BB.ÍS.
Það er að mínu mati reginhneyksli hvernig ástatt er fyrir ferðaþjónustunni á Vestfjörðum", segir Sigurður Atlason, formaður Ferðamálasamtaka Vestfjarða við fréttamann BB, þegar hann er spurður út í grein Rúnars Karlssonar  á bb.is (Aðsendar greinar: Lok lok og læs ...). „Þegar um er að ræða fyrirtæki í þjónustugreinum, hvort sem við erum að tala um grunnþjónustu eins og mat eða afþreyingu eins og bátsferðir og söfn, þá ætti enginn að komast upp með að fleyta eingöngu rjómann ofan af ferðaþjónustunni og hafa ekki úthald í að klára allavega það tímabil sem við höfum verið að fjalla um undanfarin mörg ár. Það þarf að lengja ferðaþjónustutímabilið og það er alveg ljóst að það gengur ekki að loka um miðjan ágúst eða opna staði þegar liðið er á júnímánuð. Þetta er málefni sem Ferðamálasamtökin geta raunar kannski lítið gert í annað en að reyna að ná til aðila innan samtakanna", segir Sigurður við BB.

"Og árfam segir Sigurður„Maður veltir því fyrir sér í leiðinni hvort við þurfum einfaldlega að hægja á okkur í markaðsmálum og fara að huga á ný, eins og fyrir tíu árum, að innviðum ferðaþjónustunnar. Þetta sem komið er upp á núna á þessu hausti er út um alla Vestfirði. Þetta er að gerast um allar Strandir, á suðursvæðinu, á norðursvæðinu og alls staðar hringinn í kringum Vestfjarðakjálkann, að staðir hafa verið að loka þegar vika er eftir af ágústmánuði og jafnvel fyrr og skilja eftir í uppnámi þá sem ætla sér að halda þjónustunni lengur áfram. Þetta á bæði við um grunnþjónustuna, veitingarnar, og hvers kyns afþreyingu. Ef menn ætla að haga sér svona verður það einfaldlega til þess að það verður aldrei litið á ferðaþjónustuna sem alvöru atvinnugrein."
Spurning fréttamanns BB"
- Hefurðu einhverja von um að þetta geti breyst á allra næstu árum?

„Nei, ég á enga sérstaka von á því. Það er ekki í fyrsta sinn sem þetta er að gerast. Vissulega hefur verið óvenjulega mikill fjöldi ferðamanna á Vestfjörðum á þessu ári en þetta er búið að vera vandamál til margra ára. Það hefur verið haft orð á þessu hvert einasta haust að það sé fulllangt gengið að verið sé að loka um miðjan ágúst og hafa ekki opið allavega út ágústmánuð og fram í september. En það hefur ekkert breyst. Það hefur ekki nokkur skapaður hlutur breyst í ferðaþjónustu á Vestfjörðum nema að við erum búin að fá Markaðsstofuna sem heldur merkjum ferðaþjónustunnar á lofti og hvetur fólk til að koma hingað á svæðið. Það gengur sannarlega vel. En við hin sem erum að starfa í ferðaþjónustunni högum okkur mörg hver einfaldlega eins og fífl."
Nánar hér á www.bb.is

Veðrið í Ágúst 2009.

Yfirlit yfir veðrið frá Veðurstöðinni í Litlu-Ávík.

Mest voru norðlægar áttir ríkjandi í mánuðinum hægur vindur framanaf en oftast kaldi síðari hluta mánaðar,en sæmilegur hiti oftast nema síðusu dagana og í kuldakastinu 20 til 21 ágúst og þá gránaði í fjöll.

Mánuðurinn var talsvert úrkomusamur fyrstu vikuna,síðan úrkomulítið fram undir 19,þá nokkuð úrkomusamt aftur út mánuðinn.

Hafíshrafl sást í mánuðinum.

 

Yfirlit dagar vikur.

1-4:Norðan eða NV kul gola eða stinningsgola,rigning eða súld,hiti 6 til 10 stig.

5:Norðaustan stinningskaldi,norðlægur um kvöldið með stinningsgolu,rigning og súld,hiti 9 til 11 stig.

6-9:Breytilegar vindáttir kul eða gola,súld síðan smá skúrir,hiti 10 til 17 stig.

10-18:Norðlægar vindáttir,kul,gola eða stinningsgola,lítils háttar súld eða skúrir með köflum,hiti 7 til 13 stig.

19:Norðaustan og A,kaldi uppí alhvassan vind rigning,hiti 8 til 10 stig.

20-21: Norðan allhvass síðan NV allhvass og vindur gekk niður um hádegi,talsverð rigning,hiti 3 til 10 stig.

22:Breytileg vindátt gola eða stinningsgola,skúrir,hiti 6 til 14 stig.

23-31:Norðlægar vindáttir gola,stinningsgola en stinningskaldi 28 og 29,síðan kaldi út mánuðinn,rigning eða þokusúld,hiti 5 til 12 stig.

