Boraðar voru tvær viðbótar holur við Ytra Skarð í Stóra-Ávíkurlandi í byrjun nóvember,en áður var búið að bora eina holu.Seinni holurnar tvær voru boraðar aðeins austar.
Nú eru komnar niðurstöður úr þessum hitastigulsholum og að sögn Hauks Jóhannessonar jarðfræðings hjá Íslenskum Orkurannsóknum er niðurstaðan sem hér segir:
"Niðurstaða borana er að í landi Stóru-Ávíkur nærri þeim stað þar sem borholurnar eru eru líkindi til að heitt vatnskerfi sé fyrir hendi þótt enginn jarðhiti sé á yfirborði. Í svona tilvikum eru boraðar grunnar borholur sem við nefnum hitastigulsholur og mælum í þeim hitann og sjáum hve hratt hann hækkar með dýpi. Holurnar í Ávík eru um og yfir 50 metra djúpar og hitastigullinn í þeim eru frá 100°C/km upp í 150°C/km þessi stigull er verulega hærri en við er að búast því svæðislægur hitastigull er vanalega um 50°C/km á Vestfjörðum. Þegar stigullinn er eins hár og í Ávík þá bendir það til að heitt vatnskerfi sé nærri. Borholan á Melum er köld og í henni eru tvær kaldar vatnsæðar og virðist hún ekki benda til nálægðar við heitt vatnskerfi."
Borinn Klaki er nú farinn héðan úr hreppnum og ekki verður borað meira að sinni.Vatnsborun ehf sem Árni Kópsson rekur sáu um boranir hér í Árneshreppi í haust.

Síðast var sagt hér á fréttasíðunni frá uppbyggingunni á Finnbogastöðum þann 13 nóvember.

Þá voru smiðir að fara í helgarfrí,en nú er allt á fullu aftur,unnið er úti ef veður leifir annars inni vegna mislyndra veðra.

Nú er nýr ljósastaur komin á sinn stað,enn Orkubúsmenn settu hann upp þann 13 nóv.

Á mánudag voru settar útihurðir og fleyra,í gær var hægt að klára að setja tjörupappann á þakið.

Og í dag er verið að ganga frá hurðum og kannski byrjað að setja stóru bílskúrsdyrnar upp,þannig að húsið verður lokað í dag.

Snjóél eru í dag eftir hádegi.

Nokkrar myndir í viðbót eru nú komnar inná Finnbogastaðir-bruninn og uppbygging.

Út er komin hjá Vestfirska Forlaginu bókin Lífvörður Jörundar Hundadagakóngs,eftir Guðlaug Gíslason.Sagan af Jónasi Jónssyni bónda í Litlu-Ávík á Ströndum konum hans og börnum,og er þetta heimildasaga.

Guðlaugur Gíslason er fæddur á Steinstúni hér í Árneshreppi árið 1929.

Foreldrar hans voru Gísli Guðlaugsson og Gíslína Vilborg Valgeirsdóttir ábúendur á Steinstúni.

 

Í bók þessari segir Guðlaugur sögu sem að ýmsu leyti má kalla einstaka og gerðist í Árneshreppi  á Ströndum og spannar á einhvern hátt alla nítjándu öldina og vel það.

Reyndar berst sögusviðið út fyrir mörk Árneshrepps um tíma.

Hér er um að ræða söguna af Jónasi Jónssyni,sem kenndur var við Litlu-Ávík,konum hans og börnum.

Jónas og Sesselja kona hans voru dæmd fyrir sauðaþjófnað heima í héraði.

Í héraðsdómnum segir:

“Jónas Jónsson og Sesselja Jónsdóttir skulu án allrar vægðar pískast við kagan.

Síðan burtsendist Jónas til að erfiða í járnum í Kaupmannahafnar Festingu en Sesselja í Tugthúsinu í Cristianshöfn,bæði þeirra lífstíð.”

Í landsyfirréttinum var héraðsdómurinn yfir Jónasi algjörlega staðfestur en dómurinn yfir Sesselju mildaður þannig að hún var dæmd til eins árs erfiðis í Íslands tugthúsi.

Af einhverjum ástæðum voru þau Jónas og Sesselja bæði vistuð í Íslands tugthúsi í nokkur ár.

Jónas varð svo einn  af lífvörðum Jörundar hundadagakóngs sem hér ríkti um stutt skeið árið 1809.Mega það teljast undarleg örlög.

