Í síðastliðinni viku urðu 6 umferðaróhöpp í umdæmi lögreglunnar á Vestfjörðum.  Miðvikudaginn 4. mars varð minniháttar umferðaróhapp á Ísafirði, sem rekja má til ófærðar og einnig á fimmtudag þar sem bakkað var á bíl á Ísafirði.  laugardaginn 7. mars varð bílvelta í tungudal í Skutulsfirði, þar hafnaði jeppi út fyrir veg og má rekja óhappið til aðstæðna, blint og hálka á vegi.  Tvö önnur umferðaróhöpp urðu einnig á þessum sólahring.  Í Tálknafirði rann mannlaus bíll úr bílastæði við hús við Móatún, rann yfir götuna og hafnaði úti í móa.  Engan sakaði og óverulegar skemmdir á bílnum.  Þá hafnaði bíll utanvegar í Álftafirði, engin slys á fólki og bíllinn lítið skemmdur.  Kl. 19:15 á sunnudag 8. mars  var tilkynnt til lögreglu um bílveltu í Ennishálsi á Ströndum, þar valt flutningabíll á hliðina og lokaði veginum, veður og aðstæður mjög slæmar á vettvangi.  Björgunarsveit kom þar til aðstoðar og þurfti að fá kranabíla úr Reykjavík til að koma bílnum á hjólin aftur og var því verki ekki lokið fyrr en um kl. 06:00 í morgun, mánudaginn 9. mars.  Eins og áður sagði var vegurinn lokaður að mestu, en jeppar gátu komist fram hjá vettvangi, en umferð var ekki mikil vegna færðar og veðurs.

Mánudaginn 2. mars voru fjögur hús rýmd í Bolungarvík og 14 manns fluttu úr húsum sínum.  Talin var veruleg snjóflóðahætta á reit 4, samkvæmt rýmingarkorti fyrir bæinn, veður fór verulega versnandi.  Þá var Óshlíðinni lokað vegna snjóflóðahættu og ekkert ferðaveður á svæðinu.

Á þriðjudag var veður mjög leiðinlegt á norðanverðum Vestfjörðum og þurfti lögregla og björgunarsveitir að aðstoða vegfarendur, bæði þá sem fastir voru í bílum sínum og einnig að koma fólki til vinnu.  Þá var umferð um Skutulsfjarðarbraut takmörkuð á tímabili á þriðjudag og var bílum hleypt í hollum eftir brautinni og fylgst með, en talin var talsverð sjóflóðahætta á svæðinu.   Rýmingu og hættuástandi  var ekki aflýst fyrr en miðvikudaginn 4. mars, þá fékk fólk að snú til síns heima aftur.  Á fimmtudaginn 5. mars voru starfsmenn Funa á Ísafirði beðnir að hafa varan á sér þar sem menn höfðu áhyggjur af því að snjóalög ofan við Funa væru ótrygg.  Það má segja að lögregla og björgunarsveitir hafi haft í nógu að snúast fyrri part vikunnar, vegna veðurs og snjóflóðahættu, aðstoða vegfarendur og íbúa eins og kostur var.

laugardaginn 7. mars var tilkynnt til lögreglu að vélbáturinn Hrönn ÍS væri sokkinn í höfninni á Ísafirð og jafnframt að vélbáturinn Jón forsesti  væri einnig við að sökkva, en sá bátur var bundinn utan á Hrönn ÍS.  kallaðir voru til hafnarstarfsmenn og bátaflokkur Björgunarfélags ísafjarðar til aðstoðar og var skorðið að festar Jóns forseta og þannig komið í veg fyrir að hann sykki einnig, var báturinn færður annað í höfninni.  Ekki er viðtað um orsakir þess að Hrönn sökk og verður unnið við að koma bátnum á flot eftir helgi á mánudag.

það má því segja að s.l. vika hafi verið talsvert erilsöm hjá lögreglu og má það að mestu rekja til veðurfars og erfiðleika tengdum því.

