Almennir haustfundir Bændasamtakanna hófust í dag mánudaginn 22. nóvember, og standa þeir til 6. desember. Alls verða fundirnir 16 talsins og verða þeir haldnir um allt land. Á fundunum verða m.a. rædd þau tækifæri sem landbúnaðurinn hefur til þess að efla þjóðarhag og hvar sóknarfæri liggja.
Nýgerður búnaðarlagasamningur verður til umfjöllunar og spurt verður hvernig unnt er að verja kjör bænda í erfiðu efnahagsástandi. Haraldur Benediktsson, formaður BÍ, segir í leiðara í nýju Bændablaði að meginerindi á bændafundum sé að heyra hvernig félagsmenn BÍ vilji beita sínum samtökum. Hann hvetur jafnframt alla bændur til að mæta því á bændafundum gefist kostur á að láta í sér heyra og hlusta á aðra.
Fundurinn fyrir Strandasýslu verður í félagsheimilinu Sævangi miðvikudaginn 24 nóvember og hefst kl:20:30.

Vegagerðin á Hólmavík tók þá ákvörðun að opna veginn norður í Árneshrepp í dag í stað þess á morgun.

Að sögn Vegagerðarinnar á Hólmavík var þessi ákvörðun tekin því veðurspá er sæmileg fram í tíman enda búið að vera ófært og eða þungfært síðan mokað var síðasta þriðjudag.

Gífurleg hálka er á vegum bæði hér innansveitar og á leiðinni til Bjarnarfjarðar.

Svellbunkar eru víða eins og tildæmis á Kjörvogshlíðinni og norður til Norðurfjarðar,á milli Stóru og Litlu kleyfa og í Urðunum sjálfum og einnig í Hvalvík fyrir norðan Árnesstapa.

Vegfarendur eru beðnir að fara varlega í þessari miklu hálku,sem hefur myndast í þessum umhleypingum undanfarið.

Gengið hefur verið frá samningi milli LS, BÍ og Ístex um ullarverð til bænda næstu 12 mánuði. Verðið hækkar um 8,92% að meðaltali frá fyrra ári en að þessu sinni hækka bestu flokkarnir meira en þeir lakari svo verðmunur milli flokka eykst. Til samanburðar þá hækkaði kjötverð til bænda um 2.2% milli áranna 2009 og 2010. Verðið er eftirfarandi:

Lamb: 700 kr/kg

H-1: 650 kr/kg

H-2, M-1-S, M-1-G og M-1-M: 560 kr/kg

M-2: 100 kr/kg

Fyrir flokkun eru greiddar 25 kr/kg. Verðið gildir frá og með 1. nóvember.
Frá þessu er sagt á vefnum BBL.is vefútgáfu Bændablaðsins.
Einnig kemur fram á vef Ístex sem kaupir ullina beint af bændum,að sala á ull hafi fjórfaldast frá júli í fyrra til júlí í ár.

Þann fyrsta nóvember var tekið í notkun afgreiðslukerfi í pakkhúsi Kaupfélags Steingrímsfjarðar á Hólmavík.Óhætt er að segja að um talsverð tímamót sé um að ræða í pakkhúsinu því hingað til hefur slíkt kerfi ekki verið þar til staðar. Kerfið, sem kemur frá MerkurPoint, er bæði afgreiðslu- og birgðakerfi sem mun skila sér í betri yfirsýn varðandi lagerstöðu og vöruúrval auk þess að gera afgreiðsluna markvissari og fljótlegri.
Undanfarnar vikur hefur starfsfólk í pakkhúsi unnið hörðum höndum að koma öllum vörum inn í kerfið en því miður er enn talsvert eftir. Vöruúrvalið er mikið og vörutegundirnar hlaupa á þúsundum. Á meðan enn er verið að setja inn vörur í kerfið og starfsfólk tileinkar sér nýja starfshætti má búast við byrjunarörðugleikum og er beðist velvirðingar á því.
Þá hafa verið gerðar talsverðar breytingar á fyrirkomulagi pakkhúss. Vörur sem tilheyra pakkhúsi en voru áður í verslun eru nú komnar í pakkhúsið og er því allt vöruúrvalið samankomið á einum stað, viðskiptavinum og starfsfólki til hagræðis. Að lokum var nýr inngangur gerður í október auk þess að afgreiðslan var færð til.
Þetta kemur fram á hinni nýju vefsíðu Kaupfélags Steingrimsfjarðar á Hólmavík sem var opnuð þann 20 október síðastliðin.
Vefsíðan var gerð af Baldri Jónassyni frá Bæ í Steingrímsfirði.
Vefsíða Kaupfélagins er www.ksholm.is

Borgarstjóri og samgöngu- og sveitarstjórnarráðherra ræddu málefni samgöngumiðstöðvar við Reykjavíkurflugvöll á fundi þann tíunda nóvember síðastliðinn. Ákveðið var að bæta aðstöðu til innanlandsflugs vestan við flugvöllinn og hverfa frá hugmyndum um byggingu samgöngumiðstöðvar.

