Fyrri úthlutun Menningarráðs Vestfjarða á árinu 2009 fer fram í Edinborgarhúsinu á Ísafirði nú á fimmtudaginn 28. maí og hefst athöfnin kl. 16:00. Verða þar afhent vilyrði um styrki frá Menningarráði Vestfjarða, en alls eru veittir styrkir til 48 verkefna að þessu sinni á bilinu 50 þúsund til 1,4 milljónir, samtals að upphæð 21 milljón.

Umsóknir sem bárust að þessu sinni voru 89 og var samtals beðið um rúmar 72 milljónir í verkefnastyrki. Styrkirnir fara til fjölbreyttra verkefna sem sýna glöggt þann kraft, frumkvæði og nýsköpun sem einkennir vestfirskt menningarlíf.

Verkefni sem byggjast á samstarfi ólíkra aðila eru áberandi í hópi þeirra verkefna sem styrkt eru að þessu sinni, en sérstök áhersla var lögð á samvinnu og samstarf við úthlutun.

Öllum styrkumsóknum sem bárust hefur verið svarað í tölvupósti á uppgefin netföng með niðurstöðu hvað varðar einstakar umsóknir. Heildarlisti um styrkt verkefni verður birtur á vef Menningarráðsins og sendur fjölmiðlum eftir athöfnina á fimmtudag. Menningarráð Vestfjarða mun næst auglýsa eftir umsóknum um styrki í haust.

Athöfnin er opin öllum og sveitarstjórnarmenn og þeir sem standa í eldlínunni í menningarstarfi á Vestfjörðum eru sérstaklega boðnir velkomnir.

Á dagskrá eru erindi og afhending styrkja og í lokin á þessari formlegu athöfn verður boðið upp á léttar veitingar.

Nú á sjöunda tímanum í kvöld komu þeyr félagar Reimar Vilmundarson og Sigurður Stefánsson á Sædísinni ÍS 67 inná Norðurfjörð úr eggjaleiðangri úr Hornbjargi.

Með þeim í ferðinni voru einnig Kristmundur Kristmundsson og Páll Pálsson.

Þeyr félagar fóru í morgun í Hornbjarg og tíndu eggin í svonefndum Forvaða í Hornbjargi.

Allt eru þetta svartfuglsegg og fengu þeyr 800 egg.

Árneshreppsbúar geta fengið svartfuglsegg hjá þeim félögum í kvöld og á morgun á Norðurfirði.

Markaðssetning - Ertu að gera rétt? 
Kennari: Jón Páll Hreinsson Verð kr: 5.000 - Staður: Ísafjörður, Hólmavík, Patreksfjörður, Reykhólar Námskeið hefst: 26/05/2009 - Umsóknarfrestur til: 25/05/2009 Fjöldi kennslustunda: Óákveðið Ath: Kennt þriðjudaginn 26. maí kl. 17:00-21:00. Í fjarfundi til Hólmavíkur, Patreksfjarðar og Reykhóla
Skráning hér eða hjá Fræðslumiðstöð Vestfjarða eða undirritaðri og á þessari slóð:
http://www.frmst.is/index.php/namskeid/texti/markasetning_ertu_a_gera_rett/

Hagnýtt námskeið fyrir fólk í ferðaþjónustu og aðra þá sem þurfa að koma sér á framfæri. Áhersla á heimasíður, bæklinga og facebook.  Farið verður í grunnatriði í markaðssetningu og hvernig best er að nýta þessa miðla. Tekin verða dæmi um hvað er vel gert og hvað er síður að virka og þátttakendur aðstoðaðir við að greina sínar áherslur í markaðsmálum. Námskeiðið verður kennt í gegnum fjarfundabúnað til Hólmavíkur, Patreksfjarðar og Reykhóla.

