Lögreglan hvetur ökumenn vélsleða til að haga akstri og flutningi þessara tækja í samræmi við lög og reglur.

Eitt umferðaróhapp var tilkynnt til lögreglu í liðinni viku, um var að ræða bílveltu á Flateyrarvegi þar sem fólksflutningabifreið rann út af veginum. Ekki slys á fólki. Aðfaranótt sunnudags var ekið á gangandi vegfaranda á Strandgötu á Patreksfirði. Hinn slasaði var fluttur með þyrlu LHG á Háskólasjúkrahús, slysadeild í Reykjavík til skoðunar. Hann hlaut alvarlega áverka en þó ekki lífshættulega. Málið er til rannsóknar hjá lögreglunni en ökumaður er grunaður um ölvun við akstur. Ástæða er til að benda hlutaðeigandi aðilum á að akstur vélsleða í þéttbýli er ekki leyfilegur enda eru þessi ökutæki flokkuð sem torfærutæki. Talsvert hefur borðið á því að ökumenn virði ekki þessar reglur. 

Jarðstrengir voru lagðir í sumar sem leið.

Rafmagnsleysi hefur verið mjög títt í Árneshreppi á Ströndum undanfarnar vikur. Halldór Magnússon, framkvæmdastjóri rafveitusviðs hjá Orkubúi Vestfjarða, segir mikla ísingu hafa verið á línunni yfir Trékyllisheiði og hún hafi slitnað á fleirum en einum stað. Þá gerði vonskuveður á heiðinni viðgerðarmönnum erfitt fyrir. Halldór segir að skemmdir á línum hefðu orðið mun meiri ef Orkubúið hefði ekki gert skurk í að koma þeim í jörð á síðasta ári. „Við framkvæmdum fyrir 50 milljónir í hreppnum í fyrra og á framkvæmdaáætlun 2014 eru ráðgerðar framkvæmdir fyrir 33 milljónir í Árneshreppi,“ segir Halldór í viðtali við bb.is á föstudaginn 10., janúar. Enn fremur segir Halldór að í ár sé ráðgert að koma línunni sem liggur frá botni Reykjarfjarðar um Naustvíkurskörð yfir í Trékyllisvík í jörð.

Háspennulínan á Trékyllisheiði.

Vegna mikilla snjóalaga víða á hálendi, vill Orkubú Vestfjarða benda á eftirfarandi: Víða er mikill snjór til fjalla og þess vegna ættu allir þeir sem ferðast að vetrarlagi utan alfaraleiða að sýna sérstaka aðgát. Háspennulínur eru ekki alltaf sýnilegar vegna snjóa og slæms skyggnis. Eins getur fjarlægð upp í leiðara orðið hættulega lítil í miklum snjó. Í óveðri sem varð yfir hátíðirnar féllu línur af völdum veðursins og fullnaðarviðgerð er ekki lokið alls staðar.
Á Trékyllisheiði er jarðstrengur lagður á snjó til bráðabirgða milli staura og eins eru dæmi um lága staura vegna brots.  Sýna þarf sérstaka varúð í þessu svæði.Í miklu fannfergi minnkar bilið frá jörðu að línu og einnig er hætta á að ísing á línum leiði til þess að línurnar sigi mikið.  Við allra verstu aðstæður liggja leiðarar alveg niður í snjó. 

Við þessar aðstæður, þegar bilið milli yfirborðs og línu er orðið þetta lítið, skapast hættuástand og lífsnauðsynlegt að gæta ýtrustu varúðar.

Flugvél Mýflugs á Gjögurflugvelli.

Í dag tókst flugfélaginu Ernum að fljúga á Gjögur,ekkert hafði þá verið flogið á Gjögur síðan fyrir hádegi á gamlársdag. Hvassviðri og dimmviðri,ísing og lágskýjað veður hefur séð til þess að ekki hefur verið hægt að fljúga fyrr. Talsverður póstur og vörur komu í dag með vélinni,einnig fór póstur suður. Ekkert verður flogið aftur fyrr en á mánudaginn 13.,janúar.