Nú er verið að opna vegina frá Bjarnarfirði og norður til Norðurfjarðar.
Um talsverðan snjó er að ræða.
Það hefur snjóað mikið síðan á fimmtudagskvöld.

Góðir gestir komu í Árneshrepp frá Hólmavík í gærkveldi og spiluðu Bridds við heimamenn.
Alls tóku þátt 9 pör,átta heimamenn og tíu frá Hólmavík.
Með flest stig urðu heimamennirnir Björn Torfason og Kristján Albertsson á Melum.
Annars er stigataflan hér með.
Ingimundur Pálsson á Hólmavík var svo vinsamlegur að senda vefnum þessar myndir af mótinu.
Reimar Vilmundarson tók hópmyndina á vél Ingimundar.

Nafn	skor
Björn Pálsson og Jón Stefánsson	63
Vignir Pálsson og Guðbrandur Björnsson	88
Maríus Kárason og  Lýður Magnússon	92
Ingimundur Pálsson og Engilbert Ingvason	73
Helgi Ingimundarson og Áskell Benediktsson	56
Björn Torfason og  Kristján Albertsson	99
Úlfar Eyólfsson og Ingólfur Benediktsson	45
Gunnar Dalkvist og Oddný Þórðardóttir	71
Ágúst Gíslason og Gunnsteinn Gíslason.	61
Samtals	648

 

Gleðilegt sumar góðir lesendur og takk fyrir samfylgdina í vetur.

Það er nú ekki hægt að segja að það sé sumarlegt hér í Árneshreppi að morgni Sumardagsins fyrsta,allt alhvítt og minnir mann frekar á jólasnjó eins og meðfylgjandi mynd sýnir.

Rigning var í gærkveldi og slydda í nótt og síðan var bullandi snjókoma en stytt upp núna þegar þetta er skrifað.

Gleðilegt Sumar.

Staða afhendingaröryggis raforku á Vestfjörðum hamlar uppbyggingu nútíma atvinnulífs á Vestfjörðum og hraða verður úrbótum sem gera flutningskerfið samkeppnishæft við aðra landshluta, er sú ályktun sem draga má af nýrri skýrslu Landsnets Bætt afhenindgaröryggi raforku á Vestfjörðum. Stjórn Fjórðungssambands Vestfirðinga fjallaði um efni skýrslunnar á fundi sínum þann 3. apríl s.l. og hefur í framhaldinu sent erindi til  nefndar á vegum Iðnaðarráðuneytis, sem fjallar nú um endurskoðun raforkulaga nr 65/2003.  Í erindi stjórnar er þess m.a. krafist að endurskoðað verði ákvæði laganna að leggja beri tengigjald á nýja framleiðendur eða kaupendur.  Þetta ákvæði hamlar m.a. áformum um uppbyggingu Hvalárvirkjunar í Ófeigsfirði.  Erindi stjórnar Fjórðungssambands Vestfirðinga má finna hér

Kaffi Norðurfjörður er nú búin að opna nýja heimasíðu þar sem kemur fram matseðil og allt um starfsemina,eða eins og segir á forsíðu Kaffi Norðurfjarðar:
Við í Kaffi Norðurfirði bjóðum alla hjartanlega velkomna í sumar þar sem gestir og gangandi geta fengið sér hressingu og notið einstaks útsýnis yfir fjörðinn.   Stefnt verður á að opna staðinn um miðjan júní og verður auglýstur opnunartími milli 11:00 og 19:30 alla daga, eða eftir samkomulagi. Hlökkum til að sjá ykkur í sumar og allar ábendingar og fyrirspurnir vel þegnar á póstfangið kaffi@nordurfjordur.is
Síða Kaffi Norðurfjarðar er hér.

Fjórðungssamband Vestfirðinga hefur undirritað áskorun með Orkubúi Vestfjarða og Ísafjarðarbæ til ríkisstjórnar Íslands um virkjun Hvalár í Ófeigsfirði.  Er skorað á ríkisstjórn að kostnaður við tengingu virkjunarinnar við raforkuflutningskerfið verði greiddur úr ríkssjóði. Hér verði komið á móts við kröfu íbúa á Vestfjörðum að búa við sambærilegt öryggi í afhengu raforku líkt og aðrir landshlutar, auk þess sem virkjunin skapar mikilsverð tækifæri í atvinnuþróun á Vestfjörðum til lengri og skemmri tíma litið. 

