Þá er Íslandsmeistaramótinu í hrútadómum 2010 lokið. Það er skemmst frá því að segja að mótið í ár var best sótti viðburðurinn í átta ára sögu Sauðfjársetursins og hrútadómanna, bæði hvað varðar gestafjölda og fjölda keppenda í hrútadómunum sjálfum. Samkvæmt nokkuð nákvæmri talningu má telja víst að meira en 400 manns hafi kíkt í Sævang yfir daginn. Þuklið sjálft var fært inn í tjald vegna mikillar rigningar sem féll á Strandir og nágrenni um morguninn, en veðurguðirnir skrúfuðu að mestu fyrir kranann eftir að mótshald hófst og veðrið var með miklum ágætum; heitt og milt en afar rakt.
Það var Bolvíkingurinn Elvar Stefánsson sem fór með sigur af hólmi í flokki vanra þuklara, en hann hefur keppt í þuklinu svo til frá upphafi og náði meðal annars öðru sæti árið 2005. Elvar hlaut því til varðveislu í eitt ár verðlaunagripinn Horft til himins sem er tileinkaður minningu Brynjólfs Sæmundssonar ráðunautar á Hólmavík, auk fjölda annarra verðlauna. Aðrir verðlaunahafar í vana flokknum hafa komið áður við sögu hrútadómanna, en Björn Torfason sem lenti nú í öðru sæti varð Íslandsmeistari árin 2003 og 2008 og Eiríkur Helgason hreppti titilinn árið 2004. Í flokki óvanra fór Keflavíkur/Hólmavíkurmærin Brynja Bjarnfjörð Magnúsdóttir með sigur af hólmi með aðstoð hinnar þriggja ára gömlu Emmu Ýr Kristjönudóttur á Hólmavík.
Meira

Þá er komið að vertíðarlokun á Kaffi Norðurfirði í Árneshreppi segir vertinn þar Einar Óskar Sigurðsson,lokað verður eftir dagskrá á sunnudagskvöld.

Á sunnudagskvöld verður síðasta dagskrá sumarsins með spilavist,vinningar verða í boði fyrir besta og versta árangurinn.

Einnig verður hellt uppá kaffi og klára á úr síðasta ölkútnum og borðaðir afgangar.

Að sögn Einars hafa yfir sexþúsund manns komið á Kaffi Norðurfjörð í sumar.

Dagskráin hefst klukkan tuttugu þrjátíu,sunnudagskvöldið 22.ágúst.

Nú þegar ferðamannatíminn er búin að mestu leyti  ætlar útibú Kaupfélags Steingrímsfjarðar á Norðurfirði að hafa opið aðeins eftir hádegi frá og með mánudeginum 23 ágúst,eða frá kl 13:00 til kl 18:00 alla virka daga.

Opið hefur verið í sumar um helgar í fjóra tíma eða frá eitt til fjögur,enn nú verður það í síðasta sinn um næstu helgi eða laugardaginn 21 og sunnudaginn 22.ágúst.

Samkvæmt fjallskilareglugerð Strandasýslu fyrirskipar hreppsnefnd Árneshrepps, fjallskil í

Árneshreppi árið 2010 á eftirfarandi hátt:

Leitarsvæði séu þrjú. Réttardagur á fyrsta leitarsvæði sé í Melarétt laugardaginn 11. september   2010 og af öðru og þriðja leitarsvæði í Kjósarrétt laugardaginn  18. september 2010

             SMÖLUN VERÐI HAGAÐ ÞANNIG:

                                             

FYRSTA LEITARSVÆÐI:

 

            Leitardagar séu tveir. Fyrri daginn, föstudaginn 10. sept. 2010, sé svæðið norðan

Ófeigsfjarðar leitað eftir því, sem þurfa þykir og komið að Ófeigsfirði um kvöldið. Síðari daginn,

laugardaginn 11. september, sé fjalllendið austan Húsár leitað, að Reykjarfjarðartagli um Sýrárdal

og Seljaneshlíð. Einnig skal leita svæðið út með Glifsu, um Seljadal og Eyrardal, að Hvalhamri. Féð verði rekið yfir Eyrarháls og réttað á Melum.

Meira

Nú er ferðamannavertíðinni lokið þetta árið hjá Sædísi ÍS sem hefur verið með ferðir frá Norðurfirði á Hornstrandir í sumar.Síðasta ferðin var farin þann 15 ágúst.
"Að sögn Reimars Vilmundarsonar var farþegaflutningur svipaður og í fyrra,gott veður til siglinga nema í byrjun júlí,þegar gerði tvívegis norðaustan brælu".
Framundan er hjá þeim á Sædísinni að breyta úr farþegabát í fiskibát,og áætlað er að fara á  veiðar á skötusel fram til mánaðarmóta.

Þann 1. september næstkomandi mun Síminn hætta rekstri NMT farsímakerfisins hér á landi.

