Alls sóttu fjörutíu um starf sveitarstjóra í Strandabyggð, en umsóknarfrestur rann út í fyrradag. Umsækjendur koma úr ólíkum áttum, en í hópnum eru 9 konur og 31 karl. Framundan er vinna við að fara yfir umsóknir og ræða við umsækjendur, en Hagvangur sér um að vinna úr umsóknum ásamt Strandabyggð. Sveitarstjórn Strandabyggðar er ákaflega hamingjusöm yfir þessum fjölda umsækjenda og einnig yfir vel heppnuðum Hamingjudögum sem fram fóru nýliðna helgi.
Hér á vefnum strandir.is má sjá nöfn allra umsækjanda.

Talsverður erill var hjá lögreglunni á Vestfjörðum á helginni. Ferðamönnum fjölgar og þar með eykst umferðin. Átta umferðaróhöpp voru í umdæminu auk þess sem ekið var á 11 kindur og lömb. 8 ökumenn voru kærðir fyrir of hraðan akstur.  Sá er hraðast ók var á 138 km/klst þar sem 90 km/klst er leyfður.  Þrír ökumenn voru teknir fyrir meinta ölvun við akstur, einn á Ísafirði, annar á Hólmavík og sá þriðji á Patreksfirði. Bæjarhátíðirnar fóru engu að síður vel fram.  Það er einn og einn aðili sem ekki kann að skemmta sér án þess að kalla þurfi til lögreglu. Aðal erillinn var vegna þessa fámenna hóps.
Segir í fréttatilkynningu frá lögreglunni á Vestfjörðum.

Nú síðustu 3 daga hafa ferðum Sædísarinnar frá Norðurfirði á Hornstrandir raskast vegna veðurs.
Þann fyrsta á fimmtudag var Norðaustan allhvass vindur með talsverðum sjó,síðan hefur verið Norðvestan og Norðan kaldi og talsverður sjór.
Þó náðist að fara 2 ferðir í Reykjarfjörð á föstudag.
Á heimasíðu Reimars segir að fólk sem á bókað far sé beðið að hafa samband því brottfarir geti breyst meðan að veður er svona rysjótt.Og spáin er ekkert góð fram í vikuna.
Heimasíðan er www.freydis.is
Og síminn um borð er 852-9367 og 892-8267.
Og hjá Reimari er síminn 893-6926.Og hjá Hildi er síminn 861-1425.

Veðrið í Júní 2010.

Yfirlit yfir veðrið frá veðurstöðinni í Litlu-Ávík.

Fremur svalt í veðri fyrstu tvo daga mánaðar en síðan fór hlýnandi,enn heldur svalara seinni hluta mánaðar.Mjög þurrt var í mánuðinum og brunnu tún hjá bændum þar sem eru sendin tún.

Oft var þokuloft í mánuðinum.

Fjöll voru talin fyrst auð þann 18,í fyrra var það í lok mánaðar.

Yfirleitt voru bændur búnir að bera tilbúin áburð á tún um 10 dags mánaðar,tún tóku seint við sér vegna þurrkana,en hafa lagast mikið við þessa litlu vætu sem hefur komið.

Meira

Mígandi hamingja á Hólmavík!

Laglausi kórinn, léttmessa, hamingjulaup, hnallþórur, furðuleikarnir og fiskur á Hamingjudögum á Hólmavík 1 - 4 júlí.

 

Strandamenn eru ekki venjulegt fólk og því er það engin venjuleg dagskrá sem boðið verður upp á á Hamingjudögum Strandamanna sem haldnir verða á Hólmavík í sjötta sinn dagana 1. - 4. Júlí næstkomandi. Strandamenn eru sem betur fer ekki við hestaheilsu og því setja hrossasjúkdómar ekki strik í reikninginn þegar þeir ætla að gera sér glaðan dag.

Boðið er upp á gríðarlega fjölbreitta dagskrá þar sem grín og glens er í fyrirrúmi en þó fyrst og fremst helber hamingja enda er það vísindalega sannað að Strandamenn eru hamingjusömustu íbúar jarðarkringlunnar. Á Ströndum brosir hver einasti maður hringinn, og jafnvel einn og hálfan, hvernig sem viðrar og sama hvaða hörmungar dynja á heimsbyggðinni.

