Dagana 19. til 21. júní verður Skákhátíð í Árneshreppi 2010. Hápunktur verður Afmælismót Friðriks Ólafssonar í Djúpavík, laugardaginn 19. júní. Mótið er öllum opið og meðal keppenda verða meistararnir Jóhann Hjartarson, Helgi Ólafsson, Guðfríður Lilja Grétarsdóttir, Gunnar Björnsson, Ingólfur Benediktsson og Björn Torfason og Friðrik, sem í ár fagnar 75 ára afmæli. Sérstakur gestur hátíðarinnar er Ivan Sokolov, sem sigrað hefur á fjölda alþjóðlegra móta, hérlendis sem erlendis.

Þetta er þriðja árið í röð sem Hrókurinn og félagar efna til skákhátíðar í Árneshreppi. Árið 2008 sigraði Helgi Ólafsson á Minningarmóti Páls Gunnarssonar og tryggði sér sæmdarheitið Djúpavíkurmeistari í skák. Helgi varði titilinn með glæsilegum sigri á Minningarmóti Guðmundar Jónssonar frá Stóru-Ávík, sem fram fór í Djúpavík í fyrra.

Mótið er öllum opið. Keppnisgjald er 1500 krónur en ókeypis fyrir börn, 18 ára og yngri, og fólk eldra en 60 ára. Þá er ókeypis fyrir konur, enda fer Afmælismót Friðriks fram á sjálfan kvennadaginn.

Teflt er í gömlu síldarverksmiðjunni í Djúpavík, sem reist var á fjórða áratug síðustu aldar og var þá stærsta verksmiðja á Íslandi. Andblær liðins tíma, einstök náttúrufegurð og blómlegt mannlíf í Árneshreppi skapa frábært andrúmsloft fyrir hátíð, þar sem skákunnendur úr öllum áttum koma saman.

Það er sérlega ánægjulegt að hátíðin í ár skuli tileinkuð afmæli Friðriks Ólafssonar, sem fyrstur Íslendinga varð stórmeistari í skák og var um árabil í hópi fremstu skákmanna heims.

Hátíðin hefst á föstudagskvöldið 18. júní með tvískákmóti, en það er skemmtilegt keppnisform þar sem tveir eru saman í liði. Afmælismót Friðriks Ólafssonar er haldið laugardaginn 19. júní og daginn eftir verður hraðskákmót í Kaffi Norðurfirði. Þá verður efnt til hliðarviðburða af ýmsu tagi, auk þess grillað verður og efnt í mikla brennu. Þá gefst gestum að sjálfsögðu tími til að kynnast dásemdum Árneshrepps og njóta lífsins þar sem vegurinn endar.

Veitt verða peningaverðlaun á Afmælismóti Friðriks Ólafssonar en ekki er minna vert um vinninga frá fólkinu í Árneshreppi. Í fyrra gátu menn unnið bátsferð á Hornstrandir, gistingu í rómantísku smáhýsi á heimskautsbaug, gómsætt lambalæri, listilega prjónaðar húfur, trefla og vettlinga, útskorna muni úr rekaviði og fleira og fleira.

Búast má við mörgum góðum gestum, auk þess sem heimamenn á Ströndum fjölmenna að vanda. Æskilegt er að keppendur skrái sig sem fyrst og gangi frá gistingu. Nánari upplýsingar og skráning hjá Hrafni Jökulssyni í hrafnjokuls@hotmail.com og Róbert Lagerman í chesslion@hotmail.com eða 6969658.

 

Dagskrá Skákhátíðar í Árneshreppi 2010:

Föstudagur 18. júní: Tvískákmót í Djúpavík, klukkan 20.

Laugardagur 19. júní: Afmælismót Friðriks Ólafssonar í Djúpavík, klukkan 13. Verðlaunaafhending klukkan 17. Grill og brenna um kvöldið.

Sunnudagur 20. júní: Hraðskákmót í Kaffi Norðurfirði, klukkan 13.