Úrslit eru ljós í netprófkjöri Samfylkingarinnar í Norðvesturkjördæmi 6. - 8. Mars. Kosningu lauk kl. 16:00 í dag, sunnudaginn 8. mars.
Alls greiddu 854 atkvæði. 1 seðill var auður
Kosningin er bindandi fyrir sex efstu sætin. Þau raðast þannig:

1. sæti Guðbjartur Hannesson - 601
2. sæti Ólína Þorvarðardóttir - 405 í 1 - 2 sæti
3. sæti Arna Lára Jónsdóttir - 324 í 1 - 3 sæti
4. sæti Karl V. Matthíasson - 281 í 1 - 4 sæti
5. sæti Anna Kristín Gunnarsdóttir - 456 í 1 - 5 sæti
6. sæti Þórður Már Jónsson - 420 í 1 - 6 sæti

Vegna reglna um paralista færðist Karl V. Matthíasson upp um sæti og Anna Kristín Gunnarsdóttir færðist sæti niður.

Sauðburður.

Þegar Guðlaugur Ágústsson á Steinstúni kom í fjárhúsin í morgun til að gefa morgungjöfina var ærin Gyðja borin einum hvítum lambhrút.

Ærin hefur komist í hrút áður en fé var tekið á hús í haust eða um líkt leyti og íslensku bankarnir hrundu.

Þetta er mjög óvæntur sauðburður nú á Góu.

Heimasætan Júlíana Lind Guðlaugsdóttir er búin að gefa lambinu nafnið Bylur.

Ærin og Bylur eru mjög spræk enda eru þaug inni í hlýjum húsum þótt óveður geysi úti.

 

Áhugaljósmyndarinn Ágúst G Atlason hefur tekið og tekur mikið af ljósmyndum bæði af náttúru,landi og fólki,og eru myndirnar mjög vinsælar í Vestfirskum netmiðlum.
Flestar myndanna eru að vestan og einnig hér úr Árneshreppi. 

Gústa er margt til lista lagt,en hann vinnur hjá netfyrirtækinu Snerpu ehf á Ísafirði og hannar þar tildæmis vefsíður og annað sem netheimar nútímans biðja um.

Tildæmis hannaði Ágúst vefsíðuna Litlahjalla.it.is svo frábærlega og marga aðra fréttavefi á Vestfjörðum.

Litlihjalli hefur nú sett inn fyrir nokkru,undir tenglum og þar undir Ljósmyndavefir myndavef Ágústs G Atlasonar,en hana má einnig sjá hér.

Prófkjör er hafið hjá Samfylkingu í Norðvesturkjördæmi.
Prófkjörið er rafrænt og geta skráðir félagar í Samfylkingunni með lögheimili í kjördæminu kosið á netinu eða hjá umboðsmönnum í öllum helstu þéttbýliskjörnum. Allar nánari upplýsingar og leiðbeiningar um netkosninguna má fá á vef Samfylkingarinnar, www.xsnv.blog.is,  hjá Eggerti Herbertssyni formanni stjórnar kjördæmisráðs Samfylkingarinnar í Norðvesturkjördæmi í síma 617-8306 eða hjá Þórhildi Ólafsdóttur, kosningastjóra, 869-9999

11 eru í framboði. Sjá lista yfir frambjóðendur.

Trausti Jónsson veðurfræðingur á Veðurstofu Íslands hefur tekið sam tíðleika óveðra á landinu í heild ,er þetta mjög svo áhugaverð skírsla.Úrdráttur úr skírslunni:
En fyrst fundist hafa „verstu" byljirnir í Reykjavík og á Akureyri er þá ekki hægt að finna verstu byljina á landinu í heild? Þá hrúgast upp álitamál um skilgreiningar. Hér skal þó gerð tilraun með miklu þrengra viðmiði en því sem notað var að ofan. Vindur skal nú vera yfir 20 m/s, skyggni innan við 500 m og frost meira en 10 stig. Manndrápsveður, ekki satt? Sé hálendisstöðvunum Hveravöllum, Sandbúðum og Nýjabæ sleppt fundust alls 142 athuganir í gagnaskrá Veðurstofunnar sem falla undir þessa skilgreiningu frá og með 1949.