Úrkoman mældist:131,1 mm (í ágúst 2008:52,4 mm).

Þurrir dagar voru 3.

Mestur hiti mældist 17,0 stig þann 7.

Minnstur hiti mældist 3,1 stig þann 21.

Meðalhiti við jörð var:+6,89 stig (í ágúst 2008:+5,59 stig)

Sjóveður:Var ágætt nema þann 5 og nokkuð rysjótt frá 19 og út mánuðinn.

Tekið saman af Jóni G Guðjónssyni veðurathugunarmanni í Litlu-Ávík.
 Munið eftir yfirliti yfir veðrið lengra aftur í tímann hér á síðunni til vinstri.

Atvinnu- og menningarsýningin Stefnumót á Ströndum var opnuð í gær á Hólmavík við hátíðlega athöfn. Mikið var um dýrðir, en yfir 60 aðilar á Ströndum tóku þátt í sýningunni, fyrirtæki, stofnanir og félög. Hefur mikil vinna verið lögð í að setja upp sýningarbása í félagsheimilinu á Hólmavík þar sem Strandamenn kynna allt það besta sem þeir hafa upp á að bjóða í atvinnulífi, menningarstarfi og mannlífi, á fjölbreyttan og fróðlegan máta.

Forseti Íslands, Ólafur Ragnar Grímsson sem er verndari sýningarinnar, hélt hátíðarræðuna í tilefni dagsins, en einnig fluttu heimamenn á öllum aldri tónlistaratriði á hátíðardagskránni, kveðnar voru lausavísur, lesin vinakveðja úr Reykhólasveit. Einnig hélt Jón Bjarnason landbúnaðar- og sjávarútvegsráðherra ræðu.

Meira

Fréttatilkynning.
Í framhaldi af hátíðardagskrá Stefnumóts Strandamanna á Hólmavík laugardaginn 29. ágúst, þar sem meðal gesta verða félagsfólk úr byggðasamtökunum Landsbyggðin lifi (LBL) verður haldinn aðalfundur LBL 2009 í Galdrasetrinu sunnudaginn 30. ágúst  kl. 11:00 og verður dagskráin auk venjulegra aðalfundarstarfa þessi:

• Heimamenn á Ströndum kynna sína grasrótarstafsemi
• Einar Vilhjálmsson, markaðsstjóri hjá Metani hf. flytur erindi um notkunarmöguleika metans sem innlends orkugjafa
• Sveinn Jónsson frá Kálfskinni innleiðir umræður um nýjar áherslur og hugmyndir á ýmsum sviðum á landsbyggðinni.

 Einar mætir á staðinn á bíl sem gengur fyrir metani og verður hann fundargestum til sýnis og mun Einar kynna fyrirbærið eftir þörfum.

 
Athugið að fundurinn er öllum opinn.

Forseti Íslands, Ólafur Ragnar Grímsson, og frú Dorrit Moussaieff, mæta á atvinnu- og menningarsýninguna Stefnumót á Ströndum sem opnuð verður á morgun. Sýningin opnar í Félagsheimilinu á Hólmavík kl. 13:00 laugardaginn 29. ágúst, en hátíðardagskrá hefst kl. 14:00 og flytur Ólafur Ragnar hátíðarræðu við það tilefni. Aðstandendur sýningarinnar vilja biðja Strandamenn að flagga í tilefni dagsins og minna þátttakendur og gesti jafnframt á að mæta með stein til að nota í vörðu til framtíðar, sem hlaðin verður í tilefni dagsins af fjórum ættliðum Strandamanna við Félagsheimilið.  
Þetta kemur fram á www.strandir.is.

Afar fjölmennt var á Landsmóti í hrútadómum sem fram fóru í sjöunda skipti í frábæru veðri á Sauðfjársetrinu í Sævangi laugardaginn 22. ágúst. Tæplega 50 manns tóku þátt. Strandamaðurinn Guðbrandur Björnsson á Smáhömrum stóð uppi sem sigurvegari í flokki vanra þuklara, en hann hefur oftsinnis verið í öðru eða þriðja sæti á mótinu undanfarin ár. Í öðru sæti var Halldór Olgeirsson á
Bjarnastöðum í Öxarfirði og í því þriðja varð Gunnar Steingrímsson í Stórholti í Fljótum. Í flokki óvanra fór Barbara Guðbjartsdóttir í Miðhúsum í Kollafirði með sigur af hólmi.
Úrslitin í keppninni voru sem hér segir:

Í flokki óvanra hrútaþuklara:
1) Barbara Ósk Guðbjartsdóttir, Miðhúsum í Kollafirði
2) Steinar Baldursson, Odda í Bjarnarfirði
3) Alda Ýr Ingadóttir, Kaldrananesi í Bjarnarfirði