Kynningarfundur um norræna og evrópska styrki til menningarverkefna verður haldinn í Þróunarsetrinu á Hólmavík þriðjudaginn 27. apríl kl. 15-17. Allir eru velkomnir.
Fyrir utan að þekking á þessum möguleikum sé mikilvæg grunnþekking fyrir alla ráðgjafa, eru það t.d.

menningarstofnanir og söfn, fræðasetur og rannsóknastofnanir, ferðaþjónar, félög og samstarfsverkefni, viðburðastjórar, sveitarstjórnir og fleiri aðilar sem geta tekið þátt í eða staðið fyrir styrkhæfum verkefnum.

Annar slíkur fundur er svo haldinn í Þróunarsetrinu á Ísafirði daginn eftir,miðvikudaginn 28. apríl kl. 14-16.
Nánar á vef Menningarráðs Vestfjarða.

Bæjarins Besta.
Tvær rosknar manneskjur þykja hafa sloppið með ólíkindum vel þegar bíll þeirra rann aftur á bak í flughálku í brekku við Kaldbaksvík á Ströndum um níuleytið í gærkvöldi, fór út af veginum og að minnsta kosti 30 metra ofan í fjöru. Fólkið klifraði upp á veginn, en varð að ganga talsverðan spöl áður en það komst í símasamband og gat kallað eftir aðstoð. Bíllinn, sem er pallbíll, hélst á hjólunum allan tímann, og er það talið hafa orðið fólkinu til lífs.
Þetta kemur fram á www.bb.is
Annar aðilinn sem lenti í þessu sagði í viðtali við fréttavefinn Litlahjalla að það mætti einnig koma fram að á meðan þau gengu frá slysstað,Kaldbaksvíkurkleyf og að Eyjum hefðu tveir bílar komið og ekki stoppað,annar bíllinn var á norðurleið hinn á suðurleið.Þá voru þau orðin símasambandslaus því batterí voru orðin tóm.
Það má einnig koma fram að fólkið sem varð fyrir þessari miklu lífsreynslu var á stórum jeppa með langa kerru og var að koma frá því að sækja timbur til Litlu-Ávíkur og voru á suðurleið þegar óhappið varð.

Á fjölmennum aðalfundi Ferðamálasamtaka Vestfjarða á Hótel Núpi þann 17. apríl 2010 var eftirfarandi ályktun lögð fram og samþykkt samhljóða.

„Aðalfundur Ferðamálasamtaka Vestfjarða skorar á stjórnvöld að skera ekki niður framlög til samgöngumála í fjórðungnum. Bættar samgöngur eru forsenda uppbyggingar í ferðaþjónustu á Vestfjörðum."

Frá því aðalfundurinn var haldinn hefur verið tekin ákvörðun um að fella Dýrafjarðargöng úr samgönguáætlun. Ferðamálasamtök Vestfjarða hljóta að mótmæla því harðlega og krefjast þess að íbúar á Vestfjarðakjálkanum sitji við sama borð og aðrir landsmenn þegar kemur að ákvörðunum um vegamál. Með þessari ákvörðun er verið að skerða verulega samkeppnishæfni vestfirskra fyrirtækja til lengri tíma. Vegabætur í fjórðungnum hafa verið langt á eftir öðrum landshlutum í áratugi. Sú ákvörðun Alþingis að fella Dýrafjarðargöng út úr samgönguáætlun lýsir fyrst og fremst fullkomnu skilningsleysi gagnvart íbúum fjórðungsins og setur stefnumótunarvinnu ferðaþjónustunnar í uppnám.

 

Vefurinn Litlihjalli óskar lesendum sínum gleðilegs sumars,og þakkar fyrir veturinn.
Sumardagurinn fyrsti,er fyrsti dagur Hörpu,sem er fyrstur af sex sumarmánuðum í gamla norræna tímatalinu.Sumardaginn fyrsta ber alltaf upp á fimmtudag  á tímabilinu frá 19-25. apríl (þ.e. fyrsta fimmtudag eftir 18. apríl). Sumardagurinn fyrsti var lengi messudagur eða til 1744.

