Björgunarsveitin Strönd á Skagaströnd var kölluð út um tvöleytið í dag vegna 200 t netabáts sem er vélarvana um 18 sjómílur vestan Skagastrandar, eða rétt við Gjögur á Ströndum. Er báturinn með veiðarfæri í skrúfunni. Um 6-8 manns eru um borð.  Björgunarskipið Húnabjörg er rétt að koma að hinum vélarvana báti en ekki er talin vera mikil hætta á ferðum. Veður á svæðinu er þó ekki gott, 12-15 m/sek af NNA,eða kaldaskítur sé vitnað í orð heimamanna.
Húnabjörgin mun væntalega draga netabátinn til hafnar á Skagaströnd. Búist er við að verkið taki um fjórar klukkustundir.

Fjarskiptasjóður hefur nú uppfært staðarlista vegna háhraðanetsverkefnisins.
Á vef þeyrra segir að staðir geta fallið út eða komið inn í verkefnið á samningstímanum.

Leiðréttingar hafa verið gerðar þar sem að mistök við afmörkun markaðssvæða fyrir undirritun samnings voru leiðrétt.

Staðir sem bættust við verkefnið stuttu fyrir undirritun samnings voru sumir óyfirfarnir og þá hefur þurft að yfirfara og í sumum tilfellum að leiðrétta skráningu. Staðir hafa hreinlega gleymst og þ.a.l. verið bætt á listann eða þeir ekki uppfyllt skilyrði um búsetu og því verið teknir af listanum. Breyting á búsetu á samningstímanum kallar á stöðuga endurskoðun listans. Farið verður sérstaklega yfir staðalista hvers verkáfanga áður en uppbygging hans hefst. Fjarskiptasjóður áskilur sér rétt til breytinga á staðalista eftir þörfum.

 Staðarlisti ásamt breytingum verður uppfærður reglulega á vef fjarskiptasjóðs.
Listann má sjá hér.

Fréttatilkynning.
Ársfundur ASÍ 2009 er haldinn á Hilton hótelinu við Suðurlandsbraut í dag 22. og á morgun 23. október.  Yfirskrift fundarins verður Byggjum réttlátt þjóðfélag þar sem áherslan verður á hag heimilanna, efnahags- og kjaramál og atvinnumál og samfélagslega ábyrgð.  Verkalýðsfélag Vestfirðinga á rétt á 6 ársfundarfulltrúum þetta árið, en Finnbogi Sveinbjörnsson, Ólafur Baldursson, Gunnhildur Elíasdóttir, Halldór Gunnarsson, Finnur Magnússon og Erna Sigurðardóttir voru kosnir sem fulltrúar félagsins.  Allar upplýsingar varðandi umræðuskjöl fundarins má nálgast hér.

Bílamiðstöð ríkislögreglustjóra hefur afhent lögreglunni á Akureyri nýjan lögreglubíl af gerðinni Hyundai Santa Fe.  Kemur hann í stað Toyota Landcruiser sem bílamiðstöðin flytur á Ísafjörð til að leysa af hólmi sjö ára gamlan lögreglubíl sem nú fær nýtt hlutverk á Hvolsvelli.  Þaðan flytur bílamiðstöðin eldri lögreglubíl sem verður yfirfarinn og hafður til taks í sérstök verkefni í vetur.  Þá er verið að standsetja tvo nýja lögreglubíla sem fara á Blönduós og hinn á Suðurnes.

 

Það sem af er ári hefur bílamiðstöðin því afhent lögregluembættunum átta nýja lögreglubíla sem allir eru búnir vönduðum tækjum og búnaði í þágu löggæslunnar.  Lögreglan á Vestfjörðum fær nú öflugan bíl í umdæmið sem getur verið erfitt yfirferðar.

Stjórn Fjórðungssambands Vestfirðinga samþykkti á fundi sínum þann 17. september 2009, að boða til málþings um ákveðin málefni sveitarfélaga, þ.e. breytingar á regluverki Jöfnunarsjóðs sveitarfélaga og um lýðræðismál í sveitarfélögum.  Tækifærið verður einnig nýtt til umræðu um stöðu sveitarfélaga á Vestfjörðum. 

Málþingið er ætlað kjörnum sveitarstjórnarfulltrúum á Vestfjörðum, framkvæmdastjórum sveitarfélaga og gestum.  Það verður haldið í Félagsheimilinu á Hólmavík, föstudaginn 23 október og hefst kl 13.00.  Einnig verður boðið upp á léttan hádegisverð á fundarstað og hefst hádegisverður kl 12.00.  Dagskrá málþingsins og kynningarefni má finna hér. 