Meir en þriðjungur (69) eru frá stöðvum á Vestfjörðum en síðan koma Raufarhöfn og Grímsstaðir á Fjöllum með háa tíðni. Sé litið á áradreifinguna kemur í ljós að fyrir 1963 eru aðeins 3 athuganir sem ná kröfunum og var það 2. dag gagnaraðarinnar (2. janúar 1949) á Raufarhöfn og Grímsstöðum á Fjöllum. Eftir 1981 koma athuganir af þessu tagi mjög sjaldan fyrir í byggð. Langflestar athuganir falla á örfá ár, árin 1966, 1968, 1969 og 1970 eru með samtals 94. Margir munu átta sig á að þetta er einmitt á hafísárunum svokölluðu og má vafalaust túlka sem enn eina vísbendingu um þær miklu breytingar sem verða á veðurlagi þegar hafís liggur við land.

Það er líka eftirtektarvert að slæðingur af athugunum af þessu tagi er í byggðum allt fram til 1981, en lítið (6) eftir það. En reyndar eru það örfá veður sem skila flestum athugunum. Fárviðrið í lok janúar 1966 er með 16 athuganir, 4. febrúar 1968 með 7, dagarnir 18. til 22. mars 1968 með 6, 1. apríl 1968 með 6, 15. janúar 1969 með 12,5, mars 1969 með 12 og 25. til 26. mars 1970 með 8. Hér er alls staðar miðað við athuganir í byggð. Hlutur Vestfjarða er langmestur en ein og ein athugun er í öðrum landshlutum. Meira að segja bæði í Vestmannaeyjum og Reykjavík. Margt bendir til þess að á 19. öld hafi nístingshríðar af þessu tagi verið mun tíðari en á þeirri 20. Aldrei var getið um skyggni í veðurathugunum þess tíma og samanburður af því tagi sem hér er notaður því dálítið erfiður gagnvart eldri athugunum.

Versta veðrið í athugunum í þeim mælikvarða sem hér er síðast notaður má teljast á Hornbjargsvita kl. 15 þann 5. mars 1969. Vindhraði var 26,7 m/s, skyggni 100 metrar og frost 19,3 stig.
Skírsluna í heild má lesa hér.Og á www.vedur.is

Nú í morgun er verið að moka veginn Norðurfjörður-Gjögur.
Talsverður mokstur er víða skaflar en sumstaðar autt.
Talsvert skóf í skafla í síðasta hreti.
Nú gengur á með éljum og NNA 11 til 13 m/s.
Flugdagur er í dag og lítur sæmilega út með flug.

Mikill aðflutningur til landsins undanfarin ár hefur verið mjög í umræðunni. Minna hefur farið fyrir umfjöllun um búsetuþróun innanlands.

Á síðustu 5 árum hafa tæplega 46.000 manns flutt til landsins. Þar af voru rúmlega 34 þúsund með erlent ríkisfang. Af landinu hafa flutt tæplega 30 þúsund. Á sama tíma hafa 47 þúsund manns flutt milli landshluta innanlands. Með landshlutum er átt við höfuðborgarsvæðið og gömlu kjördæmin. Innan landshluta, en milli sveitarfélaga fluttu tæplega 55 þúsund en 170 þúsund hafa flutt lögheimili innan sama sveitarfélags á þessum fimm árum. Auk beinna breytinga á íbúafjölda gefa miklir búferlaflutningar tilefni til breytinga á hlutföllum milli kynja og aldursskiptingu ef þeir sem flytja skera sig úr brottflutnings- eða aðflutningssvæðinu í þeim efnum. Slíkt getur haft áhrif á vinnuframboð og þörf fyrir ýmsa þjónustu.

Á myndinni sem er hér með má sjá hvernig landshlutunum hefur reitt af í búferlaflutningum undanfarinna ára og þar sést hversu miklu máli innanlandsflutningarnir skipta. Á myndinni sést að síðastliðin fimm ár hafa innanlandsflutningar skipt mjög litlu fyrir íbúaþróun höfuðborgarsvæðisins. Þeir hafa bætt 0,3% við íbúafjöldann á tímabilinu meðan flutningar milli landa hafa aukið hann um tæplega 6%.

