Nokkrir bændur fóru framá það við Hreppsnefnd Árneshrepps að seinka leitum í um eina viku frá því sem venjulegt er,og varð hreppsnefnd við því.Bændur telja að vegna kuldanna í vor og framá sumar og heyskapur var mjög seint í sumar og enn eiga nokkrir bændur eftir að slá seinnislátt (há),og tún lítið farin að spretta aftur til að hafa fé af fjalli á túnum og vika gæti gert mikið uppá að beit lagist fyrir fé sem kemur af fjalli og haft oft í um hálfan mánuð þar til slátrun hefst.

Þannig að fyrsta leitarsvæðið í Árneshreppi það er norðursvæðið (Ófeigsfarðar svæðið),verður leitað 16 og 17 september,og réttað í Melarétt þann 17 september.Og því verður syðra svæðið smalað viku seinna og réttað í Kjósarrétt 24 september.

Hér á vefnum til vinstri fyrir ofan fleiri fréttir undir Leitir haustið 2011 má sjá fjallskilaseðilinn.

Á ársfundi Byggðastofnunar á Sauðárkróki í gær var í fyrsta sinn afhent samfélagsviðurkenning Byggðastofnunar - Landstólpinn, en ætlunin er að sú viðurkenning verði afhent árlega í framtíðinni. Óskað var eftir tilnefningum um einstakling, fyrirtæki, stofnun eða sveitarfélag, síðastliðið vor. Sérstök dómnefnd fór síðan yfir tilnefningar sem bárust og ákvað að veita Jóni Jónssyni á Kirkjubóli, menningarfulltrúa Vestfjarða, viðurkenninguna að þessu sinni.

Í rökstuðningi kom fram að um nokkurs konar bjartsýnisverðlaun væri að ræða og að Jón hafi með störfum sínum vakið jákvæða athygli á sinni heimabyggð og verið ötull talsmaður ferðaþjónustu og menningar á Vestfjörðum. Þá sé hann virkur í félagsstarfi og menningarlífi og að auki frumkvöðull í uppbyggingu ferðaþjónustu, menningarstofnana og fræðastarfs á svæðinu.

Jón Jónsson hefur frá hausti 2007 starfað fyrir Menningarráð Vestfjarða sem menningarfulltrúi. Hann situr jafnframt í sveitarstjórn Strandabyggðar frá 2010 og í stjórn Fjórðungssambands Vestfirðinga. Jón stofnaði héraðsfréttavefinn strandir.is árið 2004 og hefur verið ritstjóri hans síðan.

Það virðist ætla að verða lítið um ber hér í Árneshreppi í ár.Það fólk sem hefur kíkt á berjastaði,og fréttamaður Litlahjalla hefur haft samband við,segja þetta bara vera vísara eða óþroskuð ber.Sagt er að ber stækki og þroskist þegar farið er að dimma á nóttu og geta ber því stækkað eitthvað enn.Berjaspretta var mjög góð í fyrra og þá með því albesta sem fólk mundi eftir.

Í liðinni viku voru 6 umferðaróhöpp tilkynnt  til lögreglunnar á Vestfjörðum.  Þriðjudaginn 16. ágúst var ekið á ljósastaur á Patreksfirði, þar urðu ekki slys á fólki, en bifreiðin mikið skemmd eftir og óökuhæf.  Þriðjudaginn 17. ágúst urðu tvær bílveltur, önnur á Drangsnesvegi á Ströndum, þar hafnaði bifreið á hvolfi út fyrir veg og hin á Örlygshafnarvegi þar hafnaði bifreið út fyrir veg.  Í báðum þessum tilfellum voru erlendir ferðamenn á ferð, ekki var um slys að ræða, en bifreiðarnar óökuhæfar í báðum tilfellum og fjarlægðar með krana.  Föstudaginn 19. ágúst varð árekstur á Vestfjarðarvegi í Dagverðardal í Skutulsfirði, þar skullu saman tvær bifreiðar, fjórir voru í annarri bifreiðinni, þeir voru fluttir á sjúkrahúsið á Ísafirði til skoðunar, en tveir sem voru í hinni bifreiðinni sluppu án meiðsla. Um minni háttar meiðsl var að ræða.  Bifreiðarnar voru óökuhæfar og fluttar af vettvangi með krana.  Laugardaginn 20. ágúst varð bílvelta á Bíldudalsvegi  við Bæinn Foss í Arnarfirði, þar hafnaði bifreið út fyrir veg og valt, ökumann og farþega sakaði ekki, en bifreiðin óökuhæf og flutt af vettvangi með krana.  Aðfaranótt sunndags var óhapp á Holtavörðuheiðinni, þar mættust tveir bílar, Jeppi og fólksbíll, jeppinn með hestakerru og rakst kerran utan í fólksbílinn, með þeim afleiðingum að fólksbíllinn varð óökuhæfur, ekki urðu þar slys á fólki.
Meira

Þá er Íslandsmeistaramótinu í hrútadómum 2011 lokið. Alls tóku fimmtíu manns þátt, þrjátíu í flokki óvanra og tuttugu í flokki vanra hrútadómara. Það var Strandamaðurinn Guðbrandur Sverrisson á Bassastöðum sem fór með sigur af hólmi í flokki vanra þuklara, en Guðbrandur náði öðru sæti árið 2003 og því þriðja árið 2005. Guðbrandur hlaut til varðveislu í eitt ár verðlaunagripinn Horft til himins sem er tileinkaður minningu Brynjólfs Sæmundssonar ráðunautar, auk fjölda annarra verðlauna. Í öðru sæti varð Íslandsmeistarinn 2010, Elvar Stefánsson í Bolungarvík, og þriðja varð Guðlaug Sigurðardóttir bóndi á Hraunhálsi í Helgafellssveit á Snæfellsnesi.Nánar á www.strandir.is