Fræðslumiðstöð Vestfjarða, kt. 511199-2049
Höfðagata 3
510- Hólmavík
Sími: 451-0080
Fax: 456-5066
Netfang: kristin@frmst.is
Veffang: http://www.frmst.is/

Lögreglan sinnti hefðbundnum verkefnum í s.l. viku við umferðareftirlit og tilfallandi verkefnum.  Límt var á nokkrar bifreiðar boðunarmiði vegna vanrækslu á að færa viðkomandi bifreiðar til skoðunar.  Þá voru tveir aðilar kærðir vegna hraðaksturs í Hrútafirði.  Eitt umferðaróhapp varð í vikunni  á Vestfjörðum.  

Fimmtudaginn 14 maí var bifreið ekið útaf á Dynjandisheiði, ekki slys á fólki, en bifreiðin óökuhæf og þurfti því að flytja hana af vettvangi með kranabíl.

Miðvikudaginn 13 maí varð vinnuslys í Bolungarvíkurgöngum, Hnífadalsmegin, þar féll grjót á bak eins starfsmanns og var hann fluttur á Sjúkrahúsið á Ísafirði til skoðunar.

Þá var talsverður erill vegna ölvunar um helgina.

Næstkomandi föstudag, 22. maí kl. 20:00, verður formleg opnun í Sauðfjársetrinu í Sævangi á sérsýningu um Alfreð Halldórsson sauðfjárbónda á Kollafjarðarnesi. Sýningin er sett upp og unnin af þeim Kristínu Jónsdóttur og Söru Regínu Valdimarsdóttur, en hún var áður uppi á Þjóðminjasafninu sem hluti af sérsýningunni Lífshlaup. Sýningin hefur nú verið stækkuð talsvert og munum, myndum og texta bætt við. Afkomendur Alfreðs og Sigríðar Sigurðardóttur munu í tilefni opnunarinnar bjóða gestum upp á veglegar veitingar; kaffi og meðlæti eins og það tíðkaðist á Kollafjarðarnesi og gerðist hvað best á Ströndum. Einnig verður tónlistaratriði og Jón Alfreðsson mun lesa vel valin brot úr dagbókum föður síns. Allir Strandamenn eru hvattir til að mæta í Sauðfjársetrið á föstudaginn, en sýningin verður að líkindum uppi næstu tvö sumur.

Alfreð Halldórsson var fæddur í Miðdalsgröf  22. maí 1902. Hann tók við þeirri jörð fyrir tvítugt í samvinnu við móðurbróður sinn. Hann kvæntist Sigríði Sigurðardóttur árið 1926. Þau fluttust að Stóra-Fjarðarhorni árið 1933 og bjuggu þar í tvíbýli til ársins 1955. Þá fóru þau að Kollafjarðarnesi þar sem þau byggðu upp allan húsakost fyrir stórt fjárbú og votheysverkun en Alfreð var einn af frumkvöðlum hennar hér á landi. Á Kollafjarðarnesi bjuggu þau félagsbúi með syni sínum. Alfreð fylgdist vel með öllu er viðkom búskapnum og hélt dagbók frá unga aldri. Hann taldi það skyldu hvers manns að sinna samfélagslegum störfum og sat hann í hrepps- og sýslunefndum um áraraðir. Árið 1975 hætti hann búskap og fluttist til Hólmavíkur ásamt konu sinni þar sem hann bjó til dánardægurs árið 1981.

Vortónleikar Kórs Átthagafélags Strandamanna verða haldnir í Árbæjarkirkju laugardaginn 16. maí kl. 17:00

 

Þar syngur kórinn undir stjórn Krisztinu Szklenár. Píanóleikari á tónleikunum verður Kitty Kovács og fiðluleikari Balázs Stankowsky.

Efnisskrá kórsins að þessu sinni er talsvert frábrugðin því sem verið hefur undanfarin ár. Vegna utanlandsferða kórsins m.a. til Ungverjalands síðastliðið sumar og til Kanada árið 2006 og Ítalíu árið 2004 þar sem kórinn kom oft fram í kirkjum hefur efnisskráin verið blönduð trúarlegum söngvum og íslenskum þjóðlögum. Að þessu sinni er dægurlagabragur á efnisskránni og vonum við að áheyrendur kunni að meta það.