“Segir í kynningu bókar”

 

Í síðustu viku urðu fjögur umferðaróhöpp á Vestfjörðum.  Um kl. 14:00 á mánudeginum valt bifreið út af veginum um Breiðadal í Önundarfirði.  Ökumaður og þrír farþegar voru í bifreiðinni og voru allir fluttir með sjúkrabifreið á sjúkrahúsið á  Ísafirði.  Ekki er talið að neinn þeirra hafi verið alvarlega slasaður.   Þá valt bifreið út af veginum um Súgandafjörð á miðvikudaginn.  Ökumaður var einn í bifreiðinni og reyndist ekki mikið slasaður.  Á föstudagskvöldið kl. 20:30 fór bifreið út af veginum í Álftafirði og hafnaði í sjónum.  Ökumaður og farþegi náðu að komast í land af sjálfsdáðum, nokkuð kaldir og þrekaðir.  Þessir aðilar voru fluttir á sjúkrahúsið á Ísafirði þar sem þeir voru lagðir inn til eftirlits.  Bifreiðarnar sem komu við sögu í þessum óhöppum voru allar fluttar óökuhæfar af vettvangi.  Þessu til viðbótar fór fiskflutningabifreið út af veginum um Tungudal í Skutulsfirði á laugardaginn.  Engin slys urðu þar og ekki vitað um skemmdir á bifreiðinni.

Í vikunnu voru fjórir ökumenn kærðir fyrir of hraðan akstur, flestir í nágrenni við Ísafjörð.  Sá sem hraðast ók var kærður fyrir að aka á 109 km hraða þar sem hámarkshraði er 80 km/klst.

Þá voru þrír ökumenn stöðvaðir á Ísafirði í vikunni fyrir meintan akstur undir áhrifum fíkniefna. 

 

Félagsheimilinu á Bíldudal

laugardaginn 22. nóvember 2008

 

Kl. 09.45     Húsið opnað, kaffi á könnunni.

Kl. 10.00     Málþingið sett. Skjöldur Pálmason, formaður atvinnumálanefndar.

Kl. 10.10     Ferðaþjónusta í dreifbýli - Niðurstöður könnunar meðal ferðamanna á Vestfjörðum sumarið 2008. Alda Davíðsdóttir, ferðamálafræðingur Rannsókna- og fræðaseturs HÍ á Vestfjörðum.

Kl. 10.30     Ferðaþjónusta í Vestur-Barðastrandarsýslu - fræði og raunveruleiki.

Úlfar Thoroddsen, forseti bæjarstjórnar Vesturbyggðar.

Kl. 10.45     Vegakerfið á suðursvæði Vestfjarða.

                 Magnús Valur Jóhannsson, svæðisstjóri Vegagerðarinnar.

Kl. 11.00     Kynning á stoðgreinum ferðaþjónustunnar. Þorgeir Pálsson, frkvstj. atvest.

Kl. 11.15     Þróun ferðaþjónustu síðustu tveggja ára, framtíðarsýn og sóknarfæri. Fulltrúi Ferðamálafélags Barðastrandarsýslu.

Kl. 11.30     Matartengd ferðaþjónusta. Ásgerður Þorleifsdóttir, atvest.

Kl. 11.45       Ferðamál í nútíð og framtíð. Ragnar Jörundsson, bæjarstjóri í Vesturbyggð.

Meira

Frá Atvinnuþróunarfélagi Vestfjarða.
Atvinnuþróunarfélag Vestfjarða hefur verið að vinna að og móta verkefni er varðar matartengda ferðaþjónustu. Markmið með þeirri vinnu er að efla
samstarf innan svæðis er varðar staðbundna matvælaframleiðslu og leiða saman aðila frá veitingahúsum, verslunum, ferðaþjónustu og matvælaframleiðendur í þeim tilgangi að vinna saman að vöruþróun, sameiginlegri markaðssetningu og ýmislegt fleira. Það er alveg ljóst að möguleikarnir eru miklir og ýmis tækifæri vannýtt t.a.m. hvað varðar matvælaframleiðslu á Vestfjörðum.

Nú leitum við af aðilum í þessum greinum sem vilja koma að undirbúningi og þróun með okkur að verkefninu. Það er mikilvægt að bæði reynslumiklir og áhugasamir aðilar komi að þróuninni í upphafi og hafi þar með áhrif á verkefnið og vinnuna sem framundan er. Verkefnið mun svo vera opið öllum til þátttöku þegar undirbúningsferli er lokið.

Markmið verkefnisins eru m.a.:
- Byggja á sérstöðu svæðisins til að skapa virðisauka
- Efla samstarf innan og utan svæðis
- Gera vestfirsk matvæli sýnileg
- Nýjungar í framreiðslu
- Safna og vernda vinnuaðferðir og hefðir
- Auka gæðaímynd
- Hvetja veitingastaði til að nota staðbundið hráefni 


Við hvetjum fyrirtæki til að hafa samband við starfsmenn Atvest á Ísafirði, Hólmavík og Patreksfirði til að kynnast verkefninu og skrá sig til þátttöku í undirbúningshópinn.

Starfsmenn Atvest,

Ásgerður Ísafirði, sími 450 3053,
Viktoría Hólmavík, sími 451 0077
Guðrún Patreksfirði, sími 490 2350

Seint í gær og í gærkvöld var byrjað að klæða þakið á Finnbogastöðum með þakpappa,síðan átti að halda áfram við það í morgun en varla vinnandi uppá þaki vegna ísingar.

Gífurleg ísing hefur verið í dag og allt fljúgandi sleipt og ísað.