Ögmundur Jónasson, samgöngu- og sveitarstjórnarráðherra, og Jón Gnarr borgarstjóri ræddust við ásamt aðstoðarmönnum sínum og helstu samstarfsmönnum. Fóru þeir vítt og breitt yfir skipulagsmál flugvallarins og hvaða kostir væru mögulegir til að bæta aðstöðu vegna innanlandsflugsins. Brýnt þykir að bæta aðstöðuna bæði farþega og þeirra fyrirtækja og starfsmanna sem sinna eða sinna vilja innanlandsflugi um Reykjavíkurflugvöll.

Varð niðurstaða ráðherra og borgarstjóra sú að kanna þessa leið nánar á svæðinu vestan við flugvöllinn á þeirri lóð sem afgreiðsla Flugfélags Íslands stendur nú. Þykir hún fýsilegri miðað við efnahagsaðstæður frekar en að reisa samgöngumiðstöð austan við flugvöllinn sem yrði einnig afgreiðsla fyrir rútur, strætisvagna og leigubíla. Ljóst er að auk byggingarinnar sjálfrar myndi fylgja henni umtalsverður kostnaður til dæmis við að malbika ný flughlöð og ný bílastæði við miðstöðina.
Nánar á vef Samgöngu og sveitarstjórnarráðuneytis.

Bæjarins Besta.
Mikil mildi var að ekki fór verr er skólabíll í Strandabyggð valt á hliðina fyrir stuttu. Forsvarsmenn Strandabyggðar vonast er til að skólabíllinn komi úr viðgerð innan tveggja vikna. Börn voru ekki í bílnum þegar óhappið varð en ökumaðurinn og einn farþegi voru fluttir til skoðunar í Reykjavík. Reyndust meiðsli þeirra vera minniháttar. Samkvæmt upplýsingum frá lögreglunni á Hólmavík var mjög hvasst er slysið varð og fauk bifreiðin út af veginum.
Þetta kemur fram á vef Bæjarins Besta.

Á nýliðnu kirkjuþingi kom fram tillaga frá kirkjuráði um sölu fasteigna,þar á meðal á tveim kirkjujörðum á Ströndum.

Önnur kirkjujörðin er Árnes I í Trékyllisvík,í greinargerð með tillögunum kemur fram að um sé að ræða eignir sem fyrirsjáanlegt sé að verði ekki not fyrir í þjónustu kirkjunnar og kostnaður kirkjumálasjóðs af áframhaldandi eignahaldi verði að líkindum meiri en tekjur.

Kirkjujörðin Árnes I er talin nitsöm jörð því eyjan Árnesey er í eigu jarðarinnar að hálfu og hinn helmingurinn er í eigu Árnes II.Oft er gott varp í eyunni og góð dúntekja.

Bændur í Árnesi II leigja nú jörðina og nytja æðarvarp í Árnesey.

Hin kirkjujörðin í Strandasýslu er Prestbakki í Hrútafirði.

Bændur taka inn féð.

Nú er sá tími komin að bændur eru að fara að hísa féð.Fyrir nokkru voru hrútar teknir inn og rúnir,einnig ásetnings lömb,og þaug rúin.Þetta er svona heldur fyrr enn í fyrra,eitthvað misjafnt eftir bæjum.

Nú eru bændur að taka fullorðna féið inn smátt og smátt til að rýja það,en ærnar verða helst að vera þurrar þegar rúið er,og er féið haft úti yfir daginn sem ekki er hægt að rýja strax ef þurrt er og sett inn að kvöldi.

Þannig að nú fer allt fé að vera komið á gjöf.

Öll ull fer til Ístex og eru bændur nokkuð sáttir við ullarverðið til þeirra.

Í vikunni sem var að líða var tilkynnt um þrjú umferðaróhöpp til lögreglu. Tvær bílveltur önnur á Súðavíkurhlíð og hin á Djúpvegi við Hólmavík. Ekki urðu slys á fólki í þessum óhöppum, en talsvert eignartjón. Þá var tilkynnt um eitt minni háttar óhapp á Ísafirði.

Þrír ökumenn voru stöðvaðir fyrir of hraðan akstur í nágrenni við Ísafjörð. Höfð voru afskipti af nokkrum ökumönnum vegna ljósabúnaðar bifreiða þeirra. Tíðarfar í vikunni hefur verið rysjótt og færð eftir því.

Hvetur því lögregla vegfarendur að aka með tilliti til þess og fara varlega.

Aðfaranótt s.l. föstudags var tilkynnt um reyk í íbúð á dvalarheimilinu Hlíf á Ísafirði. Lögregla og slökkvilið kölluð á vettvang.  Þar hafði gleymst pottur á eldavél. Íbúa í íbúðinni varð ekki meint af, en slökkvilið reykræsti íbúðina og stigagang. Litlar sem engar skemmdur urðu.

Öflugra samstarf stendur nú fyrir dyrum milli sveitarfélaganna Strandabyggðar, Árneshrepps, Kaldrananeshrepps og Reykhólahrepps. Sveitarfélögin hafa samþykkt að stofna sameiginlega félagsmálanefnd og stofna formlega félagsþjónustu. Í nýju nefndinni verða fimm fulltrúar, tveir fulltrúar frá Strandabyggð og einn fulltrúi frá hinum sveitarfélögunum. Undirbúningshópur vinnur nú að samningi um félagsmálanefndina og skilgreinir starfslýsingu, starfshlutfall og menntunarkröfur fyrir starf félagsmálastjóra en sú staða verður auglýst von bráðar. 
Þetta kemur fram á vef Strandabyggðar.