var næstur landi um 8.5 sml út af Hornströndum.
;Að sögn Ingibjargar Jónsdóttur landfræðings hjá HÍ sem var með í flugi gæslunnar í gær,sást að ís hefði bráðnað talsvert og var ísinn gisinn víða,þótt þéttar spangir væru einnig;.
Ísjakinn sem var NNA af Reykjaneshyrnu er nú farin og hefur rekið í NV og er nú á milli Veturmýrarnes og Selskers og er að hverfa sjónum frá veðurstöðinni í Litlu-Ávík.
Nú er spáð Suðaustan eða Austanáttum næstu daga,þannig að hafísinn ætti að fjarlægjast Hornstrandir næstu daga.
Vefur Veðurstofu Íslands er www.vedur.is

Það hefur verið mikil þróun og uppbygging í ferðaþjónustu á Ströndum síðustu árin. Langt er þó síðan þjónusta við ferðafólk fór að skipta verulegu máli í atvinnulífi Strandamanna, en meðal þeirra sem hafa staðið vaktina hvað lengst eru hjónin Eva Sigurbjörnsdóttir og Ásbjörn Þorgilsson sem reka Hótel Djúpavík. Hótelið á 25 ára afmæli í ár og verður mikið um að vera af því tilefni í sumar. Vefurinn strandir.is tók nýverið viðtal við Evu Sigurbjörnsdóttir, hótelstýru á Hótel Djúpavík, sem var bjartsýn á framtíð ferðaþjónustunnar.
Viðtal vefsíðunnar Stranda má sjá hér í heild sinni.

Áætlað er að framlög Jöfnunarsjóðs sveitarfélaga til reksturs grunnskóla, nemi samtals um 5,9  milljörðum króna á árinu 2010. Samgöngu- og sveitarstjórnarráðherra hefur samþykkt tillögu ráðgjafarnefndar Jöfnunarsjóðs sveitarfélaga frá 8. janúar sl. um áætluð almenn jöfnunarframlög til reksturs grunnskóla. Auk  almenna jöfnunarframlagsins er um að ræða framlög vegna sérþarfa fatlaðra nemenda, framlög vegna sérstakrar íslenskukennslu nýbúa og önnur framlög  til reksturs grunnskóla.

Ráðgjafarnefndin leggur til að áætlun um úthlutun almennra jöfnunarframlaga til sveitarfélaga vegna reksturs grunnskóla á árinu 2010 nemi samtals 4.268 milljónum króna. Þar er meðtalin leiðrétting á áætluðu jöfnunarframlagi vegna ársins 2008, þar sem endanlegur álagningarstofn útsvars þess árs liggur nú fyrir.
Öll sveitarfélög á Vestfjörðum fá úr Jöfnunarsjóði sveitarfélaga nema Árneshreppur sem er í 550.þúsund í mínus.
Hér má sjá töflu yfir öll sveitarfélög.
Þetta kemur fram á vef Sambands Íslenskra Sveitarfélaga.

Ingibjörg Jónsdóttir hjá Jarðvísindadeild Háskóla Íslands fór með í flug Landhelgisgæslu í dag í ískönnunarflug og sendi vefnum tvær ljósmyndir sem hún tók og einnig eru hér með ískort frá henni sem byggt er á á ratsjármynd.
Vefurinn þakkar Ingibjörgu fyrir hennar myndir.
Staðsetningar og fjarlægðir úr ískönnunarflugi Landhelgisgæslu koma hér síðar á vefnum.

Hafístilkynning frá Litlu-Ávík athugun gerð kl-15:00.

Hafísjakinn sem tilkynnt var um í gær virðist á sömu slóðum og stendur þar sennilega á grunnsæfi.Staðsetning ca 4 til 5 km NNA af Reykjaneshyrnu  eða um 6 km A frá Selskeri.
Myndin tekin í dag,jakan ber í vindmælastaurinn og eða yfir heyrúllurnar sem eru fjær.
Sigrún Karlsdóttir á Hafísdeild Veðurstofunnar merkti með ör þar sem jakinn er.

Í vikunni sem leið var einn ökumaður kærður vegna gruns um ölvun við akstur í umdæminu.Tvö minniháttar umferðaróhöpp voru tilkynnt til lögreglu á Ísafirði.Sunnudaginn 17 var tilkynnt um umferðarslys á Holtavörðuheiðinni,að norðanverðu skammt frá Miklagili,þar hafði bíll oltið út af veginum og  farið tvær eða þrjár veltur,í fyrstu talaði að um einhver slys á fólki væri að ræða, en þegar komið var á vettvang kom í ljós að ökumaður og farþegar hans tveir hefðu sloppið án meiðsla.Bifreiðin var óökuhæf og fjarlægð með krana af vettvangi.

6 ökumenn voru kærðir  fyrir of hraðan akstur.  Aðfaranótt föstudags var tilkynnt um talsverðan reyk sem lagði frá togaranum Gunnbirni, sem lá við Ásgeirsbakka í Ísafjarðarhöfn,slökkvilið Ísafjarðarbæjar var kallað á staðinn.Ekki reyndist um eld að ræða,en reykurinn stafaði af bilun í miðstöðvarkerfi.

Landhelgisgæslu Íslands bárust eftirfarandi upplýsingar frá skipi kl 11:15 í dag:
Hafísrönd  liggur frá stað um 2 sml. Norður af Óðinsboða að stað um 3,5 sml ASA frá Horni, ( staður 66.26n 021.16v). Þaðan liggur ísröndin til NNA eins og séð verður. Stakir jakar vestan við ísröndina.

Tvær spangir ná til lands á svæðinu frá Óðinsboða, önnur útaf Smiðjuvík, staðir:  66.23n 021.59v og 66.25n 022.11v. Stakir jakar og dreifar sunnan og vestan við þessa línu.
Skipstjóri mælir ekki með ferðum skipa eða báta um svæðið nema í björtu.
Einnig er hafísfrétt frá Veðurstöðinni í Litlu-Ávík frá því kl 14:30.
Frekar lítill hafísjaki ca 4 til 5 km NNA af Reykjaneshyrnu eða um 6 km A af Selskeri,sést illa nema í nokkurri hæð frá sjó.
Síðan er hér mynd frá Jarðvísindastofnun Háskóla íslands,frá því kl-22:27 í kvöld,þar sem Ingibjörg Jónsdóttir hefur sett inn ísjaðarinn og staka jakann út af Reykjaneshyrnunni sem gefin var upp frá Veðurstöðinni í Litlu-Ávík.
Myndin skýrir sig sjálf.