Minnt er á að nú líður að því að umsóknarfrestur um styrki frá Menningarráði Vestfjarða renni út, en umsóknir þurfa að berast eða vera póststimplaðar í síðasta lagi fimmtudaginn 14. apríl. Tilgangur styrkjanna er að efla menningarstarfsemi og menningartengda ferðaþjónustu á Vestfjörðum.

Áherslur við fyrri úthlutun 2011.

Hægt er að sækja um stuðning við hverskyns menningarverkefni, svo framarlega að umsókn eða verkefni stangist ekki á við úthlutunarreglur sem samþykktar eru við hverja úthlutun. Umsækjendur geta verið einstaklingar, félög, fyrirtæki, stofnanir og sveitarfélög.

Menningarráð Vestfjarða hefur ákveðið að við fyrri úthlutun ársins 2011 verði horft sérstaklega til verkefna sem uppfylla eitt eða fleiri eftirtalinna atriða:

Verkefni sem efla samstarf á sviði menningarmála á Vestfjörðum.

Verkefni sem stuðla að nýsköpun og fjölbreytni í menningartengdum verkefnum.

Verkefni sem fjölga atvinnutækifærum á sviði menningar.

Menningarstarfsemi sem styður við ferðaþjónustu.

Verkefni sem stuðla að þátttöku barna og unglinga í listsköpun og menningarstarfi.

Meira

Fréttatilkynning:
Næstu daga mun Pósturinn senda bréf á flest heimili landsins fyrir utan fjölbýlishús eða um 55 þúsund heimili þar sem tilkynnt verður að frá 15. maí næstkomandi verða aðeins afhentar sendingar sem stílaðar eru á þá sem merktir eru á lúgu eða póstkassa heimilisins. Þessi vinnuregla hefur ávallt verið viðhöfð til íbúa fjölbýlishúsa og verður því engin breyting þar á.

Pósturinn vill tryggja að allir landsmenn fái eingöngu þann póst sem þeim er ætlaður. Margir þekkja það áreiti og fyrirhöfn sem hlýst af því að fá annarra manna póst inn á sitt heimili og einnig ef póstur berst ekki til réttra aðila. Því er mikilvægt að allir íbúar heimilisins séu vel merktir til að póstur berist til þeirra og sé ekki endursendur til sendanda.
Nánar hér hja Póstinum.
Hjá póstinum er hægt að skoða hvað þú getur gert í merkingum og þar með leiðbeint póstinum við sína vinnu,að dreifa póstinum til þín Hjá Póstinum geta allir fengið hurðar-eða póstkassamerkingar á verði þar sem öllu er stillt mjög í hóf.
Skoðið hér.

Eftir fund ríkisstjórnar Íslands á Ísafirði á dögunum varð ræða sveitarstjóra Strandabyggðar Ingibjargar Valgeirsdóttur,að umhugsunarefni hjá Ögmundi Jónassyni innanríkisráðherra og skrifaði pistil um fundinn og varð tíðrætt um ræðu Ingibjargar á heimasíðu sinni.Látum Ögmundur hafa orðið:

Fundinn opnaði Albertína F. Elíasdóttir, formaður Fjórðungssambands Vestfirðinga, þá kom Ásthildur Sturludóttir, sveitarstjóri úr Vesturbyggð, svo Eyrún I. Sigþórsdóttir, sveitarstjóri Tálknafjarðarhrepps og Elías Jónatansson, bæjarstjóri Bolungavíkurkaupstaðar. Lestina rak í hópi framsögumanna, Ingibjörg Valgeirsdóttir, sveitarstjóri Strandabyggðar. Fleiri tóku til máls í umræðunum og má þar nefna Daníel Jakobsson, bæjarstjóra á Ísafirði.
Rauði þráðurinn í málflutningi sveitarstjórnarfólksins var öllum augljós: Við viljum sitja við sama borð og aðrir landsmenn í samgöngumálum, hvað varðar húshitunarkostnað, flutningskostnað og velferðarþjónustu. Ekkert meira, ekkert minna, bara sama og aðrir.

Margt var vel sagt á þessum fundi. Eftirminnileg eru orð Ingibjargar, sveitarstjóra Strandabyggðar, sem minntist æskuára sinna í Trékyllisvík. Sú vík væri ekki smá í sínum huga heldur stór og hefði farið vaxandi í vitund sinni eftir því sem á ævina hefði liðið og hún sjálf  farið víðar um heiminn. Henni mæltist á þá leið að sér fyndust forréttindi að færa ungu barni sínu þennan stað til fá rótfestu fyrir lífið. Það sem Ingibjörg Strandakona og valkyrjurnar af Vestfjöðrum voru að segja - fyrirgefið strákar, þið voruð líka flottir - var ef til vill fyrst og fremst þetta: Við megum aldrei gleyma því að alls staðar búa í fólki hæfileikar og sköpunarkraftur. Á hann má ekki stíga. Hann verður að virkja og láta blómstra okkur öllum til góðs.

Hér er svo hægt að sjá pistil Ögmundar í heild sinni.

Í dag fimmtudaginn 7. apríl 2011, verður stigið stórt skref í sögu verslunar á Hólmavík þegar rekstur söluskála Kaupfélags Steingrímsfjarðar verður sameinaður verslun þess við Höfðatún 4.