Meira

Á vef Póst og Fjarskiptastofnunar má sjá efirfarandi um notkun á neti og fleiru gegnum farsíma:
Íslendingar sækja minna af gögnum á Netið í gegn um farsíma og netlykla en aðrar þjóðir á Norðurlöndum og áskrifendur að gagnaflutningi um breiðband (e. mobile broadband) eru einnig fæstir hér miðað við höfðatölu  Á sama tíma er útbreiðsla DSL nettenginga (t.d. ADSL) mest hér á landi.

Þetta er meðal þess sem fram kemur í nýrri skýrslu þar sem bornir eru saman fjarskiptamarkaðir á Norðurlöndum.  Skýrslan var tekin saman af vinnuhópi um norræna tölfræði vegna fundar forstjóra fjarskiptaeftirlitsstofnananna á Norðurlöndunum.

Meira

Bæjarins besta.
Löng hefð er fyrir því á Vestfjörðum að taka heim yrðlinga og hafa heima yfir sumarið. Melrakkasetur Íslands í Súðavík fær einn slíkan í heimsókn af og til í sumar. Heitir hann Frosti og er núna um 6-7 vikna gamall. Hann er af hvítu litarafbrigði og hefur vakið mikla lukku. Af Melrakkasetri Íslands er það annars að frétta að nóg er að gera þar eftir að setrið var opnað. Hægt er að skoða húsið, sýningar og nú rebba litla en nánar má fræðast um setrið hér á vef Melrakkaseturs Íslands,
segir á www.bb.is

Vikan var frekar róleg hjá lögreglunni á Vestfjörðum. Bókanir undir flokknum EKIÐ Á BÚFÉ voru margar eins og fyrri vikur.  Núna voru það 15 ær og lömb sem ekið var á og drepið.

Fjögur minni háttar umferðaróhöpp urðu í vikunni. Eitt sker sig talsvert úr þar sem 7 Japanir voru á ferð og veltu bíl sínum.  Kona sem með var kvartaði undan verk í baki og var send á sjúkrahús. Með henni fór eini maðurinn sem kunni ensku. Þeir 5 sem eftir voru gátu því engan veginn bjargað sér, þar sem himinn og haf skildi á milli tungumála þeirra og lögreglu.Á endanum var sendiráð Japans komið með túlk í síma og tókst að skýra fyrir fólkinu framhald þeirra máls.

Hraðakstur var með minna móti og má kannski skýra það með mikilli umferð á vegunum svo þeim ökumönnum sem vilja láta gamminn geysa er erfitt um vik.

Kæra kom fram þar sem verið er að kæra stangveiði í sjó. Þar sem vegarð hefur brúað firði er ekki heimilt að stunda veiðar nema með sérstöku leyfi og þá með takmörkum laga um slíka veiði. Veiðimenn eru hvattir til að kynna sér þessi lög og þær reglur sem um slíka veiði gildir.
Þetta kemur fram í dagbók lögreglunnar á Vestfjörðum fyrir síðustu viku.

Talsverður ís er enn úti fyrir Húnaflóa  þrátt fyrir ríkjandi Norðaustanáttir úti fyrir,þótt NV eða N áttir hafi verið til landsins hér vestan til við flóann.Straumar virðast hafa betur í bili á rek íssins.
Ingibjörg Jónsdóttir hjá Jarðvísindastofnun Háskóla Íslands sendi vefnum þessar myndir í gærkvöldi,það eru gervitunglamyndir sem sína ísjaðarinn vel.

Í byrjun júní 2010 skrifuðu sautján aðilar, er koma að ferðaþjónustu á einn eða annan hátt, undir samstarfssamning í Krýsuvík um öryggismál ferðamanna.

Slysavarnafélagið Landsbjörg hefur á undanförnum árum beitt sér í auknum mæli að öryggismálum ferðamanna, til dæmis með Hálendisvakt björgunarsveitanna. Í ár var ákveðið að ganga skrefinu lengra og efla forvarnir með því að ná saman flestum þeim er koma að öryggi ferðafólks. Leitað var til félagasamtaka, fyrirtækja og stofnana í þeim tilgangi að nýta betur fjármuni, þekkingu og reynslu þeirra.

Þessir aðilar hafa sameinast um einn vettvang þar sem allar upplýsingar um örugga ferðamennsku eru aðgengilegar. Sá staður er vefsíðan www.safetravel.is ásamt blaði með sama nafni. Þar eru upplýsingar um margs konar útivist, íslenska náttúru og veður. Jafnframt verða tenglar inn á landakort, færð á vegum, veðurhorfur, afþreyingu og fleira.
Nánar hér á vef Veðurstofu Íslands.