Oddviti Árneshrepps hefur óskað eftir því við vefinn að minna á laust starf við að reka Kaffi Norðurfjörð af ,áhugasömum aðila/aðilum til að taka á leigu rekstur Kaffi Norðurfjarðar sem staðsett er á Norðurfirði á Ströndum. Um er að ræða sumarstarfsemi. Viðkomandi leigir og sér alfarið um rekstur kaffihússins. Margir hafa haft samband og jafnvel skoðað en engin hefur tekið ákvörðun en.

Hér til vinstri  á  vefnum  er auglýsingin í heild undir Kaffihús til leigu. Tilvalið er fyrir áhugasama aðila að koma og skoða staðinn.

Kaffi Norðurfjörður er staðsett í húsi sem áður hýsti verbúð. Kaffihúsið hefur verið starfrækt fjögur sumur við góðar undirtektir ferðamanna á svæðinu. Boðið hefur verið uppá kaffi, meðlæti, mat og skemmtun. Öll aðstaða er eins og ný og til fyrirmyndar.

Við mat á umsækjendum verður litið til fyrri reynslu þeirra í álíka starfsemi auk hugmynda viðkomandi um hvernig kaffihúsið geti stutt við ferðaþjónustu í Árneshreppi.

Frekari upplýsingar veitir oddviti Árneshrepps í síma 4514001 (Oddný) arneshreppur@simnet.is.

Sjónvarpslaust var í gærkvöld á Ströndum og Norðurlandi vestra að hluta.

Ástæðan var bilun að Hnjúkum við Blönduós  þar sem sendir gaf sig einhvern tímann á milli fimm og sex í gær.Starfsmenn Mílu sem þjónustar stöðina fyrir RÚV fóru á staðinn á milli sex og sjö í gærkvöld og fundu strax út að sendirinn væri bilaður og skiptu um hann og tók það talsverðan tíma, en samt styttri en reiknað var með í upphafi viðgerðar,því sjónvarp komst á aftur um klukkan 22:22 í gærkvöld á Ströndum og Norðurlandi vestra.Sjónvarpslaust var á þessu svæði  í um sex til sjö tíma.

Bæjarins besta.
„Við erum með hörmulegar vetrarsamgöngur hér í Djúpavík. Snjómokstur til okkar var skorinn niður um 50% þegar kreppan skall á árið 2008. Það er ömurlegt að lítið samfélag eins og okkar, sem aðeins hafði mokstur tvisvar í viku, skuli vera komið niður í eitt skipti í viku. Þetta hefur gríðarlega mikil áhrif og ekki síst á samkeppnisstöðu okkar gagnvart öðrum ferðaþjónustufyrirtækjum í kringum okkur. Það er til dæmis mokað allan veturinn, bæði til Drangsness og til Bjarnarfjarðar," segir Eva Sigurbjörnsdóttir  í viðtali við bb.is,sem rekur Hótel Djúpavík í Árneshreppi ásamt eiginmanni sínum Ásbirni Þorgilssyni. Rekstur hótelsins hefur gengið vel í sumar þrátt fyrir að veðrið hafi verið að stríða íbúum í Djúpavík í byrjun sumars.
Nánar hér á BB.ÍS

Kaupfélag Hólmavíkur er aldeilis búið að gera góða hluti núna undanfarið til þess að bæta aðgengi fatlaðra og annarra að verslun sinni og veitingasölu á Hólmavík sem var sameinuð í einu húsi í vor. Síðasta vetur var sett upp sjálfvirk rennihurð að versluninni, svo fólk þarf ekki að baslast við að opna og loka hurðinni sjálft. Í framhaldi af malbikun bílastæðisins við Kaupfélagið fyrr í sumar hefur fyrsta sérmerkta bílastæðið fyrir fatlaða á Hólmavík nú litið dagsins ljós, en í gær var unnið að því að merkja bílastæði við Kaupfélagið.Þetta kemur fram á vefnum Strandir.is

Ferðamálasamtök Vestfjarða hafa nú auglýst hlutabréfakaup í Vesturferðum.Lágmark hlutakaupa er 50.000 kr. og hámark er 500.000 kr.

Ferðamálasamtök Vestfjarða eiga nú 70,2% hlut í ferðaskrifstofunni Vesturferðir. Samtökin bjóða nú til sölu hluta af eignaraðild sinni í félaginu þannig að eftir standi eignarhlutdeild upp á um 25%. Þegar andvirði seldra hluta Ferðamálasamtakanna hefur fengist frá væntanlegum kaupendum ganga frekari greiðslur til hlutafjáraukningar í Vesturferðum ehf. Þér eða fyrirtæki þínu stendur til boða að kaupa hlut í félaginu.

Heildarhlutir sem seldir verða nema kr. 7.000.000. Hlutafjáraukning í Vesturferðum verður kr. 2.510.000 og endurseldir hlutir, sem Ferðamálasamtökin keyptu síðastliðið vor af Hótel Ísafirði hf. og Flugfélagi Íslands hf., nema kr. 4.490.000.

Nánar á www.vestfirskferdamal.is