Sveitarfélögin   Árneshreppur,  Kaldrananeshreppur,  Strandabyggð og  Reykhólahreppur auglýsa nýtt og spennandi starf sameiginlegs félagsmálastjóra laust til umsóknar. Sveitarfélögin  bjóða upp á heillandi mannlíf, einstaka náttúrufegurð og fjölbreytt starfsumhverfi. Um er að ræða 70% starf með möguleikum á viðbótarverkefnum hjá sveitarfélögunum. 

Helsta starfssvið félagsmálastjóra:
Almenn fagleg félagsleg ráðgjöf

Yfirumsjón með málefnum fatlaðra

Móttaka og úrvinnsla á umsóknum um fjárhagsaðstoð

Mannaforráð og skipulag félagslegrar heimaþjónustu

Forvarnir, fræðsla og samskipti við íbúa í sveitarfélögunum

Önnur málefni félagsþjónustu sem upp koma á svæðinu

 Hæfniskröfur:

Félagsráðgjöf, þroskaþjálfun eða sambærileg menntun sem nýtist í starfi

Reynsla og framhaldsmenntun í stjórnun æskileg

Reynsla af starfi við félagsþjónustu, málefni fatlaðra eða sambærilegum störfum mikilvæg

Hæfni í mannlegum samskiptum, forystu- og skipulagshæfileikar

Frumkvæði og sjálfstæð vinnubrögð

Góð tölvukunnátta

Hæfni til að tjá sig í ræðu og riti

Leitað er eftir einstaklingi sem hefur áræðni og dug til að vera leiðandi í uppbyggingu og þróun á félagsþjónustu á svæðinu. Félagsmálastjóri vinnur náið með nýrri sameiginlegri velferðarnefnd sveitarfélaganna fjögurra. Starfið krefst ferðalaga um svæðið og þarf félagsmálastjóri að hafa bílpróf og bíl til umráða.Staðsetning meginsstarfsstöðvar félagsþjónustunnar verður ákveðin í samráði við nýjan félagsmálastjóra.
Umsóknum ásamt ferilskrá skal skilað til skrifstofu  Strandabyggðar Hafnarbraut 19 510 Hólmavík og í síma 4513510 eða á netfangið holmavík@holmavík.is
Umsóknarfrestur rennur út sunnudaginn 12 desember næstkomandi.

Bæjarins besta.
Bæjarins besta og bb.is efna til kosningar á Vestfirðingi ársins í samvinnu við Gullauga á Ísafirði og Skýrr hf. í Reykjavík líkt og gert hefur verið undanfarin níu ár. Til að koma tilnefningum á framfæri þarf að smella á auglýsingaborða á fréttasíðu Bæjarins besta og fylla út sérstakt form sem þar er á undirsíðu. Lesendur bb.is eru hvattir til að taka þátt í valinu og tilnefna þann Vestfirðing sem þeir telja að verðskuldi þessa nafnbót og eru þeir beðnir um að vanda valið þar sem öndvegis fólki hefur hlotnast þessi heiður í gegnum árin. Sá sem útnefninguna hlýtur fær henni til staðfestingar veglegan farandgrip frá Gullauga. Hægt er að skila inn tilnefningum til 31. desember. Tilkynnt verður um úrslitin á bb.is og í vikublaðinu Bæjarins besta fljótlega eftir áramótin.
Nánar hér á BB.ÍS.

Samkvæmt upplýsingum frá Jarðvísindastofnun Háskóla Íslands af radsjármyndum þar sem búið er að setja inn ísjaðarinn,frá því á föstudagskvöld og nú í dag um hádegi virðis hafísinn á svipuðu róli úti fyrir Vestfjörðum.

Eða nánar samkvæmt mynd á föstudagskvöld tekin kl:22:58 og þá var ísinn næst landi um 22 sjómílur Norður af Kögri.

Og nú í dag um hádegi sést af radsjármynd sem tekin var kl:11:54 að hafísinn er næst landi um 26 sjómílur N af Kögri,en sú mynd sýnir aðeins austari hluta svæðisins.

Samkvæmt ísmynd og hitamynd frá því klukkan 14:17 í dag frá Jarðvísindastofnun Háskólans þar sem búið er að setja inn hafísjaðarinn  er rúm 21 sjómíla í afar gisinn hafís NNV af Kögri en rúmar 30 sjómílur í þéttari hafís N af Kögri.
Í gær var um 28 sjómílur í ísinn frá Kögri.
Hér fylgja með Modis ísmynd og hitamynd frá Jarðvísindastonun HÍ.

