Fyrsta námskeið Melrakkaseturs Íslands verður haldið miðvikudaginn 3. júní kl. 18:00 - 20:00 í samstarfi við Fræðslumiðstöð Vestfjarða. Námskeiðinu verður varpað í gegnum fjarfundabúnað til Hólmavíkur, Patreksfjarðar og Reykhóla.
Námskeiðið er ætlað fyrir leiðsögumenn og aðra sem ferðast um í íslenskri náttúru og langar að kynnast þessu fágæta dýri sem melrakkinn er.
Fjallað verður um líffræði tegundarinnar, útbreiðslu, búsvæðaval og lífshætti ásamt því að kynna hvernig hægt er að kynnast dýrunum án þess að valda þeim skaða eða of mikilli truflun.

Á vef Fræðslumiðstöðvarinnar má sjá lýsingu á námskeiðinu og hægt er að skrá sig hér

Hinn 20. maí fæddist nýr íbúi í Árneshreppi, dóttir Elínar Öglu Briem skólastjóra og Hrafns Jökulssonar. Hún var 14 merkur og 52 sentimetrar og fæddist á fæðingardeildinni á Akranesi. Fjölskyldan er nú komin heim í sveitina og heilsast öllum vel.
 
Börnum fjölgar nú óðum í Árneshreppi og er það mikið gleðiefni. Á síðustu tveimur árum hafa Gunnar og Pálína í Bæ eignast tvær dætur, og nú eru ungu hjónin Elísa og Ingvar að flytja í Árnes með tvö ung börn, Kára og Þóreyju. Kári verður í Finnbogastaðaskóla í vetur, ásamt Ástu í Árnesi og Júlíönu úr Norðurfirði.
 
Litla dóttir Hrafns og Elínar fær nafn 4. júlí.

Sauðburður hefur gengið nokkuð vel hjá bændum í Árneshreppi,en eitthvað hefur drepist af lömbum bæði í fæðingu eða fæðst dauð.

Óvenju mikið var um geldar lamgimbrar hjá Sigursteini bónda í Litlu-Ávík eða yfir 21 af 45 gimrum.Þetta hefur ekki skeð í Litlu-Ávík til margra ára.

Flestar ærnar eru tvílembdar en lambgimbrar yfirleitt einlembdar þótt dálítið sé um tvílemdar lambgimbrar.Alltaf er eitthvað um þrílembur.

Nú er sauðburði að verða lokið enn einhver tíningur er eftir fram í næsta mánuð.

Bændur gátu byrjað að setja lambfé snemma út á tún eða nokkru fyrr en í fyrra,nú er byrjað að keyra fé í afrétt en aðallega þó í byrjun næsta mánaðar.

Svalt var í veðri um tíma og nokkur væta sem er verst fyrir lömbin nýkomin út.

Nokkrar myndir koma hér með þegar lambfé var keyrt útá tún hér í Litlu-Ávík.

BB.ís
Skólum hefur fækkað um þrjá á Vestfjörðum undanfarinn áratug en þeim hefur fækkað 22 á landsvísu. Þar hefur fámennustu og fjölmennustu skólunum fækkað mest. Þessar upplýsingar koma fram í Hagtíðindum um grunnskóla, sem Hagstofa Íslands hefur gefið út. Fámennasti skóli landsins er Finnbogastaðaskóli í Árneshreppi á Ströndum, en þar voru tveir nemendur síðasta skólaár. Skólaárið 2008-2009 voru 33 grunnskólar með 50 nemendur eða færri og þar af voru tíu á Vestfjörðum. Fjölmennasti skóli fjórðungsins er Grunnskólinn á Ísafirði með 500 nemendur en þar á eftir koma Grunnskóli Bolungarvíkur og Grunnskóli Vesturbyggðar með um 125 nemendur.
Nánar á Bæjarins Besta.

