Nú er verið að vinna í lögnum í grunninum á Finnbogastöðum.

Hilmar Hjartarson er pípulagningarmeistari og er frá Steinstúni hér í sveit en búsettur í Garðabæ,hann sér um allar vatns og skolplagnir og hitalögnina í plötuna.

Það er talsvert verk enn eftir þar til platan verður steypt.

Veðurstofa Íslands.
Á Starfatorgi eru nú auglýstar tvær stöður við hina nýju stofnun, mannauðsstjóri og rekstrarstjóri. Umsóknarfrestur rennur út 28. september næstkomandi.

Þann 11. júní 2008 gengu í gildi lög um nýja stofnun, Veðurstofu Íslands og tekur hún til starfa 1. janúar 2009. Stofnunin tekur við verkefnum Vatnamælinga og Veðurstofunnar og mun viðfangsefni hennar beinast að eðlisþáttum jarðarinnar, þ.e. lofti, vatni, snjó og jöklum, jörð og hafi.

Meira

Stjórn Byggðastofnunar, ásamt nokkrum lykilstarfsmönnum, var  í heimsókn í Árneshrepp á dögunum og var komið víða við á einni dagstund. Fyrst var staldrað við í hávaðaroki í Veiðileysurétt, dáðst að fé og spjallað við bændur. Einn bóndi er einmitt í stjórn Byggðastofnunar, Drífa Hjartardóttir, fyrrverandi þingmaður Sjálfstæðisflokksins.

Úr Veiðileysu var haldið til Norðurfjarðar, þar sem ljúffengar veitingar biðu í Kaffi Norðurfirði. Kaupfélagið var auðvitað heimsótt líka, og þar festi stjórnarformaðurinn Örlygur Hnefill Jónsson kaup á verndarengli, sem vaka mun yfir störfum hinnar mikilvægu stofnunar. Þá var ekið út á Krossnes og sundlaugin skoðuð, en ölduhæðin var slík að sundsprettur varð að bíða betri tíma.

Næst á dagskrá var heimsókn í Kört, þar sem Hrefna Þorvaldsdóttir veitti leiðsögn og upplýsingar, og er skemmst frá því að segja að safnið vakti mikla lukku og hrifningu. Gaman er að segja frá því að gestir í Kört hafa aldrei verið fleiri en þetta árið.

Að endingu var svo stoppað í Finnbogastaðaskóla, þar sem Elín Agla Briem skólastjóri sagði frá starfinu í minnsta skóla á Íslandi, auk þess sem skólastjórahjónin ræddu vítt og breitt um málefni Árneshrepps við áhugasama stjórnarmenn Byggðastofnunar. Fram kom sterkur vilji til að aðstoða við eflingu byggðar í Árneshreppi, enda lýstu stjórnarmenn mikilli hrifningu á náttúru og mannlífi í þessari afskekktustu sveit á Íslandi.

Stjórn Byggðastofnunar er svo skipuð:

Örlygur Hnefill Jónsson, formaður, Húsavík
Guðjón Guðmundsson, varaformaður, Akranesi
Anna Kristín Gunnarsdóttir, Sauðárkróki
Bjarni Jónsson, Hólum
Drífa Hjartardóttir, Hellu
Kristján Þór Júlíusson, Akureyri
Herdís Á. Sæmundardóttir, Sauðárkróki

Fyrsti snjór í fjöllum.

Það sást fyrsti snjór í fjöllum í morgun fjöll aðeins flekkótt efst,ca niðurí 450 metra.

Í fyrra var fyrsti snjór í fjöllum 11 september,samkvæmt veðurbókum frá veðurstöðinni í Litlu-Ávík.þannig að þetta er nú talsvert seinna.

  Leitin hófst við Naustvíkurgil og  Búrfell,leitað var svæðið  milli þessara staða fram að Reykjafjarðartagli og til sjávar í Reykjarfirði og síðan til Kjósarréttar og réttað þar.

Einnig var leitað fjalllendið frá Búrfelli út Kjósarfoldir,með Háafelli,og til sjávar,að Kleifará.Féið var síðan rekið til Kjósarréttar og réttað þar.

Meira

Eins og fram hefur komið hér á vefnum gerir;Veðurstofa Íslands  nú vefstjórum kleift að birta án fyrirhafnar veðurupplýsingar á vefjum sínum. Þannig geta vefstjórar birt þau veðurkort sem nýtast best notendum viðkomandi vefs.