Miðaverð er 1.800 kr. fyrir fullorðna, frítt er fyrir börn 14 ára og yngri

Í dag féll stór steinn á veginn efst í Stórukleifarbrekkunni á veginum til Norðurfjarðar.
Ekki er alveg vitað hvenær steinninn féll á veginn,en steinninn er talsvert stór og féll á miðjan veginn.
Heppni verður að teljast að engin bíll var þarna á ferðinni þegar steinninn féll.
Talsvert er um grjóthrun á þessum slóðum.
Aldrei er vitað til að slys hafi orðið þarna,enda eru kleifarnar og urðirnar vígðar af Guðmundi hinum góða biskup.
Vegagerðin er búin að gera ráðstafanir að koma steininum af veginum.

Markaðsstofan, Vaxtasamningur Vestfjarða og Atvinnuþróunarfélag Vestfjarða hafa tekið höndum saman um að gefa út Ævintýrahandbók fyrir fjölskylduna um Vestfirði.

Þar verður að finna spennandi og skemmtileg ævintýri sem fjölskyldur geta upplifað saman á Vestfjörðum í sumar. Markmiðið er að hjálpa fjölskyldum að finna sér spennandi verkefni og lenda í litlum ævintýrum á Vestfjörðum.

Núna stendur efnisöflun yfir og allir þeir sem hafa eitthvað skemmtilegt uppá að bjóða fyrir börn og fjölskyldur geta snúið sér til aðila í ritnefnd:

Jón Páll hjá Markaðsstofu Vestfjarða: jonpall@westfjords.is
Ásgerður hjá AtV! est á Ísafirði: asgerdur@atvest.is
Viktoría hjá AtVest á Hólmavík: viktoria@atvest.is
Guðrún hjá AtVest á Patreksfirði: gudrun@atvest.is 

Fréttatilkynning.
Hin árlega Menningarvaka Vestfirðingafélagsins verður haldinn í félagsheimilinu Gjábakka, Fannborg 8, fimmtudaginn 14. maí og hefst kl. 20.00
Á dagskránni verður m.a.
1. Formaður Guðríður Hannibalsdóttir setur samkomuna.
2. Aðalsteinn Eiríksson, varaformaður minnist Sigríðar Valdemarsdóttur.
3. Söngvararnir Stefán Helgi Stefánsson og Davíð Ólafsson flytja nokkra sumarsmelli við undirleik Helga Hannessonar.
4. Veitingar: Ostar og ávaxtadrykkir ásamt að heitt verður á könnunni.
5. Hin hliðin á Sigríði Valdemarsdóttur - Sigurður H. Magnússon.
6. Fjöldasöngur.
Dagskrárstjóri: Sigurbjörg Björgvinsdóttir
Aðgangseyrir kr. 1.500.- sem rennur óskiptur til Menningarsjóðs vestfirskrar æsku.

 

 

Meira

Frekar tíðindalítið var hjá lögreglunni á Vestfjörðum í liðinni viku.  Talsvert var um að vegfarendur væru í vandræðum vegna færðar og veðurs  í vikunni og voru 7 aðstoðarbeiðnir skráðar hjá lögreglu og um að ræða aðstoð á Holtavörðuheiði, Steingrímsfjarðarheiði og Klettshálsi.  Björgunarsveitir voru fengnar til aðstoðar þessi skipti og gengu björgunaraðgerðir vel, öllum var bjargað til byggða.

Föstudaginn 8 maí varð eitt umferðaróhapp á þjóðvegi 60, Vestfjarðarvegi í Reykhólasveit við bæinn Klett, þar hafnaði bifreið fyrir utan veg, talsvert tjón á ökutækinu.  Ökumaður kenndi sér eymsla eftir óhappið og fór sjálfur til skoðunar hjá lækni.

Þá voru 3 stöðvaðir fyrr of hraðan akstur í umdæminu og sá sem hraðast ók, var mældur á 130 km/klst., á Barðastrandarvegi þar sem hámarkshraði er 90 km/klst.