Strandir.is
Strandavegur (nr. 643) hefur verið nokkuð í umræðunni upp á síðkastið, en hann liggur um norðanverðar Strandir, úr botni Steingrímsfjarðar og um Bjarnarfjarðarháls og Veiðileysuháls norður í Árneshrepp. Kristján Möller samgönguráðherra sagði veginn erfiðan í umræðum á Alþingi í síðustu viku þegar rætt var um snjómokstursreglur sem eru í stuttu máli þær á þessari leið að ekki er gert ráð fyrir snjómokstri frá 1. nóvember fram í miðjan mars. Virðist sú regla nú eiga að gilda óháð tíðarfari, en Árneshreppur er eina sveitarfélagið á Íslandi sem ekki nýtur vegasambands allt árið. Alls hafa þrjú verkefni á þessum vegi dregist eða verið frestað síðustu árin, sem öll hefðu verið spor í rétta átt.
Sjá má allan pistilinn hér
Þetta kemur fram á www.strandir.is.

Fréttatilkynning.
Nú er tæp vika til stefnu til að sækja um styrki til Menningarráðs Vestfjarða við seinni úthlutun á árinu 2009 og eru þegar komnar nokkrar ágætar umsóknir í hús. Umsóknarfrestur er til 30. október og sækja þarf um styrki til afmarkaðra menningarverkefna á Vestfjörðum. Umsóknir bornar saman á samkeppnisgrundvelli, þannig að fara þurfa saman áhugaverð verkefni og góðar umsóknir til að líkur séu á að styrkur fáist. Menningarráð Vestfjarða hefur skilgreint ákveðna áhersluþætti við hverja úthlutun fram að þessu og við seinni úthlutun 2009 verður litið sérstaklega til menningarverkefna sem fela í sér eftirtaldar áherslur:
Meira

Læknirinn á Hólmavík kom norður í dag til að sprauta þá fyrstu sem fá svínaflensusprautu eða núna í þessari ferð tíu manns sem eru í forgangi.

Lækninum og bílstjóra hans gekk ferðin hálf brösuglega norður vegna ófærðar,sátu fastir á Kjörvogshlíðinni og bíll fór að norðan til að draga læknisbílinn upp.

Eins og fram hefur komið hér á vefnum fyrr í dag sýndi Vegagerðarvefurinn að aðeins væri þæfingur norður og greiðfært innansveitar,en nú er loksins búið að breyta því og nú er sagt þungfært norður og krapi og snjór innansveitar Norðurfjörður-Gjögur sem er alveg rétt.

Vegurinn er eingöngu fær stórum jeppum.

Nú er Norðan allhvass vindur og það snjóaði niðri byggð í nótt og morgun.
Eini staðurinn á landinu sem gefin er upp snjódýpt í morgun samkvæmt vef Veðurstofu Íslands er á veðurstöðinni í Litlu-Ávík einn cm.
Samkvæmt vef Vegagerðarinnar er þæfingsfærð norður Strandir í Árneshrepp og gæti lokast í kvöld.
Spáð er N eða NA stinningskalda eða allhvössum vind með snjókomu í fyrstu en síðan éljum um helgina með hita frá 0 til 2 stigum.

MBL.ÍS
Samgönguráðherra gat ekki á Alþingi lofað því, að snjó verði mokað reglulega af vegum í Árneshreppi í vetur en sagði að þau mál verði skoðuð á næstu vikum. Vandamálið í Árneshreppi væri vegurinn þangað og erfitt sé að halda honum opnum ef eitthvað snjóar þar.

Icesave-samkomulagið hefur svifið yfir vötnunum á Alþingi í dag en í fyrirspurnartíma í morgun sagðist Ásmundur Einar Daðason, þingmaður VG, vilja fara á næsta bæ við, snjómokstur í Árneshreppi.

Sagði Ásmundur Einar, að íbúar í þeim hreppi ættu rétt á því að komast leiðar sinnar eins og aðrir. Undanfarin ár hefði vegurinn verið mokaður tvisvar í viku að jafnaði fyrir áramót en eftir áramót hefði verið mokað eftir  geðþóttaákvörðunum og hópefli íbúanna, sem hefðu náð því fram að mokað væri kannski einu sinni í mánuði.  