Samkvæmt veðurspá Veðurstofu Íslands er spáin góð fyrir Vestfjarðakjálkann þótt gæti kastað einu og einu éli.Annars er veðurspáin hér fyrir Strandir og Norðurland vestra:Hægviðri og bjart veður.Vestan 3-10 á morgun,skýjað með köflum og stöku él á annesjum.Frost 2 til12 stig,kaldast í innsveitum.Minkandi frost á morgun.
Veðurhorfur á landinu næstu daga:
Á sunnudag og mánudag:
Norðlæg átt, 3-10 m/s, hvassast austast. Skýjað með köflum og dálítil él norðaustanlands, en yfirleitt bjart syðra. Hiti 0 til 5 stig á annesjum V-lands, en annars 0 til 12 stiga frost, kaldast inn til landsins.
Á þriðjudag:
Norðanátt með éljum eða snjókomu, en þurrt að mestu S og V-lands. Frost 0 til 10 stig.
Á miðvikudag:
Hæglætisveður og víða léttskýjað og kalt, en skýjað og frostlaust við V-ströndina.
Á fimmtudag:
Útlit fyrir suðvestanátt með vætu og hlýnandi veðri.
Lesendur munið eftir veðurpá sem hér til vinstri á vefnum.

Jólamarkaður Strandakúnstar á Hólmavík opnar sunnudaginn 5. desember og verður opinn alla daga milli 13:00 og16:00 fram á Þorláksmessu. Markaðurinn verður til húsa á sama stað og sölubúð Strandakúnstar var síðastliðið sumar, við Höfðagötu, á neðstu hæð Þróunarsetursins og er gengið inn á sama stað og inn í verslun KSH meðan hún var til húsa á þessum stað. Það er Ásdís Jónsdóttir sem er tengiliður Strandakúnstar vegna markaðarins og geta þeir sem áhugasamir eru um að selja varning haft samband við hana í síma 694-3306.
Þetta kemur fram á Strandir.is

Samkvæmt síðustu myndum var ísröndin næst landi í um 28 sjómílur frá Kögri samkvæmt Jarðvísindastofnun Háskóla Íslands eftir hádegið í dag.

Meðfylgjandi er hitamynd þar sem Ingibjörg Jónsdóttir Dósent í landfræði hefur sett hafísjaðarinn inná myndina.

Eins og sjá má á hitamyndinni er allstórt  nýmyndunarsvæði næst landi.

Myndin var tekin í dag klukkan 13:34.

Um morguninn þann 30 nóvember var ísinn næst landi um 47 sjómílur VNV af Straumnesi samkvæmt Landhelgisgæslunni sem fór í ískönnunarflug þann morgun,og samkvæmt radarmyndum þá.

Þannig að ísinn færist óðum nær landi.

Veðrið í Nóvember 2010.

Yfirlit yfir veðrið frá Veðurstöðinni í Litlu-Ávík.

Mánuðurinn var umhleypingasamur í heild,þótt sæmilegt veður gerði á milli.

Þann 1 til 3 gerði Norðaustan og Norðan hvassviðri og storm með slyddu eða talsverðri snjókomu,og var þetta fyrsta stórviðrið sem af er vetri.

Annað hret gerði dagana 11 til 13 með allhvassri og hvassri Norðaustan og Norðanátt.

Nokkuð úrkomusamt var fram yfir miðjan mánuð,en mun minni úrkoma seinnihluta mánaðar.

Jörð á láglendi fyrst talin alhvít þann 2.

Mikil hálka var í mánuðinum sérlega á vegum og víðar eftir að frysti og þiðnaði á víxl í þessum umhleypingum. 

Yfirleitt var sauðfé komið á hús og fulla gjöf uppúr 20 þessa mánaðar.

 

Dagar eða vikur.

1-4:Norðaustan og Norðan og NV hvassviðri eða stormur,þann 3 fór veður að ganga niður,slydda eða snjókoma,hiti +4 og niðrí -4 stiga frost.

5-6:Norðaustan í fyrstu síðan SV,gola en kaldi eða stinningskaldi þ.6,þurrt í veðri hiti frá -2 stigum uppí +4 stig.

7-10:Norðaustan,stinningsgola eða kaldi og stinningskaldi,rigning,skúrir og síðan él,hiti frá +5 stigum niðrí -3 stig.

11-13:Norðaustan og síðan Norðan,allhvass og hvassviðri með snjókomu,hiti frá 0 stigum niðrí -4 stig.

14-16:Breytilegar vindáttir,andvari,kul eða gola,þurrt í veðri 15 og 16,frost frá -6 stigum uppí +4 stiga hita.