Kennari: Böðvar Þórisson   

Verð kr 9900.- kr

Staður: Þróunarsetrið á Hólmavík

Tími: laugardaginn 2. maí kl 10-16 Skráning til 27. apríl, mánudag.

Efni námskeiðsins verður um íslenska varpfugla og farfugla sem fara hér um. Farið í greiningar á nokkrum tegundum, búsvæði, hvar og hvenær ákveðnar tegundir er best að sjá. Einnig verður farið í stofnstærðir ákveðna tegunda, lög, reglur og alþjóðlegar samþykktir. Að lokum farið í vettvangsferð á Hólmavík eða nágrenni Hólmavíkur.

Námskeiðið er einkum ætlað fólki í ferðaþjónustu sem tekur á móti gestum sem áhuga hafa á fuglum og fuglaskoðun en allir eru velkomnir

Skráðu þig hér!

Fræðslumiðstöð Vestfjarða sími 4510080 og 8673164. stina@holmavik.is

Árlegt netarall Hafrannsóknastofnunarinnar hófst 28. mars s.l. Sjö bátar taka þátt í netarallinu. Saxhamar SH í Breiðafirði, Þórsnes II SH í Faxaflóa, Kristbjörg HF á svæðinu frá Reykjanesi að Þrídröngum, Glófaxi VE frá Þrídröngum að Skeiðarárdjúpi og Hvanney SF frá Meðallandsbugt að Hvítingum, Þorleifur EA á svæðinu frá Húnaflóa að Eyjafirði og Sædís ÍS í Ísafjarðardjúpi.

Þórsnes II SH fer síðan eftir páska á svæðið frá Eyjafirði að Langanesi. Um 45-50 trossur eru að meðaltali lagðar á svæðunum, misjafnt eftir stærð þeirra og er þeim dreift innan svæða á helstu hrygningarslóðir þorsks.

Markmið verkefnisins er að safna upplýsingum um lengdar-/þyngdasamsetningu, kynþroska, og vöxt eftir aldri á helstu hrygningarsvæðum þorsks. Einnig að meta árlega magn kynþroska þorsks er fæst í þorskanet á hrygningarstöðvum og meta breytingar í gengd hrygningarþorsks á mismunandi svæðum.
Þetta kemur fram á vef Hafró.
www.hafro.is/

Sigurður Atlason, framkvæmdastjóri Strandagaldurs, var kjörinn formaður Ferðamálasamtaka Vestfjarða á aðalfundi samtakanna sem haldinn var á Drangsnesi í gær. Hann tekur við af Sævari Pálssyni frá Hótel Flókalundi, sem gegnt hefur formennskunni undanfarin fjögur ár eða frá aðalfundi samtakanna á Hótel Laugarhóli í Bjarnarfirði árið 2005. Sævar gaf kost á sér til setu í stjórninni til eins árs og situr því áfram í henni. Ný inn í stjórnina komu Sigurður Arnfjörð frá Hótel Núpi í Dýrafirði og Ester Rut Unnsteinsdóttir, framkvæmdastjóri Melrakkaseturs Íslands í Súðavík. Áslaug S. Alfreðsdóttir frá Hótel Ísafirði situr áfram í stjórn ásamt Birni Samúelssyni frá Eyjasiglingum á Reykhólum en þau voru kjörin til tveggja ára á síðasta aðalfundi á Reykhólum fyrir ári síðan. Keran Stueland Ólason frá Ferðaþjónustunni í Breiðavík gaf aftur kost á sér í stjórnina og var kjörinn á ný.
Meira

Á fundi landskjörstjórnar kl. 15.00,föstudaginn 17. apríl, var í samræmi við 44. gr. laga um kosningar til Alþingis gert kunnugt um þá lista sem verða í bornir fram í alþingiskosningunum 25. apríl næst komandi.

Eftirtaldir listar verða bornir fram í öllum kjördæmum landsins við komandi alþingiskosningar:

B-listi borinn fram af Framsóknarflokknum.

D-listi borinn fram af Sjálfstæðisflokknum.

F-listi borinn fram af Frjálslyndaflokknum.

O-listi borinn fram af Borgarahreyfingunni - Þjóðin á þing.

P-listi borinn fram af Lýðræðishreyfingunni.

S-listi borinn fram af Samfylkingunni.

V-listi borinn fram af Vinstri hreyfingunni - grænu framboði.
Samkvæmt Hagstofunni eru á Kjörskrá á öllu landinu 227.896 kjósendur.
Konur eru 114.295 og karlar 113.601.