Kristján L. Möller, samgönguráðherra, sagði að skoða þyrfti allar snjómokstursreglur út af niðurskurði líkt og ferjusiglingar, flug, rútuáætlanir og rekstur Vegagerðar. „En ég vil taka skýrt fram að ég  hugsa alltaf vel til Árneshrepps, þessa minnsta sveitarfélags landsins," sagði Kristján.
Þetta er af vef www.mbl.is

Björgunarsveitin Strönd á Skagaströnd var kölluð út um tvöleytið í dag vegna 200 t netabáts sem er vélarvana um 18 sjómílur vestan Skagastrandar, eða rétt við Gjögur á Ströndum. Er báturinn með veiðarfæri í skrúfunni. Um 6-8 manns eru um borð.  Björgunarskipið Húnabjörg er rétt að koma að hinum vélarvana báti en ekki er talin vera mikil hætta á ferðum. Veður á svæðinu er þó ekki gott, 12-15 m/sek af NNA,eða kaldaskítur sé vitnað í orð heimamanna.
Húnabjörgin mun væntalega draga netabátinn til hafnar á Skagaströnd. Búist er við að verkið taki um fjórar klukkustundir.

Fjarskiptasjóður hefur nú uppfært staðarlista vegna háhraðanetsverkefnisins.
Á vef þeyrra segir að staðir geta fallið út eða komið inn í verkefnið á samningstímanum.

Leiðréttingar hafa verið gerðar þar sem að mistök við afmörkun markaðssvæða fyrir undirritun samnings voru leiðrétt.

Staðir sem bættust við verkefnið stuttu fyrir undirritun samnings voru sumir óyfirfarnir og þá hefur þurft að yfirfara og í sumum tilfellum að leiðrétta skráningu. Staðir hafa hreinlega gleymst og þ.a.l. verið bætt á listann eða þeir ekki uppfyllt skilyrði um búsetu og því verið teknir af listanum. Breyting á búsetu á samningstímanum kallar á stöðuga endurskoðun listans. Farið verður sérstaklega yfir staðalista hvers verkáfanga áður en uppbygging hans hefst. Fjarskiptasjóður áskilur sér rétt til breytinga á staðalista eftir þörfum.

 Staðarlisti ásamt breytingum verður uppfærður reglulega á vef fjarskiptasjóðs.
Listann má sjá hér.

Fréttatilkynning.
Ársfundur ASÍ 2009 er haldinn á Hilton hótelinu við Suðurlandsbraut í dag 22. og á morgun 23. október.  Yfirskrift fundarins verður Byggjum réttlátt þjóðfélag þar sem áherslan verður á hag heimilanna, efnahags- og kjaramál og atvinnumál og samfélagslega ábyrgð.  Verkalýðsfélag Vestfirðinga á rétt á 6 ársfundarfulltrúum þetta árið, en Finnbogi Sveinbjörnsson, Ólafur Baldursson, Gunnhildur Elíasdóttir, Halldór Gunnarsson, Finnur Magnússon og Erna Sigurðardóttir voru kosnir sem fulltrúar félagsins.  Allar upplýsingar varðandi umræðuskjöl fundarins má nálgast hér.

Bílamiðstöð ríkislögreglustjóra hefur afhent lögreglunni á Akureyri nýjan lögreglubíl af gerðinni Hyundai Santa Fe.  Kemur hann í stað Toyota Landcruiser sem bílamiðstöðin flytur á Ísafjörð til að leysa af hólmi sjö ára gamlan lögreglubíl sem nú fær nýtt hlutverk á Hvolsvelli.  Þaðan flytur bílamiðstöðin eldri lögreglubíl sem verður yfirfarinn og hafður til taks í sérstök verkefni í vetur.  Þá er verið að standsetja tvo nýja lögreglubíla sem fara á Blönduós og hinn á Suðurnes.

 

Það sem af er ári hefur bílamiðstöðin því afhent lögregluembættunum átta nýja lögreglubíla sem allir eru búnir vönduðum tækjum og búnaði í þágu löggæslunnar.  Lögreglan á Vestfjörðum fær nú öflugan bíl í umdæmið sem getur verið erfitt yfirferðar.

Stjórn Fjórðungssambands Vestfirðinga samþykkti á fundi sínum þann 17. september 2009, að boða til málþings um ákveðin málefni sveitarfélaga, þ.e. breytingar á regluverki Jöfnunarsjóðs sveitarfélaga og um lýðræðismál í sveitarfélögum.  Tækifærið verður einnig nýtt til umræðu um stöðu sveitarfélaga á Vestfjörðum. 

Málþingið er ætlað kjörnum sveitarstjórnarfulltrúum á Vestfjörðum, framkvæmdastjórum sveitarfélaga og gestum.  Það verður haldið í Félagsheimilinu á Hólmavík, föstudaginn 23 október og hefst kl 13.00.  Einnig verður boðið upp á léttan hádegisverð á fundarstað og hefst hádegisverður kl 12.00.  Dagskrá málþingsins og kynningarefni má finna hér.