17-18:Norðaustan stinningskaldi eða allhvass,en komin gola um kvöldið þ.18 slydda eða rigning,hiti 0 til +5 stig.

19-22:Breytilegar vindáttir eða logn,andvari eða kul,aðeins súld um morguninn þ.22,annars þurrt,hiti frá +5 stigum niðrí -2 stig.

23:Norðnorðaustan gola eða stinningsgola,súld um morguninn síðan smá él,hiti frá +3 stigum niðrí -1 stig.

24:Breytileg vindátt andvari eða kul,hiti +2 stig niðrí 2 stiga frost.

25-27:Norðlæg vindátt,kaldi í fyrstu,síðan stinningsgola eða gola,snjóél,en þurrt þ.26,hiti +1 stig niðrí 1 stigs frost.

28-30:Suðvestan og Vestan,stinningsgola kaldi eða stinningskaldi og allhvasst í kviðum,þurrt í veðri,frost frá -5 stigum uppí +7 stiga hita.

Meira

Fréttatilkynning frá Grand hótel Reykjavík. 

Á annan í aðventu, sunnudaginn 5. desember, verða haldnir hátíðlegir jólatónleikar á Grand hótel Reykjavík, Sigtúni 38. Japanski flautuleikarinn Yoko Owada mun flytja jólalög og sígildar perlur við píanóundirleik samlöndu sinnar Naomi Tsukamoto. Á undan tónleikunum er fordrykkur og fjögurra rétta japansk-íslenskur kvöldverður. Aðgangseyrir fyrir fordrykk, mat og tónleika er  5.600 krónur.

Japanski þverflautuleikarinn Yoko Owada kemur alla leiðina frá Japan til að gleðja okkur með hátíðartónum sínum. Yoko Owada er þekkt um allan heim fyrir flautuleik sinn og er hún frumkvöðull á sviði asískrar nútímatónlistar þar sem hún kallar fram framúrstefnulega tóna með tækni  sem skapað hefur henni sérstakan sess í heimi flaututónlistar.

Yoko Owada útskrifaðist sem flautuleikari frá tónlistarháskóla í Tokyo, Toho Gakuen University of Music.  Hún stundaði nám með heimsþekkta franska flautuleikaranum Jean-Pierre Rampal, við Listaháskólann í París, Conservatoire National de Musique de Paris, þar sem hún útskrifaðist með hæðstu einkunn í flautuleik árið 1977. Eftir það hóf hún nám í tónlistarskólanum í Freiburg, Musik Hochschule, í Þýskalandi undir leiðsögn Aurele Nicolet. Hún hefur unnið til margra alþjóðlegra verðlauna og má þar m.a. nefna  sérstök verðlaun fyrir flautuleik í alþjóðlegri tónlistarkeppni í Búdapest í Ungverjalandi árið 1980 og sama ár hlaut hún fyrstu verðlaun, East and West Artists Audition for Young Performers, í Carnegie Hall.

Meira

Rannsókna- og fræðasetur Háskóla Íslands á Vestfjörðum, Markaðsstofa Vestfjarða og Atvinnuþróunarfélag Vestfjarða stóðu fyrir framkvæmd könnunar á ferðamönnum til Vestfjarða sumarið 2010. Framkvæmd könnunarinnar var á þann hátt að Atvinnuþróunarfélagið sá um dreifingu spurningalista og kom henni fyrir á upplýsingamiðstöðum á Hólmavik og Ísafirði, ferðaþjónustufyrirtækinu  Borea Adventures, í Breiðafjarðarferjunni Baldri, Kaffi Norðurfirði, Hótel Flókalundi, Hótel Ísafirði og Eddu hótelinu á Ísafirði. Farþegar skemmtiferðaskipa og börn yngri en 18 ára voru ekki með í þessari könnun.
Könnunin er endurtekin frá árinu 2008 og 2009, en þá stóðu sömu aðilar að verkefninu og er samanburð á milli áranna að finna í skýrslu fyrir árið 2010.
Rannsóknin var gerð i þeim tilgangi að fá mynd af nokkrum grundvallaþáttum sem nauðsynlegt er að hafa í huga við skipulag og uppbyggingu ferðaþjónustu á Vestfjörðum og gefa niðurstöðurnar ákveðna mynd af því hvernig ferðamenn koma til Vestfjarða, hvernig ferðahegðun þeirra sé, hvaða þjónustu nýta þeir, hver er upplifun þeirra af svæðinu og svo framvegis.
Könnunina má sjá á vef Atvinnuþróunarfélags Vestfjarða.