Íslensk þjóðtrú segir að ef sumar og vetur frjósi saman boði það gott sumar, en með því er átt við að hiti fari niður fyrir frostmark aðfararnótt sumardagsins fyrsta.
 Í Sögu daganna - hátíðir og merkisdagar (bls. 50, 2. útg., 1977) eftir Árna Björnsson, þjóðháttafræðing, segir um sumardaginn fyrsta:

Hvarvetna var fylgst með því, hvort frost væri aðfararnótt sumardagsins fyrsta, þ.e. hvort saman frysti sumar og vetur. Yfirleitt var það talið góðs viti og jafnvel álitið að rjóminn ofan á mjólkurtrogunum yrði jafn þykkur og ísskánin á vatninu þessa nótt. Í því skyni settu menn skál eða skel með vatni út um kvöldið og vitjuðu svo eldsnemma morguns.

Hvað átt er við með góðu sumri í þjóðtrúnni er nokkuð á reiki, en hugsanlega er einkum átt við að nyt búpenings verði góð, sem verður þegar taðan er kjarnmikil. Ef engjar og tún eru seinsprottin verða hey oft kjarngóð og því ætti nytin einnig að verða góð. Slíkt gerist þegar svalt er og vott framan af sumri, en síðan hlýrra og þurrt og kann þjóðtrúin að vísa til þess að þegar vorið er kalt þá er oftast frost á sumardaginn fyrsta sem leiðir líkum að því að sumarið verði seinna á ferðinni. Þá er allur gróður einnig seinni að taka við sér, en það gerir grösin kjarnbetri og bætir nyt búpenings.
Vetur og sumar frusu saman hér í Árneshreppi síðastliðna nótt,þannig að komandi sumar ætti að vera gott miðað við þessa gömlu þjóðtrú.

Ágætu ráðstefnugestir,

Það er mér sérstök ánægja að vera með ykkur hér í dag á hinu forna höfuðbóli - Núpi - mitt í hinni einstæðu náttúru Vestfjarða - umlukin stórbrotnum fjöllum og með útsýni til hafs út á Dýrafjörðinn.

 

Ég fagna því frumkvæði sem Ferðamálasatökin hér hafa tekið með því að standa fyrir stefnumótun fyrir vestfirska ferðaþjónustu og þeim vinnuaðferðum sem beitt hefur verið með því að hafa samráð við svo stóran hóp fólks um allan fjórðunginn sem raun ber vitni. Ég tel mjög mikilvægt að hvar sem því verður við komið reynum við að hafa sem flesta með í ráðum þar sem stefna er mótuð og ákvarðanir teknar. Það er eitt af lykilatriðum sjálfbærrar þróunar sem á að vera rauður þráður í öllu starfi að mótun og þróun samfélagsins.

 

Vestfirðingar búa í ægifagurri en viðkvæmri náttúru sem þeir hafa orðið að taka tillit til í aldanna rás. Hér hefur fólk lifað á því sem náttúran gefur, fiski úr sjó, fugli og landbúnaðarafurðum. Því er fólki í þessum landsfjórðungi e.t.v. ljósara en mörgum öðrum að gögn og gæði náttúrunnar eru hin raunverulega undirstaða lífs okkar frá degi til dags.

Meira

Frá síðasta aðalfundi Ferðamálasamtaka Vestfjarða sem haldinn var á Drangsnesi fyrir réttu ári síðan þann 18. apríl 2009, hafa verið haldnir sjö stjórnarfundir. Þrisvar sinnum hefur stjórnin náð að hittast augliti til auglitis og fjórum sinnum hafa fundir verið haldnir í gegnum síma. Stjórnin öll hefur verið starfsöm og tekið virkan þátt í þeim málefnum sem rædd hafa verið á fundunum. Ég vil þakka þeim öllum kærlega fyrir samstarfið á liðnu ári og hlakka til að takast á við frekari verkefni í framtíðinni, með þeim stjórnarmönnum sem halda áfram og þeim sem koma nýir inn. Ég vil færa sérstakar þakkir til Áslaugar Alfreðsdóttur sem hefur ákveðið að bjóða sig ekki fram til endurkjörs að þessu sinni. Áslaug hefur unnið mikið og óeigingjarnt starf í þágu ferðaþjónustu á Vestfjörðum innan Ferðamálasamtaka Vestfjarða frá árinu 1988...