Fyrri úthlutun Menningarráðs Vestfjarða á árinu 2009 fer fram í Edinborgarhúsinu á Ísafirði nú á fimmtudaginn 28. maí og hefst athöfnin kl. 16:00. Verða þar afhent vilyrði um styrki frá Menningarráði Vestfjarða, en alls eru veittir styrkir til 48 verkefna að þessu sinni á bilinu 50 þúsund til 1,4 milljónir, samtals að upphæð 21 milljón.

Umsóknir sem bárust að þessu sinni voru 89 og var samtals beðið um rúmar 72 milljónir í verkefnastyrki. Styrkirnir fara til fjölbreyttra verkefna sem sýna glöggt þann kraft, frumkvæði og nýsköpun sem einkennir vestfirskt menningarlíf.

Verkefni sem byggjast á samstarfi ólíkra aðila eru áberandi í hópi þeirra verkefna sem styrkt eru að þessu sinni, en sérstök áhersla var lögð á samvinnu og samstarf við úthlutun.

Öllum styrkumsóknum sem bárust hefur verið svarað í tölvupósti á uppgefin netföng með niðurstöðu hvað varðar einstakar umsóknir. Heildarlisti um styrkt verkefni verður birtur á vef Menningarráðsins og sendur fjölmiðlum eftir athöfnina á fimmtudag. Menningarráð Vestfjarða mun næst auglýsa eftir umsóknum um styrki í haust.

Athöfnin er opin öllum og sveitarstjórnarmenn og þeir sem standa í eldlínunni í menningarstarfi á Vestfjörðum eru sérstaklega boðnir velkomnir.

Á dagskrá eru erindi og afhending styrkja og í lokin á þessari formlegu athöfn verður boðið upp á léttar veitingar.

Nú á sjöunda tímanum í kvöld komu þeyr félagar Reimar Vilmundarson og Sigurður Stefánsson á Sædísinni ÍS 67 inná Norðurfjörð úr eggjaleiðangri úr Hornbjargi.

Með þeim í ferðinni voru einnig Kristmundur Kristmundsson og Páll Pálsson.

Þeyr félagar fóru í morgun í Hornbjarg og tíndu eggin í svonefndum Forvaða í Hornbjargi.

Allt eru þetta svartfuglsegg og fengu þeyr 800 egg.

Árneshreppsbúar geta fengið svartfuglsegg hjá þeim félögum í kvöld og á morgun á Norðurfirði.

Markaðssetning - Ertu að gera rétt? 
Kennari: Jón Páll Hreinsson Verð kr: 5.000 - Staður: Ísafjörður, Hólmavík, Patreksfjörður, Reykhólar Námskeið hefst: 26/05/2009 - Umsóknarfrestur til: 25/05/2009 Fjöldi kennslustunda: Óákveðið Ath: Kennt þriðjudaginn 26. maí kl. 17:00-21:00. Í fjarfundi til Hólmavíkur, Patreksfjarðar og Reykhóla
Skráning hér eða hjá Fræðslumiðstöð Vestfjarða eða undirritaðri og á þessari slóð:
http://www.frmst.is/index.php/namskeid/texti/markasetning_ertu_a_gera_rett/

Hagnýtt námskeið fyrir fólk í ferðaþjónustu og aðra þá sem þurfa að koma sér á framfæri. Áhersla á heimasíður, bæklinga og facebook.  Farið verður í grunnatriði í markaðssetningu og hvernig best er að nýta þessa miðla. Tekin verða dæmi um hvað er vel gert og hvað er síður að virka og þátttakendur aðstoðaðir við að greina sínar áherslur í markaðsmálum. Námskeiðið verður kennt í gegnum fjarfundabúnað til Hólmavíkur, Patreksfjarðar og Reykhóla.

Fræðslumiðstöð Vestfjarða, kt. 511199-2049
Höfðagata 3
510- Hólmavík
Sími: 451-0080
Fax: 456-5066
Netfang: kristin@frmst.is
Veffang: http://www.frmst.is/

Lögreglan sinnti hefðbundnum verkefnum í s.l. viku við umferðareftirlit og tilfallandi verkefnum.  Límt var á nokkrar bifreiðar boðunarmiði vegna vanrækslu á að færa viðkomandi bifreiðar til skoðunar.  Þá voru tveir aðilar kærðir vegna hraðaksturs í Hrútafirði.  Eitt umferðaróhapp varð í vikunni  á Vestfjörðum.  