Suðurnes annars vegar og Suðurland hins vegar eru einu landshlutarnir þar sem innanlandsflutningar hafa bætt við íbúafjöldann. Í öðrum landshlutum hafa innanlandsflutningar fækkað íbúum en í öllum landshlutum hafa millilandaflutningar bætt við hann. Suðurnes skera sig úr en þar hafa innanlandsflutningar bætt 15% við mannfjöldann auk þess sem millilandaflutningar hafa aukið hann um 8%. Búferlaflutningar hafa þannig bætt næstum því fjórðungi við þann íbúafjölda sem bjó á Suðurnesjum fyrir fimm árum. Mestur er nettóbrottflutningur innanlands á Vestfjörðum þar sem hann nam 18,5% af íbúafjölda. Þar ná millilandaflutningar ekki að vega upp fækkunina og hið sama á við um Norðurland bæði austurhlutann og þann vestari.
Nánar hér.

Frá Ríkislögreglustjóra Almannavarnadeild.
Ákveðið hefur verið að færa viðbúnað vegna snjóflóðahættu á Vestfjörðum af hættustigi á óvissustig. Rýmingu hefur verið aflétt og hafa íbúar fengið leyfi til að snúa til síns heima.
Fjöldi snjóflóða hafa fallið síðasta sólarhring víðsvegar um Vestfirði, sérstaklega í byrjun óveðurshrinunnar.
Áfram verða helstu svæði vöktuð, athuganir gerðar á snjóalögum og jafnframt verður fylgst með framvindunni.

Forval Vinstri grænna í NV-kjördæmi

Í dag verða send kjörgögn til allra félaga í Vinstrihreyfingunni - grænu framboði í Norðvesturkjördæmi, en þar mun fara fram póstkosning til að stilla upp á lista flokksins fyrir komandi kosningar. Reynt verður að hraða talningu og í kjölfarið að stilla upp á lista flokksins og þurfa póstatkvæði að vera komin í póst fyrir 10. mars næstkomandi. Frestur til að skila inn framboði er liðinn og gáfu 20 félagar kost á sér. Hægt er að nálgast upplýsingar um frambjóðendur í kynningarbæklingi sem er kominn á netið:  http://www.vg.is/kjordaemi/nv . Nánari upplýsingar veitir formaður kjörstjórnar Gísli Árnason í síma 895-4408

Frambjóðendur eru í stafrófsröð:

Arnar Snæberg Jónsson, Hólmavík (3.-4. sæti)

Ársæll Guðmundsson, Borgarnesi (2.-4. sæti)

Ásmundur Einar Daðason, Búðardal (2.-4. sæti)

Björg Gunnarsdóttir, Hvanneyri (1.-2. sæti)

Eva Sigurbjörnsdóttir, Djúpavík í Árneshreppi (1.-6. sæti)

Grímur Atlason, Búðardal (1.-2. sæti)

Halldóra Lóa Þorvaldsdóttir, Reykholti (2.-4. sæti)

Hjördís Garðarsdóttir, Akranesi (3.-5. sæti)

Ingibjörg Gestsdóttir, Akranesi (tilgreinir ekki sæti)

Jón Bjarnason, Blönduósi (1. sæti)

Jóna Benediktsdóttir, Ísafirði (2.-3. sæti)

Katla Kjartansdóttir, Hólmavík (3.-6. sæti)

Lilja Rafney Magnúsdóttir, Suðureyri (2. sæti)

Matthías Sævar Lýðsson, Húsavík í Strandabyggð (3.-6. sæti)

Ólafur Sveinn Jóhannesson, Tálknafirði (1.-2. sæti)

Páll Rúnar Heinesen Pálsson, Sauðárkróki (4.-6. sæti)

Ragnar Frank Kristjánsson, Hvanneyri (3.-8. sæti)

Sigurður Ingvi Björnsson, Hvammstanga (tilgreinir ekki sæti)

Telma Magnúsdóttir, Blönduósi (3.-6. sæti)

Viðar Guðmundsson, Miðhúsum í Strandabyggð (3.-6. sæti)