Þjónustan er ókeypis. Hún byggir á 'iframe'-tækninni. Í raun og veru birtist þá sérsniðin síða frá vedur.is inni í síðu viðkomandi vefs.
Útfærðir hafa verið tveir stórir iframe-rammar sem ætlað að vera meginefni heillar síðu. Fleiri iframe-rammar verða útfærðir ef margir óska eftir því.;

Litlihjalli er nú komin með þessa þjónustu á sinn vef,þið farið inná valmyndina Veðurspá hér til vinstri þá kemur yfirlitskort upp fyrir Strandir og norðurland vestra.
Til að sjá vindaspá,úrkomuspá og hitaspá farið þið inná Fleiri veðurspár.
Vefstjóri vonar að ykkur lesendum líki þetta vel,því margir fylgjast með veðrinu.

  Mikið hvassviðri var frá því í gærkveldi og fram á morgun hér í hreppnum sem og annarsstaðar.

Ekki er vitað um neitt tjón hér í Árneshreppi nokkrir steinar ultu á vegi enda miklu minni úrkoma hér en annarsstaðar á Vestfjörðum.

Á veðurstöðinni í Litlu-Ávík mældist úrkoman tæpir 23 mm.

Vindur var frá hásuðri til suðsuðausturs,í síðasta veðurskeyti frá Litlu-Ávík kl 21.00 í gærkvöld var SSA 19 m/s og mestakviða 24 m/s.Nú í morgun kl 06.00 var SSA 20 m/s og mesta kviða 29 m/s.

Á sjáfvirku stöðinni á Gjögurflugvelli var mesti vindurin um miðja nótt.eða kl 03.00 voru S 29 m/s í jafnavind og mesta kviða 43 m/s,var það mesti vindur sem mældist þar í þessu veðri.Og kl 04.00 eru S 29 m/s og mesta kviða er þá 42 m/s,og fer þá að draga verulega úr vindi eftir það.

Það má segja að Árneshreppur  hafi sloppið vel í þessu veðri þótt fólk hafi oft hrokkið upp í nótt í stormkviðunum.

Kvartett Camerata heldur útgáfutónleika nýs hljómdisks í Sjóræningjahúsinu á Patreksfirði laugardaginn 20. september kl. 20. Aðgangseyrir er kr. 1.000 og rennur óskiptur til styrktar Krabbameinsfélagi Tálknafjarðar og Vesturbyggðar. Fólk er hvatt til að mæta, hlusta á fallega tónlist og styrkja um leið málefni krabbameinssjúkra á suðursvæði Vestfjarðakjálkans.

 

Kvartett Camerata skipa systurnar Mariola og Elzbieta Kowalczyk, tónlistarkennarar í Vesturbyggð, Magnús Ólafs Hansson, verkefnastjóri í Vesturbyggð, og Steingrímur Þorgeirsson, sjúkraþjálfari á Ísafirði. Kvartettinn var stofnaður í Bolungarvík á vordögum 2001 og hefur komið fram bæði hérlendis og erlendis.

 

Á diskinum sem hér er fylgt úr hlaði syngur kvartettinn m.a. lög frá 16. og 17. öld, ættuð frá Rússlandi, Spáni og Póllandi, og nokkur yngri íslensk lög. Erlendu lögin sem mörg hver eru vel þekkt hérlendis hafa ekki áður verið gefin út á íslensku.

 Nú í þessari viku var hafist handa við að gera við smábátabryggjuna á Norðurfirði.

Hrunið hafði úr hluta bryggjuþils alveg niður fyrir sjólínu.

Soðnir eru saman stálbitar og klætt á þá og þeim slakað niður og steypt í mótin.

Guðbrandur Torfason smiður sér um verkið ásamt þremur öðrum kafari er líka við vinnu við að koma mótunum niður fyrir sjólínu.

Guðbrandur Torfason er héðan úr sveit og;er sonur Torfa Guðbrandssonar fyrrum skólastjóra við Finnbogastaðaskóla;og er byggingarmeistari í Reykjavík.

Veðurstofa Íslands.
Veðurstofa Íslands gerir nú vefstjórum kleift að birta án fyrirhafnar veðurupplýsingar á vefjum sínum. Þannig geta vefstjórar birt þau veðurkort sem nýtast best notendum viðkomandi vefs.

Þjónustan er ókeypis. Hún byggir á 'iframe'-tækninni. Í raun og veru birtist þá sérsniðin síða frá vedur.is inni í síðu viðkomandi vefs.
Útfærðir hafa verið tveir stórir iframe-rammar sem ætlað að vera meginefni heillar síðu. Fleiri iframe-rammar verða útfærðir ef margir óska eftir því.

Þessi þjónusta er ekki síst ætluð héraðsfréttamiðlum, ferðaþjónustuvefjum og öðrum litlum og miðlungsstórum vefjum. Á þennan hátt geta vefir nú birt glöggar veðurupplýsingar án þess að þurfa vísa notendum af sínum vef.

Skoða nánari upplýsingar um iframe-þjónustuna
Frétt og mynd af www.vedur.is