Undanfarna níu mánuði hafa staðið yfir framkvæmdir við verslunina þar sem reist var 150 fermetra viðbygging sem hýsir nú veitingasal og salerni. Talsverðar breytingar voru gerðar í versluninni sjálfri til að koma eldhúsi og afgreiðslulínu fyrir. Viðbyggingin sem tekin verður í notkun 7. apríl mun leysa af hólmi húsnæði sem tekið var í notkun 23. júlí 1982.

Óhætt er að segja að um talsverðar breytingar séu að ræða, sér í lagi þar sem opnunartími verslunar mun lengjast og allt aðgengi verða betra.  Í veitingasal eru stólar fyrir 60 manns sem er ríflega tvöföldun frá því sem hægt var að bjóða í fyrri skála.

Margvísleg opnunartilboð verða helgina 8.-10. apríl og verða þau kynnt betur á heimasíðunni á föstudag og í verslun.

Opnunartími mun verða sem hér segir:
Mánudaga til föstudaga: 09:00 - 22:00Laugadaga og sunnudaga: 10:00 - 22:00.
Nánar á www.ksholm.is og fleyri myndir.

Kjörstaður vegna þjóðaratkvæðagreiðslu um Icesave um samþykkt eða synjun laga nr.13/2011 verður þann 9.apríl laugardag og verður í félagsheimilinu í Árnesi Trékyllisvík.

Kjörfundur hefst klukkan 10.árdegis.

Oddviti kjörstjórnar er Ingólfur Benediktsson.

Fjöldi gesta lögðu leið sína í opið hús og vöffluveislu í Þróunarsetrinu 1. apríl þar sem starfsfólk setursins og sveitarstjórn Strandabyggðar tók á móti gestum og kynntu aðstöðu og starfsemi. Sveitarfélagið Strandabyggð flutti nýverið skrifstofur sínar af Hafnarbraut 19 í Þróunarsetrið að Höfðagötu 3 og er nú með öfluga starfsemi á miðhæðinni. Í Þróunarsetrinu eru einnig starfsstöðvar Þjóðfræðistofu, Atvinnuþróunarfélags Vestfjarða, Menningarráð Vestfjarða, Fræðslumiðstöð Vestfjarða, Verkalýðsfélag Vestfjarða og Náttúrustofa Vestfjarða.
Frá þessu er sagt á vef sveitarfélags Strandabyggðar.

Í dag eins og í gær mun Orkubú Vestfjarða á Hólmavík taka rafmagn af í Árneshreppi frá kl 13:00 til 16:00 vegna viðhaldsvinnu á Trékyllisheiði í dag.

Verið er að endurnýja bindingar á staurum,en þær tærast með tímanum.

Unnið var í fyrra við þetta á syðrihluta heiðarinnar enn nú nyrðrihluta Trékyllisheiðar.

Vegna þessa rafmagnleysis verður útibú Sparisjóðs Strandamanna á Norðurfirði lokað í dag. En þetta er sá tími dagsins sem hann er opinn venjulega á milli eitt og fjögur.

Í  liðinni viku gekk umferð í umdæmi lögreglunnar á Vestfjörðum nokkuð vel og án óhappa, ekkert umferðaróhapp var tilkynnt til lögreglu, þó voru þrír ökumenn stöðvaðir fyrir of hraðan akstur, tveir á Ísafirði og einn í nágrenni við Hólmavík, sá sem hraðast ók, var mældur á 111 km/klst., þar sem leyfilegur hámarkshraði er 90 km/klst.

Skemmtanahald gekk nokkuð vel fyrir sig um liðna helgi, eitthvað var um pústra milli manna og ein líkamsárást var tilkynnt til lögreglu.

Nú eykst umferð reiðhjólamanna með hækkandi sól, því vill lögregla  koma á framfæri ábendingum til foreldra og forráðamann barna og unglinga um gildi þess að nota reiðhjólahjálma, en eitthvað ber á því að hjálmanotkun sé ábótavant.
Segir í tilkynningu frá lögreglu.

Orkubú Vestfjarða á Hólmavík mun taka rafmagn af í Árneshreppi nú eftir hádegið eitthvað fram eftir degi vegna viðhaldsvinnu á Trékyllisheiði í dag.

Veðrið í Mars 2011.

Yfirlit yfir veðrið frá veðurstöðinni í Litlu-Ávík.

Mánuðurinn byrjaði með Suðvestanáttum eða Suðlægum fram til 8.mánaðar,síðan Norðan og NA fram til 11.með nokkru frosti.

Síðan gerði Suðvestanáttir aftur fram til 18.Síðan voru Suðvestanáttir eða Austlægar vindáttir á víxl,síðustu daga mánaðar var hægviðri með breytilegum vindáttum.Mánuðurinn var mjög kaldur í heild.Þann 3. gerði Suðvestan hvassviðri og eða storm með miklum kviðum uppí 31 m/s.Þann 6 gerði einnig Suðvestan hvassviðri og eða storm og rok með kviðum allt uppí 30 m/s.Norðan hvassviðri var þann 10.með mjög dimmum éljum.

Þann 14 gerði Suðvestan storm,rok og ofsaveður kviður fór allt uppí 46 m/s og á Gjögurflugvelli mældist kviða í 51m/s.

Tjón varð í Suðvestan veðrinu þann 14,gömul hlaða fauk við Víganes og á Grænhóli fauk járn af hlöðu og gafl.Á Gjögri kengbognaði gömul vindmilla.Foktjón varð einnig á Norðurfirði,þar sem rúður brotnuðu og gámar fuku á geymslusvæði við bryggjuna þar.Vindur náði 12 vindstigum (eldra mæligildi) í kviðum þann 14 mars.

 

Dagar eða vikur.

Meira