Þorsteinn J Tómasson sendi vefnum nokkrar myndir frá ferð eldri borgara úr Strandasýslu sem farin var í júní í sumar til Vestfjarða,Ísafjörð og Bolungarvíkur og í siglingu í Jökulfirði og fleiri staði.
Myndirnar eru teknar í Edinborgarhúsinu, á bryggjunni við báta Sjóferða Hafsteins og Kiddýjar og í harðfiskverkun Finnboga Jónassonar.´
Frétt sem sagði frá ferðinni í sumar hér á vefnum má sjá hér.
Engin texti er með myndunum því vefurinn hefur ekki nöfnin á öllu fólkinu en myndirnar eru alltaf skemmtilegar og fólk verður að þekkja sitt fólk.
Vefurinn Litlihjalli vill þakka Þorsteini J kærlega fyrir.

Í s.l. viku voru 6 ökumenn kærðir fyrir of hraðan akstur á Ísafirði og nágreni Ísafjarðar og sá sem hraðast ók, var mældur á 112 km/klst., þar sem leyfður ökuhraði er 90 km/klst.

Tvö minniháttar umferðaróhöpp urðu í umdæminu, ekið var á kyrrstæða bifreið Þann  15 okt,  á bifreiðastæði við stjórnsýsluhúsið/lögreglustöðina á Ísafirði, ekki vitað um tjónvald.  Þá varð minniháttar útafakstur þann 16 okt,við Stórholt, ekki slys á fólki.

Þó nokkuð margir ökumenn voru áminntir vegna ljósabúnaðar ökutækja sinna í vikunni og vill lögregla koma því á framfæri við ökumenn að huga að ljósabúnaði ökutækja sinna.

Ein líkamsárás  var kærð til lögreglu í vikunni.

laugardaginn 17 okt kom vegfarandi á lögreglustöðina á Ísafirði með Border Collie hund, sem hann fann uppi á Holtavörðuheiði, blautan og hrakinn.  Umræddur hundur var ekki með nein merki, þannig að ekki er vitað um eiganda og lýsir lögregla hér með eftir honum. Eigandi eða einhver sem gæti gefið upplýsingar vegna þessa vinsamlegast hafið samband við lögregluna á Vestfjörðum í síma 450-3730

Þriðjudaginn 13 okt gerist sá atburður að einhver aðili setti ómarkaða  lambgimbur inn í fundarsal bæjarstjórnar Vesturbyggðar á Patreksfirði.  Ekki er vitað hver þar var að verki, eða hver tilgangur var með athæfi þessu.  Greiðlega gekk að handsama lambið og voru  gerðar viðeigandi ráðstafanir vegna lambsins, þegar um ómarkað fé er að ræða.

Í september hefur hleðslumeistarinn Guðjón Kristinsson frá Dröngum í Árneshreppi verið að hlaða Guðrúnarlaug í Sælingsdal og mun fljótlega vera hægt að baða sig í lauginni. Það var fyrir u.þ.b. 140 árum sem skriða féll á laugina sem þá hafði sinnt hlutverki sínu frá dögum Guðrúnar Ósvífursdóttur. Uppbygging laugarinnar er í samræmi við þá stefnu, sem mótuð er í aðalskipulagi sveitarfélagsins, að efla menningartengda ferðamennsku á Laugum. 
Á vef þeyrra Dalamanna má sjá nánar um Guðrúnarlaug myndir og fleyra hér.

Í fyrradag voru smiðirnir Ragnar og Guðbrandur Torfasynir og heimamenn að undirbúa undir steypu dekkið á Gjögurbryggju.

Enn nú er búið að hlaða varnargarð við bryggjuna.

Í gær og í fyrradag voru menn í sjóbaði á bryggjunni sem voru við vinnu við undirbúning undir steypu  í suðvestan hvassviðrinu sem þá var,en miklar ágjafir gengu yfir bryggjuna.

Á föstudag átti að steypa en var ekki hægt vegna hvassviðris því ágjafir voru yfir bryggjuna.

Í dag var síðan steypt bryggjudekkið þar sem allt brotnaði upp í fyrra í miklum sjógangi.

Ágúst Guðjónsson verktaki kom með steypubíl frá Hólmavík og var steypan hrærð á staðnum.

Steypt var í ágætisveðri enn komin rigning eftir hádegi við seinnihluta steypuvinnu.

Flugfélagið Ernir hafa aflýst flugi annan daginn í röð til Gjögurs vegna hvassviðris og stormviðvörunar og óstöðugra vinda í háloftum.
Ekki er orðið mjög hvasst ennþá en farnar að koma talsverðar kviður.
Ekkert verður athugað með flug á Gjögur fyrr en á næsta mánudag sem er næsti áætlunardagur.
Þannig að það verður viku gamall póstur þá og vörur.