Í flokki vanra hrútaþuklara:
1) Guðbrandur Björnsson, Smáhömrum í Tungusveit
2) Halldór Olgeirsson, Bjarnastöðum í Öxarfirði
3) Gunnar Steingrímsson, Stórholti í Fljótum

 

Hrútarnir sem voru dæmdir voru þeir Sólon, Freri, Hvinur og Gutti, en allir eru þeir í eigu Jóns Stefánssonar á Broddanesi utan þess síðastnefnda sem Reynir Björnsson í Miðdalsgröf á. Það voru 24 sem kepptu í óvana flokknum en 22 tóku þátt í flokki hinna vönu. Verðlaun voru afar vegleg, en m.a. fengu sigurvegararnir í vana flokknum 5, 10 og 15 skammta af hrútasæði frá Sauðfjársæðingarstöð Vesturlands. Margir aðrir vinningar voru einnig fyrir keppendur eins og bók Bjarna Guðmundssonar "Og svo kom Ferguson", vinnugallar og veggspjöld frá Bændasamtöku Íslands, úttektargjafabréf, höfuðföt og minjagripir frá Sauðfjársetrinu. Guðbrandur Björnsson hlaut einnig til varðveislu í eitt ár verðlaunagripinn Horft til himins sem er tileinkaður minningu Brynjólfs Sæmundssonar ráðunautar

Stefnumót á Ströndum, atvinnu- og menningarsýning verður opnuð við hátíðlega athöfn laugardaginn 29. ágúst í Félagsheimilinu á Hólmavík.  Yfir 60 sýningaraðilar, fullorðnir og börn,  allt frá Hrútafirði, norður í Ófeigsfjörð og yfir í Djúp, taka þátt í sýningunni sem er bæði fjölbreytt og fróðleg. Forseti Íslands, herra Ólafur Ragnar Grímsson, er verndari sýningarinnar.
Meira

Nú er ljósmyndasýningin NV Vestfirðir enn og aftur lögð af stað í ferðalag og er stefnan tekin á Stefnumót á Ströndum í félagsheimili Hólmavíkur næstkomandi laugardag 29. ágúst. Sýndar verða 6 myndir prentaðar á striga og aðrar 10 myndir sem prentaðar eru á hefðbundinn ljósmyndapappír. Er þetta 4 viðkomustaður áhugaljósmyndarans Ágúst G. Atlasonar á Vestfjörðum en eins og áður hefur komið fram að þá hlaut Ágúst styrk frá Menningarráði Vestfjarða til að fara með þessa sýningu vítt og breytt um vestfirði. Fyrri viðkomustaðir sýningarinnar eru Ísafjörður, Norðurfjörður og Tálknafjörður.

Bifreiðaskoðun.

Samkvæmt tilkynningu frá Frumherja HF,verður seinni skoðun á Hólmavík dagana 1 til 2 september 2009.
Færanlega skoðunarstöðin verður þar stödd þessa daga.

Engin skoðun verður á Borðeyri hné á Reykhólum og er vísað á nýja stöð í Búðardal.

Færanlega skoðunarstöðin er nú beintengd við ökutækjaskrá og því hægt að afla allra upplýsinga og ganga frá viðskiptum eins og í fastri skoðunarstöð.

Tekið er á móti öllum greiðslukortum(kredit og depet).

Hvorttveggja er háð því að að gsm-samband sé í lagi.

Símin í skoðunarbílnum er 854-4507.

 

Einnig skal minnt á nýja stöð við Smiðjuvelli 17 á Akranesi(við hliðina á Bónus),þar er opið alla virka daga frá kl 08:00 til kl 16:00(lokað í hádeginu).

Tímapantanir þar eru í síma 570-9202 stöðin eða 570-9090 þjónustuver.

Út er komin skýrsla starfshóps um endurskoðun á starfsemi landshlutasamtaka sveitarfélaga.  Það er ánægjulegt að starfshópurinn kemst að þeirri niðurstöðu að starfsemi landshlutasamtaka sveitarfélaga sé mikilvæg , ekki síst í því samhengi að efla byggðþróun og samþætta opinberar áætlanir og stefnur. 

Á vef Samgöngurráðuneytis segir siðan um efni skýrslunnar, 

Starfshópur sem samgönguráðherra skipaði í nóvember 2008 um endurskoðun á starfsemi landshlutasamtaka sveitarfélaga hefur skilað skýrslu. Meðal niðurstaðna hópsins er að nauðsynlegt sé að efla byggðaþróun í landinu og samþætta opinberar áætlanir og stefnur.

Í starfi sínu lagði hópurinn áherslu á að greina stöðu og hlutverk landshlutasamtakanna og skoðað var um leið annað svæðisbundið samstarf meðal annars til að meta hvort þörf væri á að samþætta það betur við samstarf sveitarfélaga, gera það skilvirkara og nýta fjármuni betur.

Meira