Menn frá Orkubúi Vestfjarða á Hólmavík voru að tengja rafmgnskassa(skáp)við húsið fyrir nýtt rafmagnsinntak og láta upp nýjan ljósastaur og tengja.

Kristján Guðmundsson sá um að grafa fyrir köplum og staur fyrir Orkubúið.

Eins og kom fram í gær fara smiðirnir í frí seint í dag í helgarfrí.

Fleiri myndir í myndasafni. 

Unnið í þaki.

Í dag var verið að vinna við að klæða þakið á Finnbogastöðum í góðu veðri en talsverðu frosti.

Í dag verður langt komið með að klæða þakið og nú undir kvöld má segja að húsið sé fokhelt,enn vantar útihurðir en búið er að setja plötur til bráðabyrgða í bílskúrsdyr þar sem stóra hurðin á að vera.

Nú er jafnvel byrjað að setja tjörupappa á þakið.

Kristján Guðmundsson var mættur nú seinnipartinn með gröfu fyrir Orkubú Vestfjarða á Hólmavík til að grafa fyrir rafmagnsinntaki úr endastaur og í hús.

Um komandi helgi fara smiðirnir í frí,en þeyr taka frí aðra hvora helgi.

Átta nýjar myndir settar inn í Myndaalbúm.

 

Í gærdag handtók lögreglan á Vestfjörðum tvo menn sem voru að koma með áætlunarflugi til Ísafjarðar frá Reykjavík.  Þeir voru grunaðir um að hafa fíkniefni í fórum sínum. Við leit á mönnunum fannst lítilræði af kannabisefnum og ætluðu amfetamíni.  Mönnunum var sleppt að yfirheyrslu lokinni.  Þeir hafa báðir komið við sögu lögreglu áður.

Á árinu 2008 hefur lögreglunni á Vestfjörðum orðið vel ágengt í fíkniefnaeftirliti.  Það sem af er þessu ári hefur lögreglan  lagt hald á 800 grömm af fíkniefnum í 41 haldlagningu.  Til samanburðar hefur að meðalatali verið lagt hald á um 220 grömm af fíkniefnum í 22 haldlagningum, undanfarin 5 ár.   

Lögreglan á Vestfjörðum hvetur almenning til að vera vel á varðbergi og veita allar upplýsingar um fíkniefnameðhöndlun, því ekkert verður gefið eftir gagnvart fíkniefnadreifingu  í umdæminu. Þeir sem hafa slíkar upplýsingar vinsamlegast hafi samband í síma lögreglunnar á Vestfjörðum  450 3730 eða símsvara lögreglunnar og tollgæslunnar á landsvísu 800 5005. 

Vefurinn Litlihjalli hefur nú fyrir stuttu síðan gerst áskifandi að vef Lögreglunnar og fær því allar nýustu fréttir af Lögregluvefnum.
Áður var vefsíðan komin með áskrift af vef Ríkislögreglustjóra og Almannvörnum í gegnum þann vef.
Báða þessa vefi er hægt að sjá undir tenglum hér á síðunni.
Það munu verða sagðar fréttir af störfum Lögreglunnar á Vestfjörðum einu sinni eða oftar í viku ef þurfa þykir,og fréttir annarsstaðar frá ef efni standa til.
Og allar orðsendingar frá Ríkislögreglustjóra sambandi við viðvarinir,vegna veðurs eða annarra viðvarana.
Hér kemur svo fyrsta fréttin af störfum Lögregunnar á Vestfjörðum.

Þrjú umferðaróhöpp voru tilkynnt til lögreglunnar á Vestfjörðum í síðustu viku.  Á þriðjudeginum var bifreið ekið á grjót á veginum um Súðavíkurhlíð og urðu einhverjar skemmdir á bifreiðinni.  Þann sama dag var ekið á kyrrstæða bifreið á bifreiðastæði fyrir framan Landsbankann á Ísafirði.  Á miðvikudaginn varð bifreið fyrir grjóthruni úr Óshlíð.  Bifreiðin skemmdist talsvert og var flutt óökufær af vettvangi.  Ökumaður, sem var einn í bifreiðinni, hlaut minniháttar meiðsl.

Þrír ökumenn voru kærðir fyrir of hraðan akstur. Sá sem hraðast ók var stöðvaður á 115 km. hraða á Barðastrandavegi en þar er hámarkshraði 90 km/klst.

Á fimmtudaginn kl. 17:40 var tilkynnt um að eldur væri laus í rusli á bak við Faktorshúsið á Ísafirði.   Eldurinn var slökktur fljótlega og engar skemmdir urðu á húsinu.  Talið er líklegt að börn eða unglingar hafi borið eld að ruslinu og er málið í rannsókn.

Tveir menn gistu fangageymslur á Ísafirði vegna ölvunar og óspekta, aðfaranótt sunnudagsins. Þeir voru handteknir eftir að annar þeirra reyndi að sparka í lögreglubifreið sem ekið var fram hjá þeim á Hafnargötu í Bolungarvík.  Er maðurinn var handtekinn réðst félagi hans á lögreglumenn og  var sá handtekinn í kjölfarið.