Mikil uppbygging hefur átt sér stað á GSM og UMTS (3G) kerfum fjarskiptafélaganna á undanförnum árum en það eru þau kerfi sem taka munu við þeirri þjónustu sem NMT farsímakerfið hefur þjónustað hingað til á landi og sjó.

Þar sem eðli hinnar nýju þjónustu er á margan hátt annað en NMT þjónustunnar er næsta víst að einhver örfá svæði ná ekki sömu dekkun og áður, á hinn bóginn er ljóst að í heildina er dekkun GSM og 3G kerfanna miklum mun viðameiri en NMT kerfisins nokkru sinni var til lands og sjávar sé miðað við handsímaþjónustu.

PFS vill benda notendum NMT kerfisins á að hægt er að flytja númerin sem hafa verið í notkun í NMT kerfinu yfir í GSM eða 3G þjónustu fjarskiptafélaganna.
Segir í fréttatilkynningu frá Póst og Fjarskiptastofnun.

 

 

Aðfaranótt síðasta þriðjudags var brotist inn í sundlaugina í Bjarnarfirði og stolið þaðan kassa þeim sem heiðvirðir gestir laugarinnar greiða aðgangseyrir í. Nokkra fyrirhöfn hefur þurft til að ná kassanum en hann var bundinn með keðju í borð undir honum. Þjófunum hefur tekist að komast í gegnum lúgu þar í anddyrinu. Sundlaugin í Bjarnarfirði er rekin af Strandagaldri sem rekur einnig Galdrasafnið á Hólmavík og Kotbýli kuklarans. Krossviðskassinn er um það bil 15 cm í þvermál og 30 cm hár. Í honum hefur að öllu líkindum verið yfir 20 þúsund krónur, mest í smámynt. Þjófnaðurinn og innbrotið hafa verið kærð til lögreglunnar á Hólmavík sem fer með rannsókn málsins. Ef einhverjir hafa upplýsingar um mannaferðir í sundlaugina þessa nótt eru þeir beðnir um að snúa sér til lögreglunnar.
Þetta kom fram á www.strandir.is

Nú um næstu helgi eru hinir árlegu Djúpavíkurdagar 13.-15.ágúst.  Eins og venjulega verður fundið upp á ýmsu fyrir alla fjölskylduna.

Þar verða hverskyns tónleikar og listsýningar í gangi að venju.

Meðal annarra kemur hljómsveitin Hraun fram með Svavar Knút  í fararbroddi.

Í ár fagnar Hótel Djúpavík 25 ára afmæli sínu.Og var ýmislegt gert í dagskrá sumarsins vegna þessa tímamóta Hótels Djúpavíkur.

Ekta fjölskylduhátíð framundan á Hótel Djúpavík um næstu helgi.

 

Hér er svo dagskrá Djúpavíkurdaga:

Meira

Árið 1995 var sett upp veðurstöð í Litlu-Ávík með vindmælum fyrst stöðva í Árneshreppi á Ströndum,það er vindáttamæli og vindhraðamæli.

Fyrsta veðurskeyti barst frá veðurstöðinni klukkan átjánhundruð.(18.00.) þann 12 ágúst 1995.

Tæknimaður við uppsetningu var Elvar Ástráðsson ásamt strandamanninum og veðurfræðingnum Hreini Hjartarsyni,og dvöldu þeyr við uppsetningu í um tæpa fjóra daga,aðallega vegna kennslu í tölvukennslu fyrir veðursendingar,en þá var sent gegnum símalínu í þessum tölvum,og heimilissími úti á meðan. Jón G Guðjónsson hefur verið veðurathugunarmaður í Litlu-Ávík frá upphafi.

Veðurstöðin í Litlu-Ávík er útvörður veðurathuganna vestan megin Húnaflóa,en Hraun á Skaga austan megin flóans.

Vegna 15 ára starfsafmælis veðurstöðvarinnar er öllum velkomið að koma í Litlu-Ávík á milli klukkan 20:00 og 22:00 í kvöld,til að sjá veðurathugun tekna kl 21:00 og veðurskeyti sent.

Ákveðið hefur verið í samráði við stjórn Fjórðungssambands Vestfirðinga að boða til aðalfundar Menningarráðs Vestfjarða laugardaginn 4. september  næstkomandi, í framhaldi af Fjórðungsþingi Vestfirðinga. Fundurinn verður haldinn á Hólmavík og hefst kl. 15:00, en nánari staðsetning verður kynnt síðar. Samkvæmt samþykktum Menningarráðsins velja sveitarstjórnir á starfssvæðinu fulltrúa á aðalfundar Menningarráðs Vestfjarða og fara þeir með umboð viðkomandi sveitarstjórnar í samræmi við íbúafjölda viðkomandi sveitarfélags þann 1. desember árið áður.
Meira