Fimmtudaginn 14 maí var bifreið ekið útaf á Dynjandisheiði, ekki slys á fólki, en bifreiðin óökuhæf og þurfti því að flytja hana af vettvangi með kranabíl.

Miðvikudaginn 13 maí varð vinnuslys í Bolungarvíkurgöngum, Hnífadalsmegin, þar féll grjót á bak eins starfsmanns og var hann fluttur á Sjúkrahúsið á Ísafirði til skoðunar.

Þá var talsverður erill vegna ölvunar um helgina.

Næstkomandi föstudag, 22. maí kl. 20:00, verður formleg opnun í Sauðfjársetrinu í Sævangi á sérsýningu um Alfreð Halldórsson sauðfjárbónda á Kollafjarðarnesi. Sýningin er sett upp og unnin af þeim Kristínu Jónsdóttur og Söru Regínu Valdimarsdóttur, en hún var áður uppi á Þjóðminjasafninu sem hluti af sérsýningunni Lífshlaup. Sýningin hefur nú verið stækkuð talsvert og munum, myndum og texta bætt við. Afkomendur Alfreðs og Sigríðar Sigurðardóttur munu í tilefni opnunarinnar bjóða gestum upp á veglegar veitingar; kaffi og meðlæti eins og það tíðkaðist á Kollafjarðarnesi og gerðist hvað best á Ströndum. Einnig verður tónlistaratriði og Jón Alfreðsson mun lesa vel valin brot úr dagbókum föður síns. Allir Strandamenn eru hvattir til að mæta í Sauðfjársetrið á föstudaginn, en sýningin verður að líkindum uppi næstu tvö sumur.

Alfreð Halldórsson var fæddur í Miðdalsgröf  22. maí 1902. Hann tók við þeirri jörð fyrir tvítugt í samvinnu við móðurbróður sinn. Hann kvæntist Sigríði Sigurðardóttur árið 1926. Þau fluttust að Stóra-Fjarðarhorni árið 1933 og bjuggu þar í tvíbýli til ársins 1955. Þá fóru þau að Kollafjarðarnesi þar sem þau byggðu upp allan húsakost fyrir stórt fjárbú og votheysverkun en Alfreð var einn af frumkvöðlum hennar hér á landi. Á Kollafjarðarnesi bjuggu þau félagsbúi með syni sínum. Alfreð fylgdist vel með öllu er viðkom búskapnum og hélt dagbók frá unga aldri. Hann taldi það skyldu hvers manns að sinna samfélagslegum störfum og sat hann í hrepps- og sýslunefndum um áraraðir. Árið 1975 hætti hann búskap og fluttist til Hólmavíkur ásamt konu sinni þar sem hann bjó til dánardægurs árið 1981.

Vortónleikar Kórs Átthagafélags Strandamanna verða haldnir í Árbæjarkirkju laugardaginn 16. maí kl. 17:00

 

Þar syngur kórinn undir stjórn Krisztinu Szklenár. Píanóleikari á tónleikunum verður Kitty Kovács og fiðluleikari Balázs Stankowsky.

Efnisskrá kórsins að þessu sinni er talsvert frábrugðin því sem verið hefur undanfarin ár. Vegna utanlandsferða kórsins m.a. til Ungverjalands síðastliðið sumar og til Kanada árið 2006 og Ítalíu árið 2004 þar sem kórinn kom oft fram í kirkjum hefur efnisskráin verið blönduð trúarlegum söngvum og íslenskum þjóðlögum. Að þessu sinni er dægurlagabragur á efnisskránni og vonum við að áheyrendur kunni að meta það.

Miðaverð er 1.800 kr. fyrir fullorðna, frítt er fyrir börn 14 ára og yngri