Á vef Ferðamálasamtaka Vestfjarða má sjá nánar um skýrslu formanns í heild.

Rafmagn verður tekið af kl eitt í Árneshreppi.

Enn vinnur Orkubú Vestfjarða að viðhaldi á raflínum og bindingum á staurum á Trékyllisheiði.

Búið er að skipta um bindingar á 76 staurum en til stendur að yfirfara 107 staura.

Rafmagn verður tekið af í dag þriðjudag kl.13:00 og fram eftir degi,í svona 4 til 5 tíma.

Á mynd númer tvö má sjá hvað bindingar eru illa farnar tærðar og ryðgaðar og ekki vanþörf á að skipta um.

Í vikunnu sem var að líða voru  fjögur umferðar óhöpp tilkynnt  til lögreglu.Miðvikudaginn 14. apríl var tilkynnt að  ekið hafi verið á grjót á vegunum um Óshlíð,ekki slys á fólki, en tjón á ökutæki. 

Föstudaginn 16. apríl var tilkynnt um þrjú óhöpp. Bifreið hafnaði út fyrir veg á Óshlíð, bifreiðin óökuhæf,ökumaður og farþegar hans fóru á sjúkrahúsið á Ísafirði til skoðunar. Þá urðu tvær bílveltur þann dag.Bifreið hafnaði út fyrir vegi skammt frá Núpi í Dýrafirði.Ökumaður var fluttur með sjúkrabíl á sjúkrahúsið á Ísafirði,bifreiðin óökuhæf og flutt af vettvangi með krana.Þá varð bílvelta á þjóðvegi nr. 1 á Holavörðuheiði.Bifreiðin óökuhæf og flutt af vettvangi með krana,ökumann og farþega sakaði ekki.

Í víkunni voru þrír ökumenn kærðir fyrir of hraðan akstur, tveir í nágrenni við Hólmavík og einn á Ísafirði.

Mánudaginn 12. apríl var tilkynnt um slys á sparkvellinum við grunnskólann á Hólmavík. þar voru ungir piltar að leik og grunum um að einn þeirra hafi fótbrotnað og var hann fluttur á Heilsugæslustöðina á Hólmavík til skoðunar.

Ferðamálasamtök Vestfjarða stóðu fyrir mikilli fundarhelgi á Hótel Núpi dagana 16.-18. apríl. Stefnumótunarvinna samtakanna var kynnt á fjölmennum fundi á föstudagskvöldi þar sem Ásgerður Þorleifsdóttir kynnti niðurstöður stefnumótunarfunda vetrarins. Stefnumótunarskýrslan verður gefin út innan skamms og dreift til allra ferðaþjónustuaðila á Vestfjörðum. Aðalfundur samtakanna var haldinn á laugardagsmorgun. Hann var einnig vel sóttur en 40 manns sátu hann. Fréttaritari strandir.is sat fundinn og birtir myndir á fréttamiðlinum. Þær er hægt að nálgast hér. Ráðstefnan Umhverfisvottaðir Vestfirðir var haldin í framhaldi af aðalfundinum. Um 100 manns sóttu ráðstefnuna sem var afar fróðleg og skemmtileg.
Nokkur breyting var á stjórn samtakanna. Þrír fyrrum stjórnarmenn gáfu ekki kost á sér, þau Áslaug Alfreðsdóttir, Sævar Pálsson og Björn Samúelsson. Í þeirra stað komu í stjórn Halldóra Játvarðardóttir, Ragna Magnúsdóttir og Einar Unnsteinsson. Stjórnarmenn eru kosnir fyrir tvö ár í senn og formaður fyrir eitt ár. Sigurður Atlason gaf kost á sér aftur og var kjörinn sem formaður samtakanna. Stjórn Ferðamálasamtakanna sitja eftirfarandi einstaklingar:
Sigurður Atlason, Hólmavík, formaður
Ester Unnsteinsdóttir, Súðavík
Einar Unnsteinsson, Bjarnarfirði
Halldóra Játvarðardóttir, Miðjanesi
Keran Stueland, Breiðavík
Ragna Jóhanna Magnúsdóttir, Bolungarvík
Sigurður Arnfjörð